Lús, Bjöggi, Fjörður, Andlát, Djúpsteikt og fleira.

Það er engin skömm að fá lús, en það er skömm af því að losa sig ekki við hana!!!! Þetta er það sem maður predikar yfir börnunum í dag á þessum síðustu og verstu lúsatímum. Viðbjóðsleg kvikindi sem nær vonlaust sýnist að útrýma því sumum virðist sápa og þrifnaður of erfiður. Oj ég vona að ég fái aldrei lús!

Ég heyrði auglýsingu í útvarpinu í dag. Auðvitað var eitthvað gáfulegt sem á undan fór en það eina sem settist að í hausnum á mér var þetta: Björgvin Halldórsson Þó líði ár og öld aðeins 2990 krónur….Nettó allt í matinn á einum stað. Oj ekki myndi ég vilja éta Björgvin ekki einu sinni þó hann héti Björg-vín!

Í Fréttablaðinu var þessi auglýsing. Þarftu að komast burt úr erlinum og slaka á? Við höfum handa þér og þínum þriggja herbergja parhús 75 fermetra, byggt árið 1980. Baðherbergi þarfnast endurbóta. Verð 2.900.000. Ég var næstum búin að hringja í bankann og biðja um lán svo ég gæti keypt húsið samdægurs en…..? Oj húsið er á Bakkafirði, ég veit ekki einu hvar það er!

Mér til mikillar gremju komst ég af því í dag að neglur og hár hætta að vaxa við andlát, af hverju hélt maður að það héldi áfram að vaxa. Oj ekki myndi ég vilja vera með klær og krullur í kistunni.

Við þyrftum að bjóða Jamie Oliver í mat í íslenskt skólamötuneyti. Ég er alveg sannfærð um það að hann myndi ekki fúlsa við matnum sem borin er fram á þeim veitingastöðum. Best væri að bjóða honum til Möggu í Bláskógabyggð hann myndi flytja hana með sér til Bretlands og láta hana sjá um þessi djúpsteiktu mötuneyti sem þar er að finna. Oj ekki myndi ég vilja vera svona djúpsteiktur nemandi í Bretlandi.

Og í lokin…hjálmar víkinga höfðu engin horn. Það er nú fróðleikur sem engin má fara á mis við……..oj hjálmur með horn, hver vill svoleiðis?