Le politikus

Þessi færsla er ekki fyrir fólk með græn augu. Mig langar til að hrósa ÖBÍ fyrir snilldarlega góðar auglýsingar sem hitta beint í mark. Það sem eftir er að sortera örykjana frá öðrum sem ekki ættu að lesa græneygðu auglýsingar.

..og svo við höldum áfram að tuða. Ef ég legg af stað í vinnuna klukkan tíu mínútur fyrir átta eru allar líkur á því að ég lendi á eftir strætó. Hann fer nú ekki hratt yfir þessi guli. Við elliheimilið Eir fer mikið af fólki út úr vagninum. Mest af fólkinu sem stígur út vagninum þarna eru af asískum uppruna, íslendingar eins og við, þó þau líti kannski ekki alveg eins út ennþá, á leið í vinnuna! Með vaxandi neyð á vinnumarkaði þessara stofnana, fyrirhuguðum setuverkföllum, útbrunnum örþreyttum starfsmönnum, vinnuálagi, mistökum vegna þreytu starfsfólks....hvaða snilldarráð kemur okkur í hug!! Jú gerum könnum og athugum hversu margir Íslendingar myndu kjósa flokk sem berst fyrir fjölgun innflytjenda á Íslandi.....gamaldags rasistaflokk!!! Er ekki allt í lagi á þessu skeri. Þá fyrst verður neyð á Eir.

...og svo við höldum áfram. Ef ég vissi ekki betur mætti halda að ég væri orðin pólitískur þverhaus. Það var ákveðið að búa til eitt stykki Kárahnjúkavirkjun og allt varð vitlaus, náttúruverndarsinnar mótmæltu og byggðu tjaldbúðir og hver Íslendingur grét yfir þessu fagra landi sem á að fara undir lón. Gott og gilt, ég fór nú þarna um þetta svæði og svei mér þá að þetta var EKKI eins fallegt og ég hélt að það yrði. En mér þykir vænt um landið mitt og finnst alveg komið nóg af virkjunum. Með þetta í huga finnst mér alveg magnað, ég endurtek alveg magnað að ekkert skuli heyrast í umhverfissinum um Hellisheiðina. Ég sver það, það er hreinlega verið að grafa Hellisheiðina í sundur og engin segir boffs. Það var rifist yfir Kárahnjúkum þar sem engin fer nema fuglinn fljúgandi en 10.000 manns á dag sem keyra um Heiðina segja ekki orð.....alveg til skammar!!!!

Niðurstaðan....þessa færslu ættu græneygðir Asíubúar sem vinna hjá Orkuveitu eða Landsvirkjun ekki að lesa.....!!!

...Janus hinn pólitíski.

...og meira

Ég vaknaði í morgun í hreina rúminu mínu eftir mjög svo slaka og rólegheita helgi. Það var náttúrulega dregið fyrir gluggann en ég sá hvernig sólin teygði anga sína framhjá gardýnunni og vakti í brjósti mér þrá eftir sólardegi. Ég náttúrulega Snoozaði eins og prinsessum einum er lagið og lét mig dreyma um lautarferð eftir hádegið með ungana mína. Fuglarnir sungu og sumarið töfraði.

Það var því eins og að stíga inn í aðra vídd þegar ég loksins fór fram í stofu og sá að jörðin var alhvít! Hver pantaði þetta? Ég held að landin hafi verið hálfdofin yfir þessari vitleysu, búið að sekta brósa fyrir að vera á nagladekkjum og svo hrósar maður happi yfir því að hafa ekki verið búin að taka naglana undan. Ég var tuttugu mínútur á leiðinni í vinnuna í stað átta mínútna.

Hvar er sumarið?

Þetta er nú bara of fyndið til að sleppa því!!

Lögreglan í Vík kærði fjóra ökumenn fyrir of hraðan akstur um helgina. Sá sem hraðast ók var erlendur ferðamaður sem frétt hafði af Skaftárhlaupi og ók eins hratt og hann komst til að verða ekki undir hlaupinu. Var hann á frekar afllitlum bílaleigubíl en mældist þó á 135 km hraða.

Hvað viljið þið veðja miklu um að hann hafi verið á Yaris? Eldrauður í framan eftir átökin við að verða ekki undir hlaupinu sem elti hann eins og geysistór tröllskessa með massahor!!

Múhahahhahahahaa!!!!!!!!!!!1

kú, kýr, kýr, kú

Mér leikur forvitni á að vita hvaða öfuguggaháttur bjó í huga þess manns sem var fyrstur til þess að prófa að mjólka kýr?

Já ég held ég prófi að toga í þetta dinglumdangl þarna undir kúnni og drekki það sem kemur út......hehehehe.

Hvað ætli hann hafi verið að hugsa?

Kláði

Ég var að baka pitsu. Ég var rétt byrjuð að hnoða deigið þegar mér fór að klæja alveg hryllilega í nefið. Svo mikill var kláðinn að ég þvoði á mér hendurnar svo ég gæti klórað eins og mig lysti. Eftir nokkrar snýtur og hnerra réðst ég aftur í deigið og með það sama byrjaði kláðinn aftur. Hvernig stendur á því að manni klæjar alltaf í nefið þegar hendurnar eru skítugar??

Af hverju...?

Nú skal spurt! Hvernig stendur á því að mínúturnar í biðröð fyrir utan klósett á skemmtistað eru svona óbærilega lengi að líða en svo þegar inn er komið líða þær svona ótrúlega hratt...maður getur varla notið stundarinnar!

Hjartað mitt

Hjarta – þessi pumpa sem slæst allan daginn, stundum hægt og stundum hratt og svo að lokum ekki neitt. Það eru mörg orð sem tengjast hjarta. Það er hægt að vera hjartahreinn, hjartaheitur, hjartgóður, hjartheitur. Stundum er eiginleikum hjartans líkt við dýr t.d. ljónshjarta, dúfuhjarta, músarhjarta. Smellt við lýsingarorð kalt hjarta, heitt hjarta, lítið hjarta, stórt hjarta, brostið hjarta. Svo getur hjartað verið notað sem forliður t.d. hjartaflökt, hjartsláttur, hjartaáfall. Sem sagt fullt af orðum sem lýsa þessu merka líffæri sem er ekki einu sinni eins og hjarta í laginu, að minnsta kosti ekki eins og það lítur út í blöðunum. Þeir sem eru með steinhjarta geta ekki vandaðar manneskjur. Að hafa hjarta sem er jafnhart og steinn hlýtur að vera fyrirboði erfiðs dauðdaga, ekki myndi ég vilja láta lífið mitt slást í stein!! Nú er spurt? Sá sem er með steinhjarta, getur honum hlýnað um hjartaræturnar? Þversögn sem ég rakst á um daginn….einhver sem lýsir sér með steinhjarta og hlýnar svo um hjartaræturnar. Kannski þetta sé bara Grinch. Stækkar um eitt númer ef hann slysast til að koma fram eins og mannvera! Kannski Grinch eigi sér bara uppreisn æru? Alla vega…ég verð að fara að stytta þessa pulsuenda, annars kemst rúsínan ekki til skila. Ég hitti börnin mín í dag eftir tíu daga fjarveru og satt að segja var ég farin sakna þeirra pínulítið. Eins og flesta aðra daga fékk ég gjöf frá nemenda, meira að segja tvær. Í færslunni á undan er mynd af þeim. Önnur gjöfin er heimatilbúið perlað stykki og sautján krónur. Hin gjöfin er flottasti hlutinn af páskaegginu sem daman fékk þetta árið. Ykkur finnst þetta kannski kjánalegt en ef við hugsum um það þá voru þessar tvær prinsessur að gefa kennarum smá bita af hjartanu sínu.

Ég hef nú aldrei verið sögð hafa steinhjarta og því get ég með hreinskilni sagt að mér hafi hlýnað um hjartaræturnar og gott ef litla dúfuhjartað hafi ekki stækkað um nokkur númer.

….og hver segir svo að dráttlaus kona sé döpur?????

Eitthvað bilað?

Það amar eitthvað að blogginu mínu! Ég er búin að reyna nokkrum sinnum síðustu daga að setja inn einstaklega væmna færslu með myndum og öllu og blogger neitar bara að leyfa henni að birtast. Kannski er það vegna þess hve væmin hún er. En ég læt ekki bugast og mun finna leið til þess að birta ykkur hana innan skamms.

Málshættir

Sú var tíð að maður fékk gáfulega málshætti í páskaegginu sínu. Þar sem ég borða ekki og borðaði ekki súkkulaði á mínum yngri árum var það liggur við það eina sem var spennandi við eggið. Margt svekkelsið hefur þó komið upp af óskiljanlegum málsháttum. Meira að segja man ég eftir því að hafa fengið sama málsháttinn tvö ár í röð.

Alla vega...á ferð minni um höfuðborgina í dag hlustaði ég á Reykjavík síðdegis (ég er að verða svo ótrúlega þroskuð). Þar var sem sagt verið að ræða um málshætti. Nokkrar reiðar konur hringdu og kvörtuðu yfir því að HAFA EKKI FENGIÐ NEINNI MÁLSHÁTT!!! Páskarnir ónýtir því engin komu heilræðin.

Ég fékk páskaegg þetta árið eins og öll hin árin, náttúrulega braut það í sundur og leitaði að málshættinum og gaf svo eggið til súkkulaðigrísa. Málshátturinn var Augun eru spegill sálarinnar, flottur málsháttur en spekin kannski ekki alveg ljós.

Í Reykjavík síðdegis hringdi ein eldri kona sem fékk "Dapur er dráttlaus maður".....múhahahhahaha það hefði ég viljað fá :)

Það besta sem ég heyrði annars í þessum heilræða bransa þessa páskana var þessi flotta speki fengin að láni af annarri bloggsíðu....Þegar þú bendir með einum fingri, þá benda fjórir á þig!! Þetta þyrfti maður að geyma ofarlega í huganum :)

Döpur er dráttlaus kona...................hahahahahahhahahahahah!!!
Góðar stundir!!

Smá mynd

Við erum svo sæt saman

Vil endilega að þið svarið spurningunum og mun ekki blogga fyrr en nokkkrir fleiri hafa svarað....svo bara drífa í því!!!

ps. Var að setja slatta af myndum í albúmið mitt - þær elstu eru svona um tveggja ára. Endilega skoða!!!

Próf...!

Nú reynir á, svarið spurningum um mig!!

http://www.quizyourfriends.com/linkemail02.php?quizname=060414091048-454548&

Heimsfréttir

Íþróttir og hreyfing eru samkvæmt orðabók Janusar: tilfærsla á líkama til vinstri eða hægri, afturábak eða áfram með það að markmiði að þjálfa vöðva. Íþróttir er mjög fjölbreyttur málaflokkur sem nær allt frá hugarleikfimi í skák eða bridds, skúringum eða krullu, keyrslu eða kappakstri, til boltaíþrótta af ýmsu tagi. Nú er framundan tuðrusparkaveisla betur þekkt undir nafninu HM í knattspyrnu sem haldið er í Þýskalandi á næstu vikum. Það er allt í uppnámi, áhugamenn um knattspyrnu eru búnir að mæta veikir í vinnuna í allan vetur því nýta á uppsafnaða veikindadaga í það að horfa á gulldrengi sparka blöðru. Ekki ætla ég að vera með stórar yfirlýsingar enda fótbolti aldrei eins skemmtilegur og á HM.

Nú Þjóðverjar bíða spenntir eftir að þetta skelli á og eru í óðaönn að búa sig undir að taka á móti þeim ótrúlega fjölda fólks sem sækir þessa skemmtun. Veitingahús spretta upp á þeim þrettán stöðum sem spilað verður á. Hótel fá nýjar sængur og bjórinn er bruggaður sem aldrei fyrr. Eitt er þó sem setur svartan blett á þessa miklu íþróttakeppni. Þannig er nefnilega að í Þýskalandi var vændi lögleitt fyrir nokkrum árum og því spretta upp samhliða veitingahúsunum, vændishús. Í Berlín er til dæmis verið að byggja vændishús sem tekur hvorki meira en minna 650 viðskiptavini á sama tíma!!!! Eins og hver maður sér og skilur eiga Þjóðverjar ekki svona mikið af ungum kvennmönnum sem reiðubúnir eru til að selja blíðu sína til einhverrar þjóðar fótboltabullu og því mannsal stundað sem aldrei fyrr. Straumur að konum í leit að betra lífi liggur beint inn í íþróttahöllina í bólfimi. Hvernig dettur siðmenntaðri þjóð í hug að lögleiða þessa íþrótt?? Þetta finnst mér setja mjög svo dökkan svip á þessa veislu sem framundan er og ég vona heitt og innilega að Olympíuleikarnir með sínum gildum og siðum verði aldrei haldnir í Þýskalandi.

Ef ég ætti heima í Simababve væri ég orðin öldungur, ein af þessum sem sjást í bíómyndum reykandi friðarpípu og ráðleggja öðrum hvað best væri að gera í tilteknum aðstæðum t.d. ekki fara til Þýskalands næstu vikur í leit að betra lífi. Í Simababve ætti ég aðeins eftir að lifa í fimm ár til að vera búin að ná meðalaldri. Spáið í því....þar er ekki hægt að segja að lífið byrji um fertugt því þegar þú ert orðin fertugur þá ertu bara dauður. Hvernig dettur okkar siðmenntaða heimi í hug að láta svona sorglegar lífslíkur ná tökum á heilli þjóð.

Ég hef fundið hina ultimate afsökun fyrir þeim aukafarangi sem ég burðast með n.t. kílóum. Ástæðan fyrir þeim er að ég sef of lítið. Rannsóknir hafa sýnt að sá sem sefur of lítið, hann borðar of mikið. Þetta er vegna þess að allir hormónar fara í vitleysu þegar líkaminn hvílist ekki nóg og því vinnur líkaminn upp svefnleysið með því að kalla eftir sykri, fitu og óhollustu. Ég er því ekkert of þung, nei ég bara sef of lítið!!!!

Ég bara verð að drífa mig erlendis því það er útsala í Fríhöfninni. Múhahahahah....hver verslar þar annað en áfengi og krossgátur? og hver drífur sig erlendis vegna þess að Fríhöfnin auglýsir útsölu??

....þetta er ein af löngu færslunum og ef einhver er ennþá að lesa þá segi ég við hann Gleðilega páska og passið ykkur að sofa nógu mikið um hátíðina!!!!

Afsökun fyrir of hröðum akstri!!

• Ég er að prófa þennan bíl fyrir lögregluna, þeir eru að hugsa um að endurnýja flotan.

• Ég verð að drífa mig aftur á Hraunið áður en einhver fattar að ég er farinn

• Auglýsingin frá McDonalds sagði á meðan að byrðir endast. Svo ég verð að drífa mig.

• Ég er að drífa mig heim áður en þeir frumsýna myndbandið við nýja lagið hjá Herberti Guðmunds!!

• Ég vil bara ekki missa af Glæstum vonum ég hef ekki séð þátt síðustu tveggja og hálfs árs.

• Mig hefur bara alltaf langað til að fljúga.

• Mig langaði bara að sjá hvort þessi bíll kæmist eins hratt og Ladan!!!

• Ehhhhheee ég er bara svo drukkin að ég tók ekkert eftir því að ég væri að keyra of hratt.

• Ég var að reyna að keyra í burtu svo FM myndi detta út á útvarpinu mínu.

• Ég bara varð að drífa mig þeir eru að fara að ræða um nýju fiskveiðistjórnunina á Alþingisrásinni.

....eða bara brosa breitt og biðja um símanúmer hjá Sexý löggunni :)

Stuldur á blogghugmynd.

Á bloggrúnti las ég mjög góða færslu frá manni sem skrifaði um hvenær hann notaði mannanöfn í öðru vísi tilgangi. Er búin að leita núna að færslunni og finn hana því miður ekki svo ég get ekki vísað í hana á annan hátt en svona. Alla vega fannst mér þetta svo fyndið að ég ákvað að gera svona könnun á sjálfri mér og vona að þið hafið gaman af:

• Þetta er alveg út í Hróa – Skýrir sig sjálft, eitthvað er svo bjánalegt að það er alveg út í Hróa!!!

• Rósa frænka er í heimsókn – allir kvennmann þekkja að minnsta kosti eina rósrauða Rósu, sama hvort hún er frænka þeirra eða ekki. Nánari skýringa ekki þörf.

• Ég hef bara ekki Guðmund! – hef ekki hugmynd um hver þessi Guðmundur er né hvernig hann fór af því að verða táknmynd mín þegar ég skil ekkert um hvað er verið að tala!!!

• Skúli fúli – misskilningur sem byrjaði út á Flórída og hefur þaðan af alltaf verið notað um þá sem eru í fýlu, þá gildir einu hvort nafn þess fúla er Skúli eða Magnús.

• Við verðum bara að berjast við Kára - ekki misbeitning heldur gamalt og rótgróið íslenskt mál. Sagði þessa setningu margoft á ferðalagi mínu um miðbæinn með 30 orma í brjáluðu roki fyrir helgi. Já! þá slógumst við í bókstaflegri merkingu við Kára og alla hans fylgismenn.

• Ekkert mál fyrir Jón Pál – þetta er greypt í minni okkar allra sem fæddust fyrir síðustu aldamót, augljóslega á þetta við þegar eitthvað er svo auðvelt að leysa að það er ekkert mál. Komið með stóran stein og ég skal finna einhvern til að lyfta honum (eehheee) ekkert mál fyrir Jönu Páls.

• Eggbert – besti og oft eini karlkyns vinur okkar einhleypu kvennanna, nánari skýring var strokuð út með þessum táknum XXXXXXXXXXX!!!

• Ert þú þessi Jónas – vísar til þeirra sem koma sér ekki úr sporunum á blikkdósunum sínum, öðru nafni bílum. Ég þoli ekki þennan Jónas þegar ég er að flýta mér.

• Sól, Máni, Sunna, Dagur, Nótt, Líf, Mist, Snær, Mjöll, Birta, Lind og Logi, er þetta misbeiting mín eða bara samansafn af hugmyndaleysi í nafngiftum...hver vill heita Birta Sól eða Bjartur Dagur? Ég hef því ákveðið að íhuga hvort ég ætli að nefna fyrsta barnið mitt Mjúkur Sófi eða Kaldur Ís!

• Janus – veit ekki hvers vegna hann Janus er ég? Þetta byrjaði fyrir nokkrum árum og hefur æ síðan verið listamannsnafnið mitt. Aðrir segja að þetta sé mín Freudíska- undirmeðvitund sem búin að telja sér trú um að best að skilgreina sig sem karlmann til að komast áfram í lífinu. Burtséð frá brengluðum hugsunarhætti Freud þá er Janus klár gaur eða gaura.

............man ekki eftir fleiri misbeitingum á mannanöfnum en hvet ykkur kæru lesendur til að bæta við listann!!

Janus hinn knái kveður.

Svona er Janus???

Take the quiz:
What does your birth month reveal about you?

February
Abstract thoughts. Loves reality and abstract. Intelligent andclever. Changing personality. Attractive. Sexy. Temperamental. Quiet, shy and humble. Honest and loyal. Determined to reach goals. Loves freedom. Rebellious when restricted. Loves aggressiveness. Too sensitive and easily hurt. Gets angry really easily but does not show it. Dislike unnecessary things. Loves making friends but rarely shows it. Daring and stubborn. Ambitious. Realizing dreams and hopes. Sharp. Loves entertainment and leisure. Romantic on the inside not outside. Superstitious and ludicrous. Spendthrift. Tries to learn to show emotions.

Quizzes by myYearbook.com -- the World's Biggest Yearbook!

Litlir hlutir.

Það eru litlu hlutirnir sem skipta máli:

Ég er komin í páskafrí, þarf ekki að hugsa aftur fyrr en þriðjudaginn 18. apríl, spáið í því.

Það er miði í nýju nælonsokkabuxunum mínum þannig að nú fer ekki á milli mála hvað á að snúa aftur og hvað fram.

Ég opnaði Birtu og sé gamla vinkonu í blaðinu, fyrir vikið var þessi Birta aðeins skemmtilegri en allar hinar. Brennslan hennar er án vafa góð en Janus þekkti ekki eitt lag sem í henni var, enda hefur hún ekki lengur tækifæri til að hlusta á útvarp (og þar af leiðandi tónlist) eftir að öll útvarpstækin á bænum frömdu sjálfsmorð á sama tíma. Það er víst ekki hægt að bjóða þeim endalausan viðbjóð!!

Gönguferð á laugardegi með vinkonunum og djamm þegar líður að kveldi.

Söngvakeppni framhaldsskólanna.....ahhhhhhhhh...sorry ég er bara nörri. Get ekki beðið eftir Júróvísion - og útvarpið snérist í gröfinni.

Fermingarveisla á morgun, matarveisla, ahhhh!!

Já það er gaman að vera til......góðar stundir!

Að ganga á vatni

Einhverjir vísindamenn í Langtíburtistan eru búnir að komast að Jesús gekk ekki á vatni.
Þið munið kannski eftir þessari sögu, ef ekki þá getið þið rifjað hana í bók sem Biblía og ætti að vera aðgengileg í flestum betri bókahillum. En nei! það var heldur betur brugðið betri fætinum fyrir þann rithöfund. Samkvæmt þessum vísundum var hitastigið á jörðinni á þessum tíma þannig að vatnið sem Jesús á að hafa gengið á var að öllum líkindum frosið. Þar sem lærissveinarnir voru langt í burtu og engin mengun var í vötnum á þessum tíma var ógerlegt fyrir þá að sjá að Jesús gekk á ís en ekki vatni. Þannig varð þessi misskilningur til og varla við neinn að sakast, eða hvað?

Trúi nú hver sem vill og betur getur. Ég spyr nú bara, hvers vegna eru þessir vísindamenn ekki að gera eitthvað mikilvægara en að velta sér upp úr þessu t.d. finna lækningu við krabbameini nú eða tískuveikinni fuglaflensu?

Af þessu tilefni er við hæfi að enda færsluna á rétta orðinu……Amen!!

Bloggátak...

Eitt á dag kemur skapinu í lag :)

Ísland sko ögrum skorið,
eg vil sko nefna þig,
sem á brjóstum sko borið,
og blessað sko hefir mig.

Hvað haldið þið að Eggert hafi snúið sér marga hringi í gröfinni eftir þegar hann heyrði þessi ósköp í útvarpinu í dag. Það þyrfti að breyta slagorði þessarar auglýsingaherferðar og snúa því yfir í…..Sko tala minna!!!

Hvernig á ég að losa mig við þennan ógeðslega fresskött sem búinn er að taka sér bólfestu fyrir utan íbúðina mína. Mamma sagði mér að reyna að ná honum og setja sinnep í rassinn á honum….oj….og svo auðvitað henda sinnepinu. Ég get ekki neitað því mikið lengur, en hún fröken Sigríður köttur er gleðikona. Veit ekki hvar mér mistókst í uppeldinu en mun leita ráðgjafar fyrir hana hjá fagaðilum. Skyldi vera til meðferðarfræðingur fyrir ketti með kynlífsfíkn? Þangað til lausn finnst mun ég halda áfram að sofa með uppþvottalög á náttborðinu og vona það að einn daginn þegar ófétið heldur fyrir mér vöku hitti ég hann í augað. Það er örugglega ekki gott að vera með sápu í auganu!!!

Rúllandi tómatur

Mýrarnar brenna breytist í Mýrarnar vökna. Hefði nú ekki verið leiðinlegt ef þessi subbulegi dagur hefði frekar komið föstudaginn eða laugardaginn. Það liggur við að maður andi léttar eftir þessa þurru daga.

Það rúllaði tómatur niður brekkuna fyrir utan íbúðina mína. Gamall maður stoppaði og horfði á tómatinn, hann benti krökkum á tómatinn og þau stoppuðu líka og horfðu á tómatinn rúlla. Einhverra hluta vegna stoppaði ég bílinn minn og leyfði tómatnum að rúlla áfram niður götuna í stað þess að keyra á hann og búa til tómatsósu eins og í uppáhaldsbrandara barnanna í bekknum mínum. Tómaturinn rúllaði því áfram niður brekkuna og hver veit hvar ferð hans stöðvaðist. Það er ekki oft sem tómatur fær svona ókeypis ferðalag.

Spurning dagsins er þessi. Hvernig geta tveir 175 gramma hamborgarar sem kosta 239 krónur stykkið verið samtals 298 grömm og kostað 239 krónur?? Er þetta kannski einhver ný stærðfræði sem aðeins er kennd á þjálfunarnámskeiði hjá Nóatúni?

Strætó

Þetta gerðist hérna um árið þegar ég átti í ástarsambandi við harðgiftan strætóbílstjóra úr millahverfinu í Garðabæ. Ég var ung og vitlaus og bjó í kjallaranum í húsinu hjá mömmu og pabba í smáíbúðahverfinu. Ég kynntist strætóbílstjóranum þegar hann var næturvagninum í miðbænum þar sem ég hafði verið að sópa í kringum tjörnina. Hann bauð mér far heim á gula stóra bílnum. Hann var náttúrulega í einkennisbúning og þar sem ég er svona mikill sökker fyrir búningum stóðst ég hann ekki. Hann var miklu eldri en ég og giftur og því vildi ég helst ekki að mamma og pabba myndu sjá hann. Ég kenndi honum því hvernig hann gæti skriðið inn um gluggan í kjallaranum, klætt sig hljóðlega úr og skriðið svo beint upp í til mín eftir langa vakt í vagninum. Þetta gekk lengi. Hann stóð sig vel strætóbílstjórinn.

Svo kom amma í heimsókn utan að landi og þar sem kellan hraut svo hátt var ákveðið að hún myndi sofa í kjallaranum en ég á sófanum í stofunni. Um miðja nótt vakna ég við skelfingaröskur ömmu, á milli svefns og vöku áttaði ég mig strax á því hvað var að gerast. Ég fór því á handahlaupum niður í kjallarann og opnaði rifu á hurðina og heyrði mér til mikillar skelfingar að amma mín segir...svona vinur þetta er nú allt í lagi komdu hérna aðeins aftur til mín. Svo sá ég undir hælana á strætóbílstjóranum mínum út um gluggann. Amma dæsir og heldur áfram að sofa. Ég sá bílstjórann aldrei aftur þó glugginn stæði alltaf opinn fyrir hann.

Nokkrum árum seinna fór ég á ættarmót. Ég geng inn í sal, ég með ömmu í taumi og heilsuðum öllum ættingunum. Allt í eins stend ég augliti til augliti við strætóbílstjórann ennþá með ömmu upp á arminn. Amma heilsar og kynnir sig og horfir brosandi til hans og segir...mér finnst ég nú kannast við þig vinur!!! Gúbb

Frændi svarar....já það getur vel verið ég keyri strætó. Ættarmót eru nauðsynleg.

Góðar stundir.

...helgin

Ég er búin að vera fiskur í þau rúmlega 29 ár sem ég hef verið í þessari tilveru. Ég kann alveg einstaklega vel við mig í vatni og gott er ef ég hef ekki hugleitt og mælt út hvort svona hornbaðkar fari vel í litla bláa baðherbergið mitt. Öllu má þó ofgera, ég sat í pottinum rúma tvo tíma á föstudaginn, fór í sund með Árna frænda minn í tæpa tvo tíma í gær og sat í pottinum með Guggu í gær með húfu og bjórkippu og þar voru teknir tæplega þrír tímar í bleytu. Það er ekki hægt að verða hreinni en þetta.

Á milli þessara pottferða er nú ýmislegt annað búið að dunda, fór náttúrulega og þvoði bílinn minn, það er bara fastur liður þegar maður kemur á Selfoss. Ég fór líka og strunsaði nokkra kílómetra áðan með mömmu. Svo er ég búin að eyða ótæpilegum tíma í tölvunni. Þegar ég kemst í svona háhraða internet er ég eins og barn sem kemst í molakar. Fer að skoða einhverja alls konar vitleysu. Meira að segja datt inn í það að sitja í tölvunni langt fram á nótt að spila tölvuleik...er ekki allt í lagi? Svo er alltaf gaman að fara svona smá bloggrúnt....bendi ykkur sérstaklega á þrjá bloggara sem er einstaklega skemmtilegir - tveir þeirra myrkur og fyndin gaur eru með tengil hérna neðar á síðunni minni.....vildi að ég gæti skrifað svona skemmtilega um ekki neitt.