Maður að nafni Sigurður!

Ég fór í heimsókn í gær á Borgarspítalann. Á leið minni út af spítalanum eftir að heimsóknatíma líkur gjói ég augunum inn í stofurnar sem ég gekk fram hjá. Allt í einu er ég sem límd við gólfið, já það var eitthvað annað andlit sem ég þekkti á þessari deild.

Þar inni á stofunni sat Sigurður nokkur Guðjónsson, öðru nafni Siggi frændi. Siggi frændi er bróðir afa Egils og er eins og afi var, einn af þessum körlum sem maður hélt að tíminn myndi ekki buga. Ég stóð þarna nelgd á ganginum í smá stund og hugsaði með mér hvað ég ætti að gera. Ég ákvað svo að snúa við og æða inn á stofuna til Sigga. Ég sat þar í smástund og spjallaði við hann og reyndi að átta mig á því hvernig þessi maður gat verið orðin svona afskaplegt gamalmenni á svona stuttum tíma. Siggi var samt hress og sagði: þeir gera það sem þeir geta þessi læknagrey en það er ekki endalaust hægt að laga það sem bilað er. Þetta sagði hann eftir að hafa fengið tvö heilablóð á tveimur dögum. Svo spurði hann mig um hvernig gengi hjá fjölskyldunni og ég sem var í vafa um hvort hann myndi þekkja mig.

Ég man vel eftir Sigga frænda þegar ég var alast upp. Hann var sjómaður á skipi sem sigldi erlendis. Hann kom því oft með eitthvað svona nýtt og framandi gúmmulaði eða dót sem hann keypti í Ameríku eða öðrum álíka spennandi og langt í burtu löndum. Siggi frændi og Fríða áttu sjálf ekki börn og því vorum við afabörn Egils oft eins og barnabörnin hans. Siggi frændi var líka uppáhald hjá okkur öllum. Eins og klettur með sögur sem heilluðu mann upp úr skónum. Kom reglulega í heimsókn og sýndi öllu sem við bárum fyrir hann mikinn áhuga.

Á skírnardegi bróður míns gekk Siggi frændi til pabba míns á leiðinni inn í kirkjuna og sagði við pabba: mikið þætti mér nú gaman að fá nafna, og simsalabimm, ákvörðun var tekin presturinn látinn vita og Svanur sem átti að skíra eftir ljósmóðurinni Svanborgu sem bjargaði lífi hans fékk hið undurfallega nafn Sigurður Svanur, nefndur eftir ekki ómerkari manni en Sigga frænda. Hann ber það nafn með stolti sennilegast ómeðvitaður um hvers vegna hann hefur þetta nafn. Held ég að þetta hafi verið í fyrsta og eina skipti sem Siggi frændi bað um eitthvað fyrir sjálfan sig.

Á brúðkaupsdegi Sirrýar systur pabba fékk Siggi frændi það hlutverk að leiða hana upp að altarinu því ekki var afi minn lengur á þessari jörð til að sinna því hlutverki. Mátti varla á milli sjá hvort brúðurinn eða Siggi grétu stærri krókudílatárum. Sigríður og Sigurður, já það voru víst fleiri en Siggi Svanur sem nefndir voru eftir honum.

Vona ég að þessi pistill hljómi ekki eins og í minningargrein í Mogganum. Það á ekki að hljóma þannig því Siggi frændi hefur níu líf eins og kettirnar og ef við höfum talið rétt er hann með þessum tveimur áföllum aðeins búinn að nýta 50% þeirra.

Ég er ánægð með að hafa rambað þarna inn á stofuna til hans.