Allt í drasli.

Stundum þoli ég ekki blogspot, nýjasta færslan er á hinni síðunni minni.
www.janus.bloggar.is

heyrumst

Google

Kapalvæðing, formikofila, moskítóflugur, Lási, kínverska dagatalið, janapals, bryggjuhátíð, súrir og sveittir fætur, Sísí, fjallið Þríhyrningur, pöddur, nektarmyndir, Guggus og Janus….

Getið þið ímyndað ykkur hvaða upptalning þetta er? Í gegnum teljarann er hægt að sjá hvaðan fólk kemur inn á síðuna mína og öll þessi orð hér að ofan hafa verið sleginn inn á google og þaðan leitt fólk inn á síðuna mína. Svolítið skemmtilegt finnst ykkur ekki? Að einhver perri í leit að nektarmyndum skuli rata inn á síðuna mína. Finn ekki færsluna sem ég var að nota þetta orð í en….nú er hvort sem er komin önnur slík.

Ég er búin að sitja með tölvuna á hnjánum í mest allan dag. Kláraði fyrst að skrifa ferðasöguna miklu og ætla að pósta henni inn um leið og ég fæ restina af vísunni. Í nokkra tíma er ég svo búin að sitja og reyna að átta mig á hvernig ég get breytt logo í mynd sem mamma getur saumað í saumavélinni sinni. Úfff þetta var nú alveg til að hræra upp í hausnum á mér svona í miðju fríi. En svei mér þá ég held ég sé búin að átta mig á því hvernig þetta er gert. Ég yrði ekki lengi að tapa áttum ef ég ætti að sitja við tölvu allan daginn.

Helgin og fleira

Jæja hún var frábær þessi helgi sem var að líða. Ég var á Bryggjuhátíð á Drangsnesi í rjómablíðu eins og þið öll hin. Ég var aftur á móti ekki undirbúin fyrir svona blíðviðri, hélt að svona veður myndi ekki verða á þessu svæði.

Alla vega á föstudagskvöldið fór ég í pottinn í flæðarmálinu og drakk bjór undir stilltum himni. Á laugardagsmorgun smellti ég mér út í eyjuna Grímsey á Steingrímsfirði og sleikti sólina, hlustaði á fuglana og tók myndir. Fór svo í nýju flottu sundlaugina á Drangsnesi, borðaði steik, drakk hvítvín, fór á Brekkusöng og lenti svo í svona ekta heima-gítar-partýi og söng úr mér röddina. Svo var brunað heim í gær í sólinni, hefði verið skemmtilegra að eyða þeim degi öðruvísi en í bíl en rauði nebbinn hefði ekki meikað meiri sól. En pffff það styttist í sumrinu og nebbinn þoldi alveg enn einn sólbrunann.

Ég fór svo í dag og keypti mér hvorki meira né minna en nýja gönguskó. Ákvað eftir síðustu Esjugöngu sem skyldi eftir sig níu blöðrur að gömlu skórnir væru opinberlega búnir að vera. Ég keypti því nýja skó og vígði þá á Esjunni í dag með Tuma voffa. Fékk reyndar tvær blöðrur í vígsluferðinni en það er ábyggilega bara út af úber-viðkvæmum steiktum fótum. Er alveg ótrúlega sátt við þessi kaup.....Scarpa karpa

Aukastaður!

Mér þykir svo leiðinlegt að sitja með sömu frábæru færslunni í tölvunni minni og getað ekki "póstað" henni út á netið því blogspot er í fýlu (kannski bara á túr).

Ég bjó því til svona auka bloggsíðu sem ég ætla að nota þegar blogspot segir nei takk.....hana getið þig skoðað á http://janus.bloggar.is/ þar er ég búin að setja inn fyrstu færsluna og mun á næstu dögum setja inn alla ferðasöguna af Hornströndum.

ps. Setti inn myndir úr brúðkaupinu um helgina.

Sláttur

Ég sló grasið í gær. Er búin að horfa á þessa órækt sem garðurinn minn er undanfarnar vikur og hugsa til þess með hryllingi að ég verði að reyna að slá þetta. Nú var svo komið við sögu að ekki þótti mér fært annað en að leigja slátturorf til verksins. Fyrir tilviljun rak ég þá augun í það að húsfélagið í blokkinni minni á þessa fínu slátturvél. Nú þar sem sparnaður er í handraðanum þótti mér ekki annað við hæfi en að athuga hvort sú vél kæmist í gegnum blettinn áður en ég myndi fara og leigja. Þetta er svona rafmagnsslátturvél, einstaklega nett og fín. Það reyndi talsvert á þolinmæði undirritaðar, sem er þó alveg til í bunkum þessa dagana, en þetta hófst allt að lokum og svei mér þá að bletturinn er ekki eins ljótur og ég hélt að hann væri.

Í morgun lá étinn dauður fugl á blettinum. Frú Sigríður var inni í alla nótt svo ég er búin að ákveða að þarna hafi einhver annar köttur fengið sér morgunmat eða nætursnarl. Til öryggis sótthreinsaði ég eyrnasnepilinn.

Leikarar mánaðarins

Í júlíblaði blaðsins “Myndir mánaðarins” sem fæst á öllum myndbandaleigum er listi með myndum og nöfnum 30 leikara sem leika í einhverjum myndum sem út koma þennan mánuð. Það hefur aldrei verið mín sterkasta hlið að muna nöfn á leikurum og því síður í hvaða myndum þeir leika. En hér ætla ég að prófa. Ég ætla að reyna að finna aðrar myndir en verið að auglýsa þær í þessu blaði. Vei fyrir að vita, pass fyrir að vera úti!
1. Pierce Brosnan: Ég þekki hann, hann lék einu sinni James Bond og hann lék líka biðilinn í Mrs. Douptfire…..vei!
2. Greg Kinnear: Hmmmm…ég kannast við myndina af honum og man eftir honum í einhverri mynd þar sem hann lék algjöran perra….en pass þar!
3. Queen Latifah: Okei ég hélt að þessi leikari væri karlmaður sem klæddi sig eins og kona og þar að auki hélt ég hún væri klámmyndastjarna….pass!!
4. Gérard Depardieu: Ég veit hann er franskur og hann lék í myndinni French kiss, vá ég trúi því ekki að ég hafi munað þetta…..vei!
5. George Clooney: Meira að segja ég þekki hann vel, man fyrst eftir honum í Bráðavaktinni sem doktor Ross sem tók íslenskar flugfreyjur í skoðun…..vei!
6. Matt Damon: Hann lék í mynd þar sem hann var stærðfræðisnillingur í Boston, Úffff Robin Williams lék í henni líka….man samt ekki nafnið á henni….en þetta verður samt….vei!
7. Matthew McConaughey: How to loose a guy in ten days þar sem hann rymur á mjög sexý hátt, svo lék hann líka í Failure to lunch, fór á hana í bíó….vei!
8. Sarah Jessica Parker: Sex and the city gellan, svo var hún í Family stone sem ég horfði á um daginn og svo líka í Failure to lunch með félaga Matthew….vei!
9. Kathy Bates: Úffff nú skammast ég mín pínu því þessi leikkona hefur verið lengi á markaðanum, hef ekki grænan…..pass!
10. Natalie Portman: Veit hún leikur í V for Vandetta sem er á forsíðunni á blaðinu, samt hálfgert svindl að ég þekki hana þess vegna….en ég þarf á þessu að halda….vei!
11. Hugo Weaving…..who……pass!
12. Sharon Stone: Basic instinct, þar sem hún var brókarlaus….vei!
13. Richard Gere: Ohhh mér finnst hann alltaf svo sjarmerandi þó hann sé aðeins farin að eldast karlinn. Hann leikur í Pretty woman sem ég er búin að horfa nokkrum sinnum á undanfarið……hahaha mætti halda að ég sé ástfanginn (bobb bobb)…vei!
14. Juliette Binoche: ekki grænan….pass!
15. Kate Bosworth: ekki grænan….pass!
16. Felicity Huffman: ekki grænan….pass!
17. Steve Martin: hefur aldrei verið í uppáhaldi hjá mér, finnst hann vera að gera sig of vitlausan, enda leikur hann oft í svona of vitlausum gamanmyndum. Núna síðast Cheaper by the dozen og hér er verði að auglýsa framhald af henni…..vei!
18. Kevin Kline: ég get svarið það….ekki grænan…..pass!
19. Ewan McGregor: kannast við nafnið en man ekki neitt…..pass!
20. Naomi Watts: ….pass!
21. Benjamin Bratt: var það ekki hann sem var í Miss Congeniality…hann er með skegg á myndinni, en ég held þetta sé rétt hjá mér, þangað til annað kemur í ljós….vei!
22. Dennis Quaid: á að þekkja hann en stend á gati….pass!
23. Rene Russo: …pass!
24. Sissy Spacek….pass!
25. Jeff Daniels: úff það eina sem mér dettur í hug er viskí, en var það ekki Jack….pass!
26. Judi Dench: hún lék líka í James Bond….vei!
27. Bob Hoskins: clueless…pass!
28. Steven Seagal: hann leikur í Under Siege sem ég á hérna upp í hillu….vei!
29. Gary Oldman….pass!
30. Robert Carlyle: …pass!

13 af 30 sem eru minna en 50%....usssss segi ekki frá þessu. Endilega fyllið inn í listann!

Þröngar buxur

Oft er talað um þröng föt en er þetta ekki alveg í það grófasta!!
Hvað er maðurinn að spá?

Tímaþjófur

Það endar oftar en ekki þannig að þegar við vinkonurnar förum á djammið að Ölstofan sé sótt heim. Hin pínulitlu reykmettuðu húsakynni draga okkur alltaf til sín og ekki er ég að kvarta yfir því. Það vekur jafnan furðu mína þarna inni að það skuli vera klukka á veggnum, alveg eins klukka og er í kennslustofunni minni. Oft hefur maður séð þessa klukku ganga of langt, en það kemur fyrir að hún rekur mann snemma heim. Mér fannst því frekar fyndið þegar ég sá að klukkunni hafði verið stolið um síðustu helgi. Hver nákvæmlega er tilgangurinn með því stela klukkunni af Ölstofunni…..tímaþjófur þarna á ferð, svona svipað og Goldminer…hehe!

En barþjóninn knái sem eins og klukkan er bara eitt af húsgögnunum hljóp tímaþjófinn uppi og skilaði klukkunni í heilu lagi á vegginn góða svo næturgestirnir á Ölstofunni geta haldið áfram að fylgjast með tímanum.

Hjúkk!

Leiðir til að spara.

Það er frekar fyndið að þegar kennari kvartar yfir peningaleysi á sumrin þá kemur oft svona tvírætt bros á þá sem á hann hlusta. Oftar en fylgir kommentið, þú getur nú ekki ætlast til að fá full laun því þú ert í fríi í allt sumar! Ég læt þetta ekki fara mikið í taugarnar á mér enda er þessi hugsanagangur leifar af sælulífi kennarans þ.e. þegar kennarar fóru í frí í byrjun maí og mættu ekki til vinnu fyrr en í september. Auðvitað er þetta ekki svona í dag en sumt fólk virðist ekki alveg átta sig á þessu ennþá. En þar sem ég er ekki á fullum launum, eignilega á frekar daufum launum hef ég hugsað upp nokkur sparnaðarráð fyrir fátæka kennara!!!

1. Sparaðu með því hætta að þvo. Hver segir að fötin þín verði að vera hrein? Með því að sleppa þvottavélinni sparar maður bæði rafmagn og þvottaefni J

2. Ég á þurrkara, hef ekki ennþá sett hann í samband svo ég gæti ekki sparað með því að sleppa því að hengja upp, enda er ég líka hætt að þvo svo ég þarf ekki að hengja upp!

3. Bensínið verður sífellt dýrara, bensínljósið logar á bílnum mínum og ég þarf nauðsynlega að nota bílinn á eftir svo ég neyðist víst til að setja bensín á bílinn eða? Láta bílinn verða bensínlausan einhvers staðar á slæmum stað, hringja í einhvern vin eða kunningja sem á nóga peninga og láta hann koma og draga þig á bensínstöð. Þar skal setja upp hvolpasvipinn og segja “ég er ekki með veskið mitt”. Þá eru allar líkur á því að sá sem dró þig splæsi á þig bensíni þess að gruna það að þetta hafi allt verið með vilja gert.

4. Hættu að fara í sturtu. Bíddu bara eftir rigningu, það er nóg af henni á sumrin á Íslandi hehe. Því ekki bara að slá fleiri flugur í sömu rigningunni og fara í gönguferð í skítugu fötunum, þá verður þetta allt hreint. Svo er alltaf stutt í sjóinn J

5. Hættu að versla og taktu ísskápinn úr sambandi. Ráð sem ég hef áður gaukað að ykkur, bjóðið ykkur bara í mat með því að heimsækja kunningja og vini rétt fyrir kvöldmat, gætið þess þó að það séu ekki sömu vinir og þú plataðir til að kaupa bensín á bílinn, þeim gæti farið að gruna eitthvað.

6. Lokaðu öllum gluggum og dragðu fyrir þá, þannig nærðu að halda hitanum betur inni og þarft því ekki að kynda. Hefur líka pottþétt þær afleiðingar að fólk hættir að koma í heimsókn því íbúðin, með þig skítuga, í skítugum fötum með engu fersku lofti getur farið að ilma illa þegar líður á sumarið. Það er líka ágætt að engin komi í heimsókn því þú átt ekkert í ísskápnum sem þú tókst úr sambandi í júní J

7. Sparaðu símann og bíddu bara eftir því að fólkið hringi í þig eða gera bara eins og unglingarnir, hringdu í vini þína og skelltu á áður en þeir svara, þá eru allar líkur á því að innan skamms hringi þeir til baka, nema náttúrulega að þeir séu hræddir um að þig vanti bensín, eða ætlir að bjóða þeim í heimsókn……!

8. Flyttu heim á Selfoss til mömmu og pabba á sumrin, það er alveg pottþétt sparnaðarráð því mamma eldar alltaf á kvöldin og Selfoss er svo lítið og óspennandi að það er ekki séns að þú eyðir neinum peningum í neitt sem hefur skemmtanagildi…..fast skotið?

Mislyndi

Eins og ég hef stundum haldið fram þá kemur það einstaka sinnum fyrir að ég fletti í gegnum Fréttablaðið, gerði það meira að segja í gær líka. Nokkuð mörg málefni bættust á "verð á skrifa á bloggið" listann minn og ætla ég fyrst að skrifa um það áhugaverðasta. Aftan á Fréttablaðinu í dag er að finna bakþanka Jón Gnarr sem að þessu sinni bera nafnið Mislyndi. Mjög áhugaverðir þankar sem ég vona vissulega að vekji fólk til umhugsunnar.

Í gegnum tíðina eignast maður kunninga, við suma þeirra heldur maður góðu sambandi og fær aldrei leið á samskiptum við þá við aðra neyðist maður hreinlega til að eiga samskipti við til lengri eða skemmri tíma. Eftir þann tíma getur maður blessunarlega klippt á öll samskipti við þann einstakling. Einhvers staðar hef ég lagt á minnið orð sem segja...Skyldmennin eru valin fyrir okkur en sem betur fer getum við valið okkur vini. Ekki það að skyldmenni mín séu alslæm, þvert á móti alveg einstaklega skemmtilegt fólk þó þar leynist úldin epli líka.

En þetta með mislyndið. Mér finnst það oft alveg ótrúlega magnað hvernig sumt fólk getur látið skapið hlaupa með sig í gönur og skil ekki hvernig það nennir yfirleitt að eyða deginum í skapillsku og leiðindi. Aðra stundina brosir þessi vinur manns út fyrir eyru og spyr mann spjörunum úr um hagi þína. Næst þegar þú hittir þennan vin tekur hann á móti þér með fýlusvip og svarar með skætingi og hefur engan áhuga á vera í nálægð við þig. Við eigum öll svona vini er það ekki? Vini sem maður horfir í augun á þegar maður mætir þeim til að athuga hvernig skapi þeir séu í áður en maður þorir að tala við þá. Ef vinurinn er á góðum degi er gaman að eiga samskipti við hann og maður nýtir sér tækifærið, fangar augnablikið og nýtur þess að eiga þennan góða vin. Ef aftur vinurinn er á slæmum degi er það besta í stöðunni bara að láta sig hverfa svo fýlupúkinn nái ekki að bíta mann sjálfan í rassinn. Ég þoli ekki að vera í kringum geðvonskupúka.

Ég tek því undir með Jón Gnarr og bið um leið afsökunnar á því að hafa misnotað svona hugmyndina úr greininni hans. Ég segi því fýlupúkum stríð á hendur og mun leggja mig fram um að eiga ekki frekari samskipti við þá fýlupoka sem ég þarf að umgangast. Ég vil ekki eyða tíma í það. Heimurinn er fullur af elskulegu fólki sem er ekki að kafna í sjálfu sér. Núna taka við skemmtilegri tímar :) Gangi ykkur vel.

Myndir

Hæ, hæ!
Það er eitthvað ólag á blogginu mínu svo ég get ekki póstað stóru póstunum sem ég er búin að skrifa, ég finn lausnina nálgast. Þangað til hvet ég ykkur til að skoða myndasíðuna mína en þar ég er búin að hlaða inn nokkur hundruð myndum af Hornströndum, úr Hvallátrum og Hellishólum. Endilega skoða.
Later

Fréttir dagsins

Af hverju stendur alltaf útsala í búðunum, af hverju stendur ekki stundum uppsala? Þetta sagði eitt lítið stýri í Kringlunni í dag. Hvernig myndum við auglýsa uppsölu? Takið eftir, takið eftir aðeins í dag verður auka álag sett á allar vörur í búðinni okkar í Kringlunni. Komið og gerið frábær kaup, 50% prósent aukaálag á nýjum vörum, komið og gerið góð kaup meðan birgðir endast. Haldið þið að einhverjir myndu hlaupa til?? Kannski einhverjar snobbhænur.

Get ekki annað en rætt um þessa frétt. Sagan segir af ofurfyrirsætunni Giesle Bundchen en hún segist vera orðin of gömul fyrir karlmenn. Giesle lýsir því yfir að hún telji að besti tími ævi sinnar sé búinn og karlmenn hafi reynt meira við hana þegar hún var 15 og 16 ára. Nýverið hætti hún með unnusta sínum Leonardo DiCaprio og hefur ekki verið við karlmann kennd síðan. Ég finn til með aumingja konunni og get varla ímyndað mér hversu erfitt getur verið fyrir ofurfyrirsætur þegar aldurinn færist yfir og þær fara að missa aðdráttaraflið sem haldið hefur þeim uppi mörg ár á undan, svona svipað eins og píanóleikari myndi missa fingur. Það er líka aldrei skemmtilegt að fá ekki athygli frá hinu kyninu. En öllu má nú ofgera....fyrirsætan sem komin er á grafarbakkann

..............ER 25 ÁRA!!!!

Er ekki allt í lagi!!!!!!

Helgin og fleira

Ég tók mig til um helgina og skrifaði ferðasögu um Hornstrandarreisuna miklu. Var búin að gera nokkrar tilraunir til að hefja skriftir en andinn kom ekki yfir mig eftir pöntun. Það var svo í Fljótshlíðinni sem það gerðist og þá var ekkert við hendina nema blað og penni. Ferðasagan er því til á 26 þétt skrifuðum stílabókarsíðum. Mun pikka hana inn þegar fer að rigna aftur :) og hver veit nema einhver ykkar hafi áhuga á að lesa :)

Annars er kroppurinn allur að skríða saman. Sólbruninn sem ég fékk á síðasta degi ferðarinnar og búið er að meðhöndla með sterum er hættur að svíða. Að vísu er brennda húðin að flettast af....það hlýtur að þýða að þetta sé að batna, er það ekki? Það er ekki allir sem ná að brenna öðrum stigs bruna af sólinni einni saman :)

Sunna mágkona systur minnar tók sig til um helgina og fjölgaði mannkyninu. Fæddi í heiminn litla og netta stelpu...Til hamingju Sunna og Bjarni. Og af því ég er byrjuð í barneignartilkynningum þá átti hún Anna Margrét frænka mín og Maggi maðurinn hennar strák fyrir nokkrum vikum, fjórði strákurinn á fimmtán árum.....Til hamingju með það Anna og Maggi. Hitti svo Guggu K í ríkinu fyrir helgi og hún er komin af stað með næsta barn....það verður að fjölga fólkinu....annars getur þetta orðið ansi þreytandi.

Ég fer svo í brúðkaup um næstu helgi hjá annarri frænku minni, sem betur fer fylgir það oft þessu barnaláni :)

...að lokum. Sérstaklega duglegur kennari óskar eftir dægradvöl virka daga í júlí-mánuði. Ekki væri verra ef borgun fengist fyrir :)

Góðar stundir.

Það er líf á þessari síðu!!!

Hávært tal er heimskra böl,
hæst í tómu bylur.
Oft er viss í sinni sök,
sá sem ekkert skilur.

Eitthvað mun gerast fljótlega!!!