Döpur er dráttlaus kona.

Ljótur fótur

2009-02-16T22:50:00.002Z

Ósköp ertu ljótur fótur,
ó fótur þú ert ljótur.
Fótur sem ljótur,
sem sagt ljótur fótur!!!

Nýtt ár

2009-01-15T20:15:00.002Z

Nýtt ár og bloggið small á 80.000 án þess að nokkur tæki eftir því :)

Hvað er að frétta síðan síðast? Nú jólin eru búin og nýtt ár byrjað. 2008 leið sem sagt og jú ætli ég geti ekki sagt að þetta hafi verið árið mitt. Hvannadalshnúkur, Kaupmannahöfn, Hornstrandir, útgáfa á námsefni frá Námsgagnastofnun og svo allt hitt sem var svo ótrúlega skemmtilegt :)

Áhyggjur.

2008-12-16T21:13:00.002Z

Það er misjöfn vandamál sem fólk þarf að glíma við. Sumum finnst það vera stórt vandamál að geta ekki skroppið til útlanda nokkrum sinnum á ári, meðan öðrum finnst það að dröslast fram úr rúminu á morgnana vera stór áskorun. Öll vandamál eru stór í augum þess sem við það glímir og því ætti aldrei að gera lítið úr neinu vandamáli.

Einn lítill í bekknum mínum hafði miklar áhyggjur af því í dag að hann hefði gleymt að setja húfuna í ermina og hún væri bara á snaganum. Fyrir þessu barni var þetta það stórt vandamál að honum varð ekkert úr verki fyrr en hann fékk að fara fram á gang að setja húfuna í ermina á úlpunni. Svo lítið en samt svo stórt.

Á morgun á kötturinn minn frú Sigríður að fara í aðgerð á dýraspítalnum. þarf að skera burt "æxli" sem er í munninum hennar sem gerir henni mjög erfitt fyrir að borða. Frú Sigríður ofurköttur er komin á besta aldur, rétt rúmlega fimmtug, heldur en að hún sé kettlingur og er afskaplega skemmtilegur félagsskapur. Ég hef því áhyggjur að kisugreyinu og kýlinu sem stendur út úr munninum á henni.

Ég er því áhyggjufull á þessu annars fallega kvöldi.

Hornstrandir sumarið 2009

2008-12-11T21:17:00.002Z

Er ekki akkúrat rétti tíminn að segja ykkur frá sumarplönunum á svona ógeðis-veður-dögum.

Þar sem jökulinn ber við loft...” Um Jökulfirði og Austurstrandir
1. - 8. júlí, 8 dagar

Í þessari bakpokaferð gefst tækifæri til þess að kynnast nokkrum perlum Jökulfjarða og Austurstranda. Gist verður í tjöldum í þrjár nætur, en annars í húsum. Gert er ráð fyrir sameiginlegum mat í Bolungarvík og Reykjarfirði.

1. d. Siglt miðvikudaginn 1. júlí frá Norðurfirði til Hornvíkur. Á leiðinni geta farþegar virt fyrir sér hrikalega ásýnd Hornbjargs frá sjó. Gengið um Hafnarskarð í Veiðileysufjörð og tjaldað í Bæjardal skammt frá eyðibýlinu Steig.

2. d. Gengið á Kvíarnúp, en þaðan er gott útsýni yfir Jökulfirðina og til Drangajökuls. Leiðin liggur síðan að eyðibýlinu Kvíum og í Rangala í botni Lónafjarðar, þar sem verður tjaldað á gróskumiklum eyrum.

3.d. Gengið um sjávarlón og rif sem standa upp úr sjó á fjöru, farið um Miðkjós, fyrir Einbúa og í Sópanda í Lónafirði þar sem verður tjaldað.

4. d. Úr Sópanda verður gengið upp að Hyrnukili og um Þrengsli, sem er tilkomumikil gjá. Hæð haldið ofan Barðsvíkur og farið um Göngumannaskörð til Bolungarvíkur þar sem gist verður í húsi.

5. d. Dvalið í Bolungarvík við náttúruskoðun og rölt um hvítan fjörusand. Einnig verður boðið upp á göngu á Hádegishnjúk og Nóntind.

6. d. Gengið til Reykjarfjarðar um Furufjörð, Svartaskarð og Þaralátursfjörð.

7. d. Dvalið í Reykjarfirði við sund og göngur á áhugaverða staði í bland við sögulegan fróðleik. Grillveisla um kvöldið.

8. d. Siglt til Norðurfjarðar miðvikudaginn 8. júlí.

Já svei mér þá ég get ekki beðið eftir sumrinu :)

Dularfullt

2008-11-20T20:19:00.000Z

Alveg komin tími á að ýta myndinni af Helenu neðar á þessari síðu...þótt ég sé ennþá ótrúlega montin af henni.

Í þessari færslu skal rætt hið dularfulla Kalla Kanínu mál. Þegar ég kom fram í gærmorgun hrasaði ég í myrkrinu um VHS spólu um Kalla kanínu. Ég blótaði spóludruslunni og fór í ræktina. Það var ekki fyrr en ég var byrjuð að tölta á brettinu að spólan kom upp í huga mér.

Hvernig í ósköpunum stóð á því að VHS spóla um Kalla kanínu, sem ég minnist ekki að ég eigi, var á miðju stofugólfinu hjá mér. Hún var ekki þar þegar ég fór áð sofa.
Merkir þetta kannski það að ég eigi nú orðið tvö gæludýr kanínu og frú Sigríði.
Er kannski kreppa hjá karlinum þarna uppi svo nú rignir bara VHS spólum sem allir eru hættir að nota. Er þetta einhver orðaleikur? Bíður draumaprinsinn Kalli eftir mér í kanínukofanum.

Einhverjar fleiri hugmyndir?

Helena....stendur sig.

2008-11-09T12:39:00.002Z

Stendur sig vel stelpan. Þriðja sætið í þrekmeistaranum.
Til hamingju kæra vinkona :)

Skýrsla

2008-11-02T22:18:00.002Z

Það er eitthvað við þennan tíma.

Hvort það er myrkrið? Álag í vinnu? Álag í skólanum? Þreyta? Vinir?

...hver veit? en einhverja hluta vegna er ég hálfdöpur.

En burtséð frá því átti ég frábæra helgi blandaða með útivist, pottaferðum, bjórdrykkju, svefni og jú í dag remdist ég eitthvað við að læra. Það síðastnefnda sennilega ekki upp á marga fiska.

En horfa fram á veginn. Aðeins fimm dagar í næstu helgi og fjúkk hvað þá verður þétt prógramm.

Sparnaðarráð í kreppunni!!

2008-10-26T21:57:00.003Z

Það ríkir mikil kreppa ríkir á Íslandi í dag og eru allir að reyna að finna leiðir til sparnaðar. Ég missti mig svo sem ekki í góðærinu og hef því til hnífs og skeiðar en allur er varinn góður. Ég fór því á námskeið sem ber heitið "að lifa á því sem landið gefur".

Fyrsti kafli var um músaveiðar og auðvitað náði ég að veiða mús í minni fyrstu tilraun enda annnáluð aflakló. Í kvöldmat borðaði ég þess vegna músakássu. Hún var ekkert mjög bragðgóð og fékk frú Sigríður því að eiga fjaðrirnar sem ég náði ekki að kyngja.

Góðar stundir.

Brot af því besta :)

2008-10-21T20:21:00.002Z

Ef ykkar langar að hlusta á spennandi fyrirlestur :)

Brot af því besta

Fag- og umræðufundur fyrir kennara:

Stöðvavinna
Ásdís Hallgrímsdóttir, kennari í Ölduselsskóla og
Kristjana Pálsdóttir og Hólmfríður Kristjánsdóttir kennarar í Sæmundarskóla fjalla um stöðvavinnu.

Veitingar og umræður.

Fundurinn er fimmtudaginn 30. október 2008, kl. 14:30 – 16:00
Í sal Menntasviðs, Fríkirkjuvegi 1, gengið inn um Norðurport.
Bílstjórum er bent á bílageymsluhús miðborgarinnar.

Mikilvægt er að tilkynna þátttöku í síðasta lagi 29. október í síma 411 7000 eða á namskeid.menntasvid@reykjavik.is

Spennandi :)

Beverly hills 90210

2008-10-18T11:22:00.002Z

Ég man þó alltaf eftir því þegar ég rakst á frægan mann í USA hérna um árið, í bókstaflegri merkingu rakst ég á hann. Ég var á fleygiferð á línuskautum eftir Bayshore í Tampa á Flórída. Það var ekki margt um manninn þarna á þeim tíma dags sem ég var vön að skella mér á skauta og því átti ég bara stíginn.

Í fjarska sá ég þó að maður nálgast mig. Svo kemur þetta undarlega hik, ég fer hægra megin og hann líka svo ég fer vinstra megin og hann ákveður að gera það líka og svo færðum við okkur báðir í miðjuna....og plaff!! Við klesstum saman, ég á línuskautum, hann gangandi.

Þetta var ekki þægilegasta bylta sem ég hef fengið, afrifinn á báðum hnjám og olnbogum lít ég upp og sé manninn bisa við að koma sér á fætur, þreifandi eftir gleraugunum sínum um leið. Svo mættust augu okkar og þá sá ég hver maðurinn var. Eins og þið sem þekkið mig vitið þá vantar þann kafla í hausinn á mér sem ætlaður er til að muna eftir og þekkja einhverja fræga.

Ég vissi því ekkert hvað ég átti að segja við manninn sem stóð þarna fyrir framan mig, ekki ánægður á svip og sagði því bara....Sorry Steve!! Við það skellti maðurinn upp úr, setti á sig gleraugun, hjálpaði mér á fætur og gekk svo hlægjandi í burtu.

En hver var maðurinn.

Jújú þetta var enginn annar en Steve sem var ein af persónunum í Beverly Hills 90210. Ég hef ennþá ekki hugmynd um hvað hann heitir en á þeim tíma sem ég brunaði á hann á línuskautunum var hann bara frægur.

...og dauði og djöfull Skjár einn ætlar að byrja að sína nýja seríu af Beverly Hills...ég er alveg ótrúlega, ótrúlega, Ó T R Ú L E G A spennt.

Hehehe...!

Stundum...?

2008-10-17T21:05:00.000Z

Stundum...

þegar þú grætur.....

sér enginn tárin þín

Stundum.....

þegar þér er illt...

sér enginn að þér sé illt.

Stundum.....

þegar þú hefur áhyggjur...

sér enginn þín áhyggjefni.

Stundum...

þegar þú ert hamingjusamur....

sér enginn að þú brosir.

En REKTU VIÐ bara EINU sinni

Og allir vita það!!!!

Sjö undur veraldar

2008-10-09T17:37:00.000Z

Skólabekk nokkrum var sett fyrir að skrifa upp hver væru sjö undur veraldar á okkar dögum. Þótt margar tillögur kæmu fram fengu eftirfarandi flest atkvæði:

1. Píramídar Egyptalands
2. Taj Mahal
3. Miklagljúfur
4. Panamaskurðurinn
5. Empire State byggingin
6. Péturskirkjan
7. Kínamúrinn

Þegar kennarinn var að safna saman atkvæðunum sá hann að ein stúlka meðal nemendanna hafði ekki klárað verkefnið. Hún leit afsakandi á kennarann og sagðist engan veginn geta takmarkað þetta við sjö. ,,Nú, lát heyra hvað þú ert komin með.” Stúlkan hikaði við en sagði svo: ,,Ég held að sjö undur veraldar séu þessi”:

1. Að sjá
2. Að heyra
3. Að snerta
4. Að finna bragð
5. Að finna til
6. Að hlæja
7. Að elska

Allt datt í dúnalogn í kennslustofunni. Það sem okkur yfirsést sem venjulegt og sjálfsagt er beinlínis undursamlegt! Og þetta minnir okkur á að hið dýrmætasta í lífinu verður ekki með höndum reist né verði keypt.

Vona að dagurinn ykkar hafi verið góður :)

Tíu jákvæðir hlutir í dag.

2008-10-02T20:03:00.002Z

10. Í dag er veðrið nokkuð gott. Stillt, svolítið kalt en bjart.

9. Mér finnst gaman í vinnunni. Samstarfsfólk mitt er skemmtilegt og gott fólk.

8. Ég á mitt eigið húsnæði.

7. Ég fékk að mennta mig. Menntun mína tekur engin af mér.

6. Ég hef fengið að ferðast víða. Á þeim ferðum hef ég kynnst ólíku fólki með misjafnar og spennandi skoðanir.

5. Ég á góða og trausta vini sem ég vil allt hið besta. Og þeir mér.

4. Góð vinkona mín ætlar að eiga barn í febrúar, bara spennandi.

3. Ég átti mat í kvöld og gat borðað mig sadda.

2. Samband mitt við foreldra mína og systkini er gott. Ég elska þetta fólk út af lífinu.

1. Ég elska sjálfa mig.

Norsk - ensk, ensk - íslensk

2008-09-17T19:47:00.002Z

Með námsbókum er átt við öll prentuð námsgögn sem fullnægja verulegum hluta af markmiðum námsgreinar, námsefnisþörf og meginviðfangsefnum eða aðalþáttum samkvæmt námsskrá fyrir viðkomandi bekkjardeild eða námskeið og sem nemendur eiga að nota reglulega.

Já fannst ykkur þetta flókið? Prófum aftur!

Með námsbókum er átt við öll prentuð námsgögn sem fullnægja verulegum hluta af markmiðum námsgreinar, námsefnisþörf og meginviðfangsefnum eða aðalþáttum samkvæmt námsskrá fyrir viðkomandi bekkjardeild eða námskeið og sem nemendur eiga að nota reglulega.

Þetta tók um það bil þrjátíu mínútur að sjóða saman, fyrst með norsk-ensku orðabókinni og svo þurfti að setja nokkur orð í ensk-íslenska orðabók.

Shit...hvað ég er mikið nörd í þessum norðurlandamálum!!!

Í því hálfa

2008-09-07T23:17:00.001Z

Jú jú þrátt fyrir að hafa hlaupið svona "hrikalega" hratt náðist ég samt á eina mynd. Frekar fyndin svipur....hvað er þessi bjáni að taka fram úr mér??

Hahahahahaha!!!

Nóg að gera!!!

2008-08-27T21:41:00.003Z

Það er allt að gerast:

- Hluti af námsefninu mín er komið út. Búið að skila fyrstu drögum að næstu útgáfu og gerður samningur að útgáfu Bókakistunnar sem ég Fríða samkennari minn erum búnar að vera að búa til og hanna.

- Ég tók á móti 21 nemenda í fyrsta bekk síðastliðin mánudag....úfff nóg að gera, þó skemmtilegt verkefni.

- KHÍ sem heitir reyndar HÍ núna byrjar í næstu viku og dauði og djöfull, lesefnið er allt á norksu.

- Mannréttindanámið byrjar á fimmtudag í næstu viku. Spennandi, já mjög spennandi.

- Hér getið þið skoðað allt sem námsgagnastofnun er búin að gefa út eftir mig (jei):

Léttasta verkefnið.

Milliþunga verkefnið.

Þyngsta verkefnið.

Svo eru það myndaspjöldin um Græna gaukinn. Endilega skoðið það líka.

Góðar stundir.

Sumri hallar, hausta fer....

2008-08-12T17:45:00.002Z

Já sumri er farið að halla. Þegar ég kom út klukkan hálf sjö í morgun sást ekki út um eina einustu rúðu á "endurskoðaða" bílnum mínum. Það var sem sagt fyrsti vinnudagur í dag og ekkert annað að gera en byrja bara rútínuna strax og skella sér í leikfimi. Það var reyndar alveg hrikalega erfitt að vakna í morgun og baráttan við augnlokin í dag hefur verið krefjandi.

Sem betur fer eru olympíuleikar í sjónvarpinu svo ég næ að halda mér vakandi fram á kvöld. Á morgun er svo planað að ganga Leggjarbrjót með vinnufélögunum.

Það er þó ekki allt búið skal ég segja ykkur. Um síðustu helgi fór ég í brúðkaup hjá Bjarna Má frænda mínum og eiginkonu hans sem heitir Helena Herborg. Þetta var skemmtilegur dagur með því ofurskemmtilega fólki sem tilheyrir fjölskyldunni minni.

Svo er það aðalmálið um næstu helgi en þá ætlar hún Gugga mín og Siggi að gifta sig í Skálholti og halda veislu í Brautarholti. Flottur endapunktur á frábæru sumri.

Ég get þó engu lofað um frekari skrif hér, því nú byrjar ekki bara kennslan hjá mér, heldur sest ég sjálf á skólabekk eftir fimm ára fjarveru...alveg komin tími á að mennta sig eitthvað meira....eða hvað?

Lífveran

2008-07-27T23:33:00.002Z

Ég er búin að kvelja lífveru í allt sumar. Ég hef ekki séð henni fyrir lífsnauðsynlegum þörfum og oft hefur lífveran legið flöt þegar ég hef komið að henni. Nú hefur lífveran verið án nokkurrar umhyggju í fjóra daga. Þegar ég kom að henni var næstum ekkert lífsmark með henni. Ég baðaði hana í umhyggju og nú aðeins fjórum tímum síðar er hún upprisin.

Undarlegt að mér hafi verið falið það hlutverk að hyggja um þessa fallegu plöntu. Næst mun ég ábyggilega ganga frá henni.

...já það kom að því.

2008-07-23T18:58:00.000Z

Sæl verið þið.

Ég er búin að vera í bloggdvala undanfarnar vikur og kannski fer að líða að því að maður láti hendur standa fram úr ermum. Ég bara varð að deila þessu með ykkur. Hér fyrir neðan sjáið þið texta frá kanadískum strák sem er að leita uppi íslensk skyldmenni sín. Svona skrifar hann.

Iceland Small Country or Large Family ?
I am an avid genealogist and have been for years. No doubt, my Icelandic genetic heritage was part of the reason I am this way today. About 11 years ago I began to record my Icelandic ancestors into my genealogy software program. But I could never finish because I would always find another ancestor or a sibling to an ancestor etc. so my file began to grow and grow. And now of course I have almost 1/2 million names in my file and this brings me to my original question. In my opinion everyone in Iceland is related (albeit not necessarily closely). An Icelander might not think so but it seems to me (being a Canadian) that even someone who is my 7th cousin (as my sister-in-law is) is still related. Any feedback on this topic would be most appreciated.

Alla vega þá fær hann ráðleggingar frá einhverjum öðrum netverja sem segir honum að ef hann afriti textann sinn á einhverja ákveðna síðu (InterTran) þá verði textinn hans þýddur sjálfkrafa yfir á íslensku. Og svo kemur hér þessi snilldarþýðing á þessum texta. Hahaha...ég hló í nákvæmlega tíu mínútur.

Ísland Lítill Land eða Stór Fjölskylda?
ÉG er óákveðinn greinir í ensku gráðugur ættfræðingur og hafa been fyrir ár. ÉG hafa neitun efi þessi minn Íslenska erfðafræðilegur arfleifð er hluti af the ástæða ÉG er this vegur í dag. Það var ellefu ár fyrir hvenær ÉG began til hljómplata minn Íslenska forfaðir inn í minn ættfræði hugbúnaður program.I ) aldrei ljúka við því ÉG vildi alltaf finna annar forfaðir eða a bróðir til óákveðinn greinir í ensku forfaðir etc. svo minn skrá began til vaxa og vaxa. Og nú , ÉG næstum 1/2 milljón fólk í minn skrá og this koma með mig til minn spurning. Í minn skoðun , allir í Ísland er relatedalbeit (, ekki endilega náið ). Óákveðinn greinir í ensku Íslendingur might ekki hugsa svo , en það virðast til mig ( tilvera a Kanadabúi ) þessi jafnvel einhver hver er minn 7th frændi ( eins og minn systir - í - lög er ) er enn skyldur. Allir fæða bak á this efni er þakka.

Heheheheehhehe!!!!

Hornstrandir glæsilegar

2008-07-09T00:02:00.002Z

Komin heim eftir dásamlega ferð. Blauta en dásamlega.

Nú er hálft sumarið eftir og framundan eru fleiri ferðalög, grillveislur og tvö brúðkaup...geri aðrir betur :)

Nýjustu tilkynningar.

2008-06-25T23:34:00.002Z

Hér eru nýjustu atburðir úr lífi flakkara Janusar!

- Heimsóknin á Breiðafjörðin var alveg ólýsanleg eins og venjulega. Ég gekk um skerin stundum ein og stundum í félagsskap karlanna minna. Veiddi fisk, klappaði ungum, borðaði egg, drakk bjór, skaut af byssu og spilaði kana fram eftir nóttu. Alveg dásamlegur tími á geggjuðum stað.

- Ég kom heim rétt fyrir skírn hjá systursyni mínum. Hann er yndislegt barn þetta nýjasta eintak. Góð útlitsblanda af bræðrum sínum, algjört yndi. Honum var gefið nafnið Gunnar Páll, nefndur eftir öfum sínum. Við ætlum að kalla hann Palla litla :)

Í vikunni fór ég og skoðaði lokaútgáfu af verkefninu mínu sem fer á vef námsgagnastofnunnar. Hrikalega skemmtilegt að sjá þetta svona eftir meðhöndlun umbrotsmanna. Núna er bara að klára seinni hlutann af verkefninu.

Nú eru einungis fjórir dagar þangað til Hornstrandaferðina þetta sumarið. Fleiri tilkynningar verða sagðar í júlí.

Góðar sumarstundir.

Kristjana

Litli Stubbur Guðnason

2008-05-28T22:28:00.002Z

Hérna er hann kominn, svo ossa sætur!!!

Júróvision á Nasa

2008-05-25T20:21:00.002Z

Það var alveg hrikalega gaman á Nasa í gærkvöldi. Palli stendur alltaf fyrir sínu :)

Flottar gellur með flottum gæja!

Hvannadalshnúkur 17. maí 2008

2008-05-18T23:43:00.004Z

Hvannadalshnúkur er hæsti tindur Íslands, hann er að finna í Öræfajökli sem er svo í Vatnajökli. Eitthvað hefur hæð tindsins verið á reiki og vísan sem maður kunni úr barnaskóla gengur ekki alveg upp lengur, þ.e. Hvannadalshnúkur 2119. Núna segja allar mælingar að Hnúkurinn sé 2110 metra hár. Ég á samt sannanir á mynd að hnúkurinn sé ennþá 2119 metrar :) svo ætla að halda mig við þá tölu.

Maður reif sig lappir klukkan hálf fjögur eftir lítinn svefn því eini hrúturinn í kofanum hraut eins og dráttarvél. Ég var því frekar illa upplögð þarna í morgunsárið. Það leit ekki vel út með veðrið þarna um morguninn því þokan náði niður í miðjar hlíðar á fyrsta hluta leiðarinnar þó úti væri logn og nokkur hiti. Eftir að búið var að borða morgunmat og klæða sig í viðeigandi fatnað var keyrt að eyðibýlinu að Sandfelli þar sem gangan hófst. Fyrsti hluti leiðarinnar var upp Sandfellið sjálft sem teygir sig einhverja 600 metra upp í loftið. Þarna var farið eftir greinilegum stíg í gróinni hlíð. Þokan var enn nokkur og útsýnið niður minnkaði eftir því sem ofar dró. Í 400 metra hæð fyllti maður á vatnsbrúsana sína. Ekki hélt ég nú að ég þyrfti á öllu þessum vökva að halda en ákvað nú samt að hlýða fararstjóranum Smára sem virtist alveg vera með á hreinu hvernig best væri að haga vatnsburði á þessari leið. Ég var því með einn og hálfan líter af vatni þegar uppgangan hófst, þrjár kókómjólk, og tvær litlar dósir með orkudrykk, samtals rúmlega tvo og hálfan líter.

Áfram gengum við upp og áður en maður vissi af var maður komin að snjólínu í 1000 metrum, sem sagt komin upp eina Esju með Úlfarsfell sem húfu. Ennþá vorum við hálf týnd í þokunni, sem var eins og þéttur úði sem gerði mann hálf rakan. Í þessari hæð borðuðum við nesti og notuðum náttúrusalernin og fórum í beltin og svo í línu því ekki er gáfulegt að ganga yfir svæði eins og þetta án þess að vera tryggður í línu. Framundan var svo lengsta beina brekkan á þessari leið, þarna var gengið upp með nokkuð jöfnum halla og hraða í 1800 metra hæð. Ég get verið alveg hreinskilin þegar ég segi að á þessum kafla var ég alveg að bugast. Mér var svo hrikalega heitt því hitinn var farin að stíga upp fyrir 10 gráður og ég var í ullarnærfötum undir flísdótinu, svo var óvenjulangt á milli stoppa þarna svo maður var orðin alveg orkulaus.

Í 1400 metra hæð varð ég svo vitni að algeru kraftaverki ef hægt er að kalla það kraftaverk. Eins og ég sagði var þokan búin að vera að stríða okkur á uppleiðinni og skyggnið var ekki nema svona 50 metrar. Í 1400 metrum fórum við samt að telja okkur trú um að það væri að létta til því sólin var aðeins farin að ylja okkur. Við vorum því stopp og vorum að góna í kringum okkur. Þá eins og hendi væri veifað hvarf þokan á svona einni mínútu, það var hreinlega eins og hún hefði verið ryksuguð burt. Því sá maður all skyndilega í hina hópana sem lengra voru komnir og Hnjúkinn sjálfan sem brosti sínu blíðasta þarna framundan. Það er ólýsanlegt að hafa fengið að verða vitni að þessu. Þokan hvarf ekki, en nú var hún í sirka 1380 metrum og þannig hélt hún sig allan daginn. Maður gekk því þennan seinni hluta ferðarinnar í sólskini, blankalogni og dúndrandi hita…og ég ennþá í ullarbuxunum.

Það var því eins og sleppa úr einangrun þegar farastjórinn gaf mér leyfi eftir að hafa kannað punktinn sem ég stóð á gaumgæfilega að losa mig úr línunni og fara úr þessum fjandans ullarbuxum, ég var svo fúl út í þær að mér hefði verið skapi næst að troða þeim niður í næstu sprungu. Eftir þetta var gangan mun léttari. Nú var ég stödd í 1800 metrum og því ekki framundan nema ca. 310 metra hækkun. Fyrst þurfti þó að fara yfir sléttuna, þó ekki sléttuna sem húsið stóð við, heldur sléttan snjóbala sem tók alveg ótrúlega langan tíma að fara yfir. Eftir tæpan klukkutíma vorum við komin að síðastu hindruninni, hnjúknum sjálfum. Nú vorum við stödd í sirka 1850 metra hæð ef ég man rétt. Fararstjórinn ákvað að við myndum sleppa broddunum, tek ofan af fyrir þeirri ákvörðun hans. Framundan voru nú 250 metrar upp nokkuð bratta hlíð sem nokkrar sprungur rifu í sundur. Þarna fyrir neðan skildum við pokana okkar eftir og óðum að stað. Ég ákvað að ganga þarna upp í úlpu og húfu því það er alltaf kalt á toppnum er það ekki? Ferðin upp þessa metra gekk frekar hægt því það voru fleiri hópar að fara upp á sama tíma og ekki komst nema einn hópur í einu upp þá leið sem í boði er þarna. Það var hrikalega heitt, fljótlega var ég búin að stinga húfunni í vasann á úlpunni og binda svo úlpuna um mittið. Þarna fór líka verulega að sjóða á andlitinu á mér þrátt fyrir að ég hefði borið reglulega á mig allan daginn. En það var ekkert við því að gera á þessum stað annað en að fara upp og snúa rassinum í sólina. Þetta hafðist. Þarna uppi á Hvannadalshnjúk var ólýsanlegt að standa. Sólin baðaði umhverfið ævintýrabjarma svo mér fannst ég vera stödd í paradís. Þarna uppi á hæsta hjalla Íslands var blankalogn, svo mikið logn að á kveikjara sem kveikt var á stóð loginn beint upp. Það er sjaldan sem maður upplifir svona logn í henni Reykjavík hvað þá meir uppi á þessum tind, gerist örugglega sjaldan ef einhvern tíma. Við dokuðum nokkuð lengi á toppnum, tókum myndir og gónuðum í allar áttir. Það var einhvern vegin ekki manns helsta hugsun að maður ætti núna eftir að koma sér niður þessu rúmu 2100 metra sem maður var búin að príla upp. Átta klukkutíma tók það okkur að fara þessa leið.

Niðurgangurinn var mun leiðinlegri en uppgangurinn. Ég fæ alltaf þennan leiðindasting í annað hnéð þegar ég geng niður, finn reyndar mun minna fyrir honum ef ég get hlaupið niður og þarf ekki að stoppa og spenna hnéð í hverju skrefi. En það var aldeilis ekki hægt núna. Nú var sólin og hitinn búin að bræða snjóbrautina sem við komum upp svo snjórinn var eins og púður, maður sökk og rann í hverju skrefi svo maður stjórnaði ekki alveg hreyfingunum, mjög óskemmtileg ganga sérstaklega þegar maður er svona stuttfættur. Það var líka farið mjög hratt yfir og því var ekkert annað að gera en að spýta í lófana og reyna að fylgja línunni sinni. Það var líka alveg hrikalega gott að komast svona hratt niður þessa leiðindabrekku, á engum tíma vorum við komin af snjónum og á moldarstíginn aftur.

Í 1400 metrum tók þokan aftur við og þar á sama stað kláraði ég síðustu dropana af vökva sem ég var með. 1000 metrar í lækinn og ég var gjörsamlega að skrælna. Það var alveg hrikalega erfitt að horfa á hina sem ekki höfðu drukkið eins mikið og ég eða verið með meira, svolgra í sig vatninu. Shit hvað ég var þyrst. Snjórinn bjargaði versta þorstanum og sopinn frá Sigrúnu frænku var ótrúlega góður. Ég var löngu farin að heyra í vatninu renna áður en við komum að læknum, þar var líka þambað ærlega, næstum líter í einum teig. Þetta skrifast á hitann, ég gerði ekki ráð fyrir þessum gríðarlegu hitasveiflum. Við frænkurnar vorum komnar niður á bílastæði klukkan rétt rúmlega hálf sjö, rétt rúmlega þrettán tímum eftir að við lögðum af stað upp. Fæturnir titruðu ögn og hnéið var aumt, bakpokinn eða beltið hafði náð að gera eitthvert bjánalegt nuddsár á mitt bak og ein tánögl á hægri færi er aðeins bláleidd. Fyrir utan það var ég alveg stálslegin. Nema auðvitað að andlitið á mér var og er brunarúst. Held ég hafi sjaldan brunnið eins illa í framan, get ekki ímyndað mér hvernig ég væri í dag ef ég hefði ekki borið á mig vörn í hverju stoppi. Alveg fáránlegt og hundfúlt að vera svona viðkvæm fyrir gula fíflinu.

Eftir sundferð, grillmat, bjór og íbúfen var lagst í koju og meðvitundin hvarf næstum um leið og hausinn snerti koddann. Þetta var dásamlegur dagur, með skemmtilegu fólki, frábærum fararstjóra sem lét hópinn ráða hraða og för, en ekki sitt egó. Hefði ekkert á móti því að ferðast meira með hann við stjórnvölinn.

Mest og magnaðast er þó að vera búin að fara þessa leið og hafa lent á þessu geggjaða veðri. Smávægilegir hlutir eins og sólbruni spilla ekki gleðinni yfir þessu öllu. Nú er ég alveg með skjálfta fyrir fleiri fjöllum. Get ekki beðið eftir göngum í eyjunni, príli á Hornströndum og vonandi fleiri fjöllum með einhverju fólki sem ég get troðið mér með.

Nú eru manni flest fjöll á Íslandi fær, eða hvað?

Æ hvað á ég að segja

2008-05-13T23:17:00.002Z

Það er svo fyndið hvað ég hef ekkert að segja, en samt finnst mér ég þurfa eitthvað að segja í stað þess að þegja. En hvaða stefnu skal taka?

Mér leiðast alltaf svona ég gerði blogg. Eins og ég sé að endurrita dagbókina í skúffunni. Leiðist ykkur ekki svoleiðis blogg? Þeim sem leiðist það skulu því bara hætta að lesa núna því aftur koma hér nýjustu upplýsingar.

Eftir þrjá daga verð ég komin að rótum Vatnajökuls og stefnan skal tekin þar upp. Upp á toppinn á landi Ísa.

Eftir sjö daga, níu daga, ellefu daga er komið að þreföldu júróvision partýi.

Eftir 24 daga er síðasti vinnudagur í skólanum.

Eftir 25 daga fer ég því út í eyju og verð þar vonandi einhverja tíu daga.

Eftir ca. 6 vikur fer ég svo á Hornstrandir....aftur og aftur :)

Hver segir að maður hafi of mikið að gera :)

Góðar stundir.

Hver er þessi msn?

2008-05-07T21:13:00.002Z

Kristjana ert þú með msn? Ég svara, hmmm af hverju spyrðu að því? Sjáðu sko hérna er miði með msninu mínu, ef þú bætir mér inn á msn-ið þitt þá getum við spjallað saman á netinu. Það er rosalega sniðugt og hægt að setja svona myndir af brosandi körlum og svona. Hefur þú ekki prófað það?

Ég vissi ekki alveg hvernig ég átti að svara þessum sjö ára gamla yndislega nemanda mínum sem vildi ólmur að bætti honum á msn-ið mitt, hafði meira að segja dundað við að skrifa þessa ótrúlega löngu msn adressu sína á miða fyrir mig. Ég ákvað að þykjast ekki nota msn mikið, hver vill svo sem hafa kennarann sinn á msninu þegar fram líða stundir. Samt yndisleg hugsun.

Ég fékk svo bréf í gær frá Kennaraháskólanum þar sem mér var boðin skólavist næsta skólaár. Ótrúlega spennandi, eins og allir bitarnir af pússluspilinu séu að falla á rétta staði. Vantar bara eitt, sem vonandi kemur bráðlega.

Góðar stundir....og ps. ég fer stundum á msn :)

Viðburðaríkur dagur

2008-05-05T22:20:00.002Z

Þetta leit út fyrir að verða nokkuð venjulegur mánudagur. Töskurnar voru tilbúnar við hurðina, nestið á húninum sjálfum, matur fyrir kisu í dallinum og kattasandurinn tilbúin fyrir heilan dag heima hjá frú Sigríði.

Annað kom á daginn því nokkrum klukkutímum seinna hafði húsfreyjan dvalið langdvölum á klósettinu. Hef sennilegast nælt í þessa slæmu uppgangspest frá mági mínum sem engdist af því sama um helgina. Klukkan rúmlega tíu rankaði ég svo við mér í sólskininu í rúminu mínu við einhver undarleg hljóð. Og hvað haldið þið? Þarna við hliðina á mér stóð frú Sigríður og gubbaði grasi....ég rétt náið að forða sænginni undan gusunni. Vissi ekki að mannfólk gæti smitað ketti af Gullfoss pest. Því var ekkert annað að gera en að henda öllu í þvottavél klukkan tíu og lofta duglega út.

Um hádegið ruddist inn til mín hrikalega stór og ljót og feit hunangsfluga sem ég var lengi að narra í glas og þaðan í klósettið. Hún var svo stór að meira að segja kisa var smeyk, hefði þurft smá andlegan stuðning við þessar aðgerðir.

Ég druslaðist svo á fund eftir hádegið, alveg ótrúlega spennandi dæmi þar sem ég má ekki tala um alveg strax.....segi ykkur og sýni seinna.

Ég sat svo allan eftirmiðdaginn yfir framhaldsskóla ensku með Rúnka frænda sem er að fara í próf.

Sjá dagar koma

2008-05-02T18:03:00.002Z

Sjá dagar koma ár og aldir líða og engin stöðvar tímans þunga nið. Ég hljóp upp Esju kerlingu á góðum tíma í gær og hlustaði á leiðinni upp á ættjarðarmöppuna í Ipodinum mínum. Dagurinn var alveg ótrúlega fallegur og sólin hlýjaði umhverfinu og göngumönnum um hjartaræturnar, þeir voru líka ófáir sem príluðu þarna upp þennan yndislega dag. Hælsærið sem fékk uppreisn æru í skvísuskónum á Strikinu var aðeins að pirra mig og því hef ég ákveðið að fara ekki fleiri stórar fjallgöngur fyrir Hnúkinn en nú eru einungis fimmtán dagar í þá ferð. Ótrúlega fljótur tíminn að líða núna. Ferðin til Svíþjóðar og Danmerkur var alveg hrikalega skemmtileg. Á margan hátt fróðleg, en á margan hátt bara skemmtileg skemmtun. Við áttum yndislega daga í Kaupmannahöfn, örkuðum Strikið, sötruðum bjór á Nýhöfn og undirrituð náði náttúrulega að brenna alveg svaðalega í þessari fyrstu sól þessa sumars. Ég var eins og röndótt litaspjald með jarðaberjalit og ilmi, en þetta er svo sem ekkert nýtt fyrir mér.

Ég hef fleira að segja frá þessari ferð en núna er einhvern vegin major ritstífla í gangi svo ég kveð bara að sinni. Minni þó á að það eru einungis 22 dagar í þangað Ísland verður búið að vinna Eurovision....Til hamingju Ísland.

Það er að koma sumar.

2008-04-15T20:49:00.002Z

Það er mynd af mér í Mogganum í dag. Veit ekki á hvaða blaðsíðu svo þið verðið bara að leita. Við getum haft svona keppni sem heitir Hvar er Jana, en ekki Hvar er Valli?

Á morgun fer ég á skauta.

Það eru tveir dagar þangað til ég fer í klippingu.

Það eru þrír dagar þangað til ég fer i litun og plokkun.

Það eru 4 dagar í frænkupartý.

Það eru bara 6 dagar þangað til ég fer til Svíþjóðar.

Það eru bara 31 dagur þangað til ég fer á Hvannadalshnjúk.

Það eru nokkrar vikur þangað til ég kemst í eyjuna.

Það eru aðeins fleiri vikur þangað til ég kemst á Hornstrandir.

Í dag sótti ég um framhaldsnám í Kennaraháskólanum. Það er einn og hálfur mánðuður þangað til ég fæ svar um hvort ég kemst í það.

Dag eftir dag.

Breyttar aðstæður

2008-04-12T13:35:00.002Z

Sælir félagar!
Eins og mörg ykkar vita hef ég mikið verið að hugleiða stöðu mína sem kennari. Margir atburðir og aðstæður hafa ýtt undir þær hugsanir að kannski sé ekki það besta fyrir mig að vinna þetta starf á þeim stað sem ég er núna. Þar að auki eru kjörin ekki þannig að maður hoppi hæð sína í loft upp.

Ég hef því verið að velta fyrir mér að söðla um og skipta um vettvang. Fara að læra blindrafræði og starfa hjá ríki en ekki sveitafélagi. Það fer víst betur í buddu, en örugglega ekki í áhuga. Hurðinni var því skellt.

Ekki alls fyrir löngu ákvað ég að láta áhugann ráða og halda áfram á sama vinnustað næsta vetur. Ég skal segja ykkur það að það var ekki auðveld ákvörðun og upp hafa komið aðstæður síðan ég ákvað þetta sem virkilega hafa reynt á þessa ákvörðun. Stundum finnst mér hreinlega að félaginn þarna uppi sé að hlægja af mér...svona hvað varstu að spá?

En svo taka málin aftur aðra stefnu. Á fimmtudaginn hittum ég og samkennari minn mann sem er að ýta okkur út í að gefa út námsefni sem við höfum verið að búa til. Framundan er því fundur á Námsgagnastofnun þar sem kostir verða ræddir. Ekki leiðinlegt að geta kannski séð námsefni eftir sjálfan sig í bókahillum bókabúðanna á komandi árum. Í gær fórum ég og samkennari minn og tókum við Þróunnarstyrk sem skólinn okkar fékk vegna verkefnis sem við höfum verið að vinna. Styrk sem við getum notað til áframhaldandi þróunnar og skipulags. Alveg ótrúlega spennandi.

Ég er alveg hrikalega spennt yfir þessu námsgagnadæmi og allt í einu hefur gluggi opnast þó hurðin sé ennþá vel læst er aldrei að vita nema einhvern dag geti ég gengið út um hana og fengið draumastarfið upp í hendurnar....Alveg ótrúlega spennandi.

Krónur

2008-04-07T20:45:00.002Z

Íslenskur veruleiki. Það sem Geir ráðherra kallar lágkúru. Hvernig vogar almenningur sér að setja út á þetta einkaþotubras hjá þessum herrum. Hann talar um nokkur hundruð þúsund eins og klink. Þótt það taki hinn venjulega verkamann nokkra mánuði að vinna fyrir þessu klinki. Ég held að þessi ráðamenn hafi ekki grænan grun hvernig það er að vera venjulegur Íslendingur í dag. Ef þið hættið ekki að mótmæla gerum við ekkert fyrir ykkur! Hvar nákvæmlega liggur lágkúran í þessum aðgerðum! Hjá þeim sem ráða eða hjá þeim sem eru ráðalausir? Er krónan kannski bara glatað fyrirbæri sem þyrfti að endurhugsa. Að minnsta kosti er eitthvað að gerast hjá yngstu kynslóðinni. Hafið þetta í huga þegar þið lesið áfram.

Fyrir fáeinum dögum var ég að kenna stærðfræði. Peningar voru aðalatriði þessarar kennslustundar. Nemendur áttu á þessari stærðfræðiblaðsíðu að teikna 18 krónur í þar til gerða buddu og reyna að nota sem fæsta peninga. Ég bjó náttúrulega til að svona sögu...þið þurfið að fara út í búð fyrir mömmu og kaupa einn lauk. Laukurinn kostar 18 krónur, setjið nú átján krónur í budduna svo þið getið borgað laukinn. Flestir gerðu þetta rétt, teiknuðu einn tíkall, einn fimmkall og þrjár krónur. Ég sá þó út undan mér að ein daman mín var að gera eitthvað annað, hún vandaði sig mikið og rétti svo stolt upp hönd þegar hún var búin. Ég fer til hennar og segi: eru þetta átján krónur? Já svarar hún stolt. Ég horfi á budduna hennar og sé engan vegin átján krónur út úr teikningunni hennar. Ég segi því útskýrðu fyrir mér?

Hún horfir stóreyg á mig og segir svo með svona "ooohhh þú ert svo vitlaus rödd". ÞETTA ER DEBETKORT!

Gula graftarkýlið.

2008-03-30T17:09:00.003Z

Ég var að bæta nýrri búð á uppáhaldslistann minn. Búðin Bryggjan eða Pier er alveg ótrúlega spennandi búð með ótrúlega miklu magni af t.d. kertum sem hægt er að þukla á og þefa. Ég endaði svo á að kaupa mér þrjú kerti, eitt blátt, eitt bleikt og eitt kerti sem er hvítt og grænt. Þetta hvíta og græna tók ég upp úr skúffunni í veikindatörninni í síðustu viku og setti í gluggann hjá mér. Það er alveg hrikalega góð lykt af kertinu. Einhver svona ávaxta, nammilykt sem ég fann rétt keiminn af í gegnum allt horið.

En sem betur fer er eitthvað farið að létta til í nefinu því þegar ég kom heim í morgun eftir nætur pössunnina angaði íbúðin af þessum eðalilmi og það var ekki einu sinni kveikt á kertinu. Mmmmm nammi nammi.

Ég fór svo að versla áðan. Rúntaði svolítið, bara svona til að halda upp á það hvað bensínið er ódýrt og kom heim rétt rúmlega fjögur. Ennþá var þessi ilmur, mér finnst svo frábært þegar ilmurinn af kisu er ekki í meirihluta í húsinu mínu.

Alla vega finnst mér þetta alveg rétti tíminn til að kveikja á kertinu. Þar fékk ég skýringu á því hvers vegna lyktin af kertinu var svona megn. Gula graftarkýlið þarna á himninum var búin að vinna af því í allan dag að bræða kertið mitt fallega yfir alla gluggakistuna, eins og grænt hor liðaðist það um sólbekkinn. Ekki að lyktin hafi verið neitt verri fyrir vikið, bara óþarfa sóun á góðu kerti. Nú hallar það ískyggilega mikið út á hægri hliðina, soldið töff!

Sendi bestu kveðjur úr vel lyktandi íbúðinni við Hverafold!

Enn einn dagurinn í eymd og volæði.

2008-03-28T18:17:00.003Z

Ég treysti mér ekki vinnuna í morgun frekar en í gær. Nú er ég farin að fá mjög svo undarlegan verk í tennurnar í bland við stinginn í eyranu. Er það ekki ávísun á eitthvað vesen í holunum í hausnum? Úfff vona það besta og bryð íbúfen eins og smarties. Ég er segja ykkur það ég hef ekki farið í ræktina síðan á miðvikudegi fyrir páska...skelfilegt.

Ég eyddi deginum undir sæng með frú Sigríði á tánum og kláraði bók sem búin er að vera alltof lengi á náttborðinu. Flugdrekahlauparinn hét hún. Æðisleg sem lýsir ömurlegum aðstæðum fólks í Afganistan. Hvaða rugl er þetta í þessu liði þarna niðurfrá? Hvers konar skepnuskapur fer þarna fram í skjóli trúarinnar? Úffff...best að segja kannski sem minnst, kannski kann einhver þeirra íslensku. Ég ráðlegg ykkur þó að lesa þessa sögu ef þið hafið ekki gert það nú þegar.

Ég vil svo senda honum karli föður mínum hamingjuóskir. Hann var heiðraður svo mikið í gær að maður svífur á pínu montskýi í dag. Hann átti þetta svo hrikalega mikið skilið. Pabbi minn er yndislegur maður sem gerir allt fyrir alla, ég reyni eftir fremsta megni að líkjast honum. Til hamingju elsku pabbi minn :)

Góðar stundir.

Að hlaupa maraþon!

2008-03-27T19:33:00.003Z

Það hefur alltaf verið draumur minn að hlaupa maraþonhlaup, 42 kílómetrar eru þó þokkaleg vegalengd, en allt er hægt ef viljinn er fyrir hendi. Stefnan er því sett á maraþon sumarið 2009. Maraþon hlaup er hlaupið að heiðra minningu dátans Feidippídesar sem hljóp frá stríðssvæðumv við Maraþon í Grikklandi til Aþenu til að segja fréttirnar af sigri Grikkja yfir Persum. Þetta var nú ekki fyrir löngu síðan, þarna um árið 490 fyrir krist. Ég get næstum staðfest það að kappinn hafi ekki hlaupið á Adidas skóm þessa vegalengd, né heldur hafi hann fengið vatn í hendurnar á vissu millibili.

Í upphafi var maraþonhlaupið fjörtíu kílómetrar og þannig var það hlaupið nokkra Olympíuleika. Því var svo breytt þegar leikarnir voru haldnir í London svo hlaupið næði frá Windsor-kastala til White City leikvangsins, þá var vegalengdin orðin 26 mílur sem eru 41.8 kílómetrar og svo 385 jördum í viðbót þannig að hlauparnir myndu skríða yfir marklínuna beint fyrir framan stúkuna hjá hefðarfólkinu. Þeir hafa verið frekir Bretarnir. Síðan þá hefur þessi vegalengd verið hlaupin 26,2 mílur eða 42.195 metrar. Merkilegt finnst ykkur ekki.

Smá skandall í sögunni varð þegar það uppgötvaðist að hlaupaleiðin í virtasta maraþon hlaupi í Boston var búin að vera 161 metrar of stutt...hahaha þvílíkur skandall.

Það er kannski ekki eins ég stefni á að setja heimsmet, en heimsmet í kvennaflokki á Catherine Ndereba frá Kenya á tímanum 2:18:47. Meira svona að geta sagt sjáðu Reykjavík, þarna hinum megin er Selfoss, þangað hljóp ég....! Gott markmið.

Frábær!

2008-03-27T11:40:00.003Z

Ég tók þetta próf áðan og finnst niðurstaðan svo frábær að ég ákvað að setja hana hérna inn :) (come on ég er lasin og mér leiðist )

Frábær!
Þú ert einstaklega vel heppnað eintak mannsbarn! Þú metur fólk af verðleikum og kemur svo sannarlega til dyranna eins og þú ert klædd! Þú ert skemmtileg og gaman að umgangast þig, tala við þig og vera vinur þinn eða maki! Þú ert klár og ert að gera góða hluti í lífinu!!

Monika

2008-03-27T10:54:00.002Z

Chelsea Clinton, dóttir Hillary Clinton, sem berst fyrir því að verða forsetaframbjóðandi bandarískra demókrata, neitaði að svara spurningu frá nemanda í háskólanum í Butler, Indiana í Bandaríkjunum, er tengdist Monicu Lewinsky.

Spáið í því, pabbinn gat ekki stjórnað sínum litla manni og fyrir vikið þarf stelpugreyið að svara spurningum um þessa ósjálfsstjórn hjá karli föður sínum. Hvernig ætti hún að svara spurningum um þetta? Var hún ekki bara rétt tíu ára þegar þetta gengur yfir? Ég samdi fyrir hana þetta svar og vona að hún geti notað sér það.

Sko þegar pabbi var að vinna sem forseti var hann einu sinni að labba á skrifstofunni sinni og þá liggur allt í einu einhver stelpa á gólfinu. Pabbi hélt náttúrulega að hún væri lasin og fór að reyna að hjálpa henni. Hún var í svona skyrtu sem var svo hátt upp í hálsinn að pabbi ákvað að hneppa aðeins frá svo hún ætti auðveldara með að anda. Svo mundi hann allt í einu eftir svona munn við munn aðferð sem hjálpar fólki sem á erfitt með að anda. Svo hann gerði það og þá leið stelpunni allt í einu mikið betur. Hún var svo glöð yfir að pabbi hefði hjálpað henni að hún var bara að kyssa hann fyrir, allar stelpur gera það þegar einhver hefur bjargað lífi þeirra. Pabbi gerði ekkert vitlaust, ekki hefði hann átt að banna stelpunni að þakka fyrir sig?

Góðar stundir.

Í enn einni ástarsorginni

2008-03-26T18:50:00.002Z

Ég skal segja ykkur það að enn ein ástarsorgin hefur knúið dyra. Satt að segja er ég orðin langþreytt á þessu endalausa áreiti og veit ekki hversu oft ég ræð við svona átök í viðbót.

Þetta er náttúrulega mér að kenna. Ég vissi þegar ég leit til hans að hann væri utan seilingar. Svo myndarlegur, svo stæðilegur og það versta af öllu, svo lofaður. Ég lét samt tilleiðast og leyfði honum að umvefja mig með hljóðlátu murri. Þið getið rétt ímyndað hversu yndislegt það var. Algerlega ný reynsla, hann hreinlega sópaði mér af fótunum svo ég sveif ástfanginn á bleiku skýi.

En þetta var stutt gaman. Ég skilaði honum aftur. Hann krafðist of mikils af mér. Átti ég að fara að breyta mínu lífi til að geta þóknast honum og hans stóru kröfum. Maður á ekki að gera sér dælt við aðra lofaða....!

Ég kom út í morgun, með hor í nös. Ég settist inn í gamla fallega rauða bílinn minn. Kannski var ég undir niðri ekkert tilbúin til að skila þeim gamla og kaupa nýjan. Jafnvel þó sá nýji sé mun stæðilegri.

Góðar stundir.

Ég gerði óformlega könnun

2008-03-25T20:31:00.002Z

...og komst af því að fólkið í kringum mig þekkir bæði forseta Íslands og Hómer Simpson. Alveg stórmerkileg uppgötvun finnst ykkur ekki. Fleiri Bretar þekkja Harry Potter frekar en Tony Blair, merkilegt alveg hreint. Ætli ástæðan sé ekki sú að Tony gamli er horfin af sjónarsviðinu.

Ég fór í vinnuna í dag og reyndi að gera eitthvað gagn þar. Ég er að segja ykkur það að ég er gjörsamlega að kafna úr hor. Ég fann ekki lyktina af fiskinum sem ég eldaði í kvöld, ég fann heldur ekki bragðið af honum og ég sá hann varla heldur, hann hefði getað gelt á disknum líka því það eru engar líkur að ég hefði heyrt það heldur. Það er hreinlega öll skynjun að kafna í hori. Talandi um að fá tvöfaldan í kók.

Hnerrar dagsins nálgast eitt hundrað, snýtur dagsins nálgast eitt hundrað. Aumingjavæl dagsins nálgast fimmtíu og gott ef hitinn er ekki komin vel yfir 38. Andskotans djöfull....ég verð að vera orðin hress á föstudaginn því þá ætla ég að detta feitt í það.

Góðar....atsjú.....stundir!

Kakkalakkafaraldurshætta

2008-03-24T13:57:00.002Z

...þessi fyrirsögn hefur nákvæmlega ekkert með innihald þessarar færslu að gera, mér fannst þetta bara svo fyndin fyrirsögn. Ég sver það páskarnir búnir og ég sit hér í eymd og aumingjaskap með hor niður á höku og suð í eyrunum. Það ætti hreinlega að sleppa öllum fríum í skólanum fyrir mig því ég verð alltaf lasin í fríum, alveg ömurlegt.

Svo er bara vinnudagur á morgun. 25 mars á morgun svo það er innan við mánuður þangað til ég fer til Svíþjóðar og Dannmerkur. Sex vikur í Hvannadalshnjúk. Svo eru rétt rúmlega tveir mánuðir þangað til ég kemst í eyjuna mína. Rétt rúmlega þrír mánuðir í Hornstrandir. Já sumarið er bara handan við hornið, alveg sama hvað Soffía veðurfræðingur segir það er vor í lofti.

Trúin flytur fjöll er málshátturinn minn þetta árið. Heppilegur málsháttur á þessum tíma og segir mér að rétt ákvörðun hafi verið tekin, þetta passar of vel til að geta verið tilviljun. Ekkert nema gott um það að segja.

Í dag á ég fermingarafmæli, en ég fermdist akkúrat á þessum degi 24. mars árið 1990 (er það ekki örugglega). Í dag á líka hún Aðalheiður vinkona mín afmæli. Góður dagur. Góður dagur.

Góðar stundir.

Nokkrir punktar!

2008-03-17T23:21:00.002Z

Ég er í páskafríi. Fínt að fá svona tíma til að hlaða batteríin.

Byrjaði þennan mánudagsmorgun eins og alla aðra með því að fara í ræktina klukkan sex. Ívar ekki komin í páskafrí þó allir aðrir hafi sofið á sínu græna eyra í morgun. Geggjað að koma svo heim klukkan rúmlega átta og fara bara aftur að sofa. Ég vaknaði svo ofurhress einhverjum tímum seinna og fór í sundskýluleiðangur með litlu frændum mínum sem eru að fara til Kanarí í fyrramálið.

Þegar þurrkarinn flutti í Bólstaðarhlíðina varð skyndilega pláss í geymslunni hjá mér. I have been given the gift of space! Ég tók til í geymslunni seinnipartinn í dag og svei mér þá ef ekki er hægt að skipta um skoðun þar inni núna. Fór nokkrar ferðir í ruslið og eina nokkuð þunga göngu í blaðagáminn á kantinum. Blöð sem báru fréttir frá árinu 2007....en við tölum nú ekkert frekar um það.

Ég heimsótti svo Ingveldi og nýjasta vinkonu-afleggjarann. Afskaplega fallegan og svipmikinn Andrason. Alveg yndislegt að geta knúsast með svona glænýtt barn.

Ég fór svo í sund og horfði á alla fallegu kroppana þar. Líka þennan ofurmyndarlega sem ég sá í speglinum...hehehe!!! Fór svo að borða á Vegamótum og ég skal segja ykkur það að þegar ég kom þaðan frá var ég búin að fá sekt á bílinn, fyrir að hafa lagt ólöglega. Ekki vissi ég að svona verðir væru að skrifa út sektir klukkan hálf tíu að kvöldi til. En rétt skal vera rétt og þegar ég kíkti í kringum mig var víst eitthvað skilti þarna upp á einum ljósastaurnum sem sagði bannað að leggja. En allir hinir löggðu þarna líka og hvergi var sekt nema á mér. Stöðumælavörðurinn stendur stóð sig vel í kvöld. Ég mun borga sektina þegar dagar.

Ætla að skreppa í Reykjanesbæ í fyrramálið og máta aðeins svona þrekmeistaraþraut, maður veit ekki nema prófa.

Góðar stundir.

Kennara dæmdar bætur.

2008-03-16T21:10:00.002Z

Það er hiti í bloggheimum vegna þess dóms sem féll fyrir helgi, þar sem forráðamönnum barns er gert að borga kennara tíu miljónir í skaðabætur fyrir skaða sem barnið olli kennaranum í kennslustofunni. Ég er að segja ykkur að á einni bloggsíðu var búið að setja fram þá hugmynd að foreldrar ættu að halda börnunum heima til að mótmæla dómnum, mótmæla því að barn þurfi að svara fyrir það að hafa valdið kennara örorku. Á mannamáli barnið mitt kemur ekki í skólann fyrr en það er á hreinu að það megi ganga í skrokk á kennaranum án þess að þurfa að taka ábyrgð á því.

Ég er mikið búin að velta þessu fyrir mér og finnst alveg með ólíkindum hvaða orð fólk getur notað um kennarann. Fólk er alveg brjálað út í kennarann fyrir að hafa vogað sér að leggja fram kæru. Á einni bloggsíðu segir: þessi kennari ætti aldrei að fá að umgangast börn framar! Á annarri segir; foreldrarnir ættu nú bara að kæra kennarann fyrir að hafa ekki haldið aga í bekknum!

Satt að segja er ég pínu skelkuð. Til að byrja með komst ég af því að ég er ekki tryggð í vinnunni minni. Ef ég myndi detta á ganginum í skólanum og meiða mig væri ég tryggð fyrir því en ef eitthvað barn í æðiskasti myndi valda mér skaða væri ég ótryggð. Hvernig í ósköpunum má það vera? Hvaða skilaboð sendir þetta nemendum og foreldrum? Hvernig endar þetta eiginlega, ætla foreldrar að fría sig allri ábyrgð á uppeldi barna sinna?

Eitt er víst að ég ætla að hringja í mitt tryggingafélag eftir helgi og forvitnast um það hversu mikið það kostar mig að tryggja mig fyrir nemendum mínum því aldrei myndi ég sætta mig við skaða jafnvel þótt barn eigi í hlut.

Mynduð þið sætta ykkur við það?

Ekki æfa yfir þig!

2008-03-11T20:52:00.003Z

ÉG fór á æfingu í gærmorgun, reyndi á brjóst og bakvöðva. Seinnipartinn ákvað ég að fara út að skokka í blíðunni sem var þá. Skokkaði heila tíu kílómetra á góðum hraða án þess að stoppa. Bara nokkuð sátt miðað við aldur og fyrri störf.

Ég fór svo aftur á æfingu í morgun. Fór reyndar bara í brennslu, svona tuttugu, tuttugu, tuttugu. Seinnipartinn var ennþá svo gott veður að ég ákvað að fara aftur út að skokka. Reyndar ekki nema einhverja svona sex til sjö kílómetra, það er nú bara einu sinni þriðjudagur.

En ástæðan fyrir því að ég er að skrifa þetta er sú að í blíðunni núna seinnipartinn hljóp ég í gegnum Bryggjuhverfið. Þetta undarlega hverfi sem lítur út fyrir að hafa verið byggt úr lego-kubbum. Litirnir á húsunum eru flestir þannig að þeir myndu sóma sér vel í nærbuxnaskúffu, allt eitthvað svona lilla litað. En það sem mér finnst svo magnað við þetta eitt dýrasta hverfi í Reykjavík er hversu ljótt umhverfið þarna er. Kannski ef þú býrð í kubbahúsinu sem er beint fyrir framan smábátahöfnina gæti þetta sloppið en allt hitt er bara ljótt. Gámahöfnin þarna hjá Samskip er að mínu áliti ljótt útsýni, svo ég tali nú ekki um malarverksmiðjuna og vörubílana sem henni fylgja, æðislegt að hafa tuttugu metra háan sandskafl fyrir utan gluggann hjá sér sérstaklega þegar það er rok :)

Í hverfinu er engin skóli. Í hverfinu er engin búð. Í hverfinu er önnur af tveimur aðkomuleiðum þannig að fólk á litlum bílum eiga á hættu að skemma bílana. Það er fínt að hlaupa þarna í gegn, en jesús minn hvað ég myndi ekki vilja búa þarna...og hana nú!!

Ætla að fara að æfa klukkan sex í fyrramálið og hver veit nema Laugaskokk verði massað seinnipartinn :)

Góðar stundir.

Fjarstýringin

2008-03-09T01:17:00.002Z

Hún hreinlega tókst á loft þegar ég stökk með látum upp úr sófanum í vikunni. Stýringin lendir á gólfinu og takkarnir þeytast um öll gólf. Eitthvað var tökkunum farið að fækka því þetta var ekki í fyrsta sinn sem svona flugferð á sér stað. Eftir að hafa skriðið um gólf og ýtt til húsgögnum varð niðurstaðan sú að fjarstýringuna vantar nú 13 takka. Það verður sífellt erfiðara að púsla þeim á stýringu með þeim hætti að ekkert af mikilvægu tökkunum séu ónothæfir. Ég ákvað því eftir að hafa fundið nokkuð góða uppröðun á tökkunum að líma fjarstýringuna saman. Fyrst með fljótandi UHU lími og vafði svo nokkra hringi utan um það með límbandi. Eftir þetta var ég nokkuð sátt. Ég settist í sófann og tók bókina mína upp af borðinu og sá mér til mikillar mæðu að undir henni voru sex takkar.

Hvernig á ég að koma þeim inn í stýringuna?

Hárblásarar

2008-03-04T18:47:00.002Z

Ég heyrði því fleygt að í sundlaugum Reykjavíkur kæmi einhleypir saman í leit að öðrum einhleypum snillingum. Af þeirri ástæðu og einnig þeirri að ég var að reyna að mýkja upp á mér bakið skellti ég mér í Laugardalslaugina í gærkvöldi. Ég get svo sem ekki sagt að ég hafi séð mikið af þessum sætu einhleypu sem áttu að vera í lauginni, þó náttúrlega fyrir utan sjálfa mig. Mjög fáir töluðu líka íslensku og flestir voru í hallærislegum sundskýlum....það er eitthvað með þessar gamaldags speedo sem ekki gengur upp.

En jæja eftir góðan klukkutíma í heita vatninu fór í klefann, byrjaði á að fara á salernið. Þegar ég kem út af básnum blasa við mér fjórir stórir speglar og fyrir framan þá meðal annars tveir hárblásarar. Á speglinum fyrir ofan þá var búið að setja upp smá auglýsingu. Það sem á henni stóð olli mér miklum vangaveltum. Þar stóð þessi orðsending:

"Athugið: hárþurrkurnar eru einungis ætlaðar til að þurrka hár"

Mér er spurn? Fyrst starfsfólkið sá ástæðu til þess að setja upp þessa auglýsingu er greinilegt að hárþurrkurnar hafa verið misnotaðar við eitthvað annað oftar en einu sinni, ég er bara svo ótrúlega óhugmyndsnauð að mér hafa ekki dottið neinar aðrar brúkunaraðferðir í hug. Dettur ykkur eitthvað í hug? Ekki þurfa konur nú til að dags að nota hárþurrkur til að þurrka undirvagninn? Ég skil þetta bara ekki.

Litlir molar

2008-03-01T15:39:00.002Z

Ég veit ég veit að ég hef ekki verið að standa mig. Ég hef bara haft svo mikið að gera...ég veit líka að það er léleg afsökun fyrir ykkur tryggu lesendur sem kíkið hér inn daglega og ekkert gerist.

Molarnir eru nokkrir. Kannski það helsta að ég er búin að eldast um eitt ár síðan ég skrifaði hér síðast. Skvísan orðin 31 árs og bókstaflega aldrei verið hressari. Ekki var þó mikið gert á þessum merkisdegi.

Ég fór á Nasa til að fagna nýja júróvisíon laginu, það var ekki leiðinlegt, frekar svona sveitt þegar líða tók á og frekar svona mikið sárir fætur daginn eftir.

Foreldradagur í vikunni var það sem helst orsakaði þetta bloggleysi, þeir dagar taka alltaf verulega mikið á. En auðvitað ekkert til að hafa áhyggjur af þegar svona vel gengur.

Merkilegast er þó sú staðreynd að 25.febrúar er hlaupársdagur, vissuð þið það? Vísindamenn voru nefnilega að reikna það út að til að útreikningar gangi upp verði dagurinn sem bætist við að vera 25. febrúar, þá óhjákvæmilega verði 29 dagar í febrúar. en þessi 29 sé ekki hinn raunverulegi hlaupársdagur heldur aðeins afleiðing af þessum breytingum. Ég gleðst við þessar fréttir og get því sagt án þess að ljúga að í ár sé ég rétt rúmlega fimm ára gömul....þarna kom skýringin :)

Góðar stundir!!!

Frú Sigríður

2008-02-19T21:52:00.002Z

Frú Sigríður sem nota bene er KÖTTUR situr sjaldan auðum höndum. Myndi líklega vera á ritalíni ef manneskja væri. Ýmis afrek hefur hún unnið, hefur satt að segja unnið nokkur þeirra síðustu daga.

Það fyrsta: Frú Sigríður ákvað að máta handtöskuna mína sem hékk ásamt nokkrum öðrum töskum á litlum sætum plastsnaga í fatahenginu. Snaginn var greinilega ekki gerður fyrir fjórar töskur og kött svo hann hrundi niður og töskurnar með köttinn innanborðs lentu í einni hrúgu á gólfinu. Hafa skal í huga að þessar æfingar framkvæmdi frú Sigríður um klukkan þrjú um nótt svo heimasætan vaknaði með andfælum.

Það næsta: Frú Sigríður brenndi sig á hægra framfæti þegar hún steig á heita hellu á eldavélinni. Auðvitað gerði hún það þegar hún ætlaði að lauma blautu trýninu í salatið sem ég var búin að útbúa mér í kvöldmat. Kannski mátulegt á hana.

Það þriðja: Frú Sigríður var að príla inni í þvottahúsi. Ég var frammi að hengja upp. Þegar ég lauk því henti ég þvottakörfunni á gólfið inni í þvottahúsi, slökkti ljósið og lokaði svo hurðinni. Ekki meðvituð um að frú Sigríður væri þar inni. Eftir smá stund heyrist þvílíkur skarkali og læti og svo dettur greinilega eitthvað í gólfið. Ég fer og opna hurðina og út kemurinn kötturinn skíthræddur. Ég kveiki ljósið og sé mér til mikillar hrellingar að þvottaefnispakkinn minn liggur á gólfinu og það er þvottaefni út um allt. Æðislegt.

Fleiri afrek súperkattarins frú Sigríðar munu verða skrásett síðar.

Góðar stundir.

Helgin heima

2008-02-17T16:50:00.002Z

Ég tók frábæra ákvörðun á föstudaginn. Ákvörðunin hljóðaði svona. Þessa helgi ætla ég að vera heima og gera nákvæmlega ekki neitt.

Hér fáið þið að heyra um þessa frábæru helgi mína. Á laugardaginn svaf ég út, ætlaði að vakna klukkan hálf tíu og fara í Laugaskokk en ákvað þegar klukkan hringdi að ég gæti allt eins farið að skokka seinna um daginn. Ég vann svo alveg ótrúlega vel frá 11 til 3, ég veit ég er í vetrarfríi en svona er bara þetta kennarastarf. Ég fór svo í ræktina og fór tækin fjögur 20+20+20+20=80 mínútur, ágætis líkamsrækt. Eftir sturtu rauk ég beint heim og bjó til alveg sjúklega góða pitsu með fetaosti og alles. Svo tók við frábær kvöldstund með hinum ýmsu konum og körlum sem hafa það að atvinnu að stunda "leikingar" aka leikarar.

Fór að sofa eftir dúk og disk, svaf eins og miðaldra steinhella fram eftir morgni, þreif hjá mér og gekk frá þvottinum sem ég nennti ekki að ganga frá í gær...en því segi ég náttúrulega engum frá.

Árangur vetrarfríssins og helgarinnar er þessi, ný aukahefti og kannanir fyrir Einingu 4. Fullt af stærðfræðiefni fyrir áhugastærðfræðisvæðið í skólanum. Allar fimm dvd myndirnar sem ég fékk lánaðar hjá Sigrúnu frænku. Daður á facebook, og spjall á msn.

Alveg fullkomin helgi finnst ykkur ekki :)

Bloggleiði/leti/

2008-02-16T12:05:00.002Z

...og einhver fleiri orð sem afsaka það að ég nenni ekki að blogga. Það er ekki eins og ég hafi frá nógu að segja. Ég er í vetrarfríi sem reyndar núna er orðið að helgarfríi.

Það er að fjölga um einn í bekknum mínum svo talsverður hluti af vetrarfríinu góða fór í skipuleggja það. Þá er ég aftur orðin með tuttugu orma.

Ég þarf að ganga frá öllum þvottinum sem ég er búin að þvo síðustu daga. Ég setti hann á rúmið mitt áðan þannig að ég get ekki farið að sofa í kvöld nema vera búin að ganga frá honum.

Ég þarf líka að koma mér úr náttfötunum og í ræktina. Ég er með hor í nös og er búin að telja mér trú að þegar slíkt hendir mann sé best að liggja bara undir teppi með dvd og tölvuna á hnjánum. Allt saman hinn mesti misskilningur.

...eftir lestur þessarar færslu munið þið einnig þjást af bloggleti eða leiða.

69.797

2008-02-11T21:21:00.000Z

Þannig stendur teljarinn, hver skyldi verða númer 70.000!

Bjór og kvöldstund í boði fyrir þann heppna!

Árshátíð

2008-02-09T18:55:00.000Z

Raggi gamli Bjarna fór á kostum í gærkvöldi í storminum í Gullhömrum. Árshátíðin var bara nokkuð skemmtileg. Selfoss er...var lag kvöldsins. Allt of háir hælar voru ein mistök kvöldsins. Jarðaber og rófur með súkkulaði voru brandari kvöldsins. Apótekið voru önnur mistök kvöldsins. Aðeins allt of mikið áfengi voru þó þegar upp var risið í morgun stærstu mistök kvöldsins.

Í dag er ég búin að borða eina pitsu, drekka líter af kók, borða hálfan poka af nammi, einn snakkpoka...já er búin að vera alveg hrikalega óþekk.

Raggi Bjarna var samt góður í félagsskap okkar Kollu. Góðar stundir.

Ný klipping og pungatal

2008-02-07T19:51:00.001Z

Fór í klippingu í dag er bara nokkuð sátt við kollinn, kemur í ljós hvort ég verð ennþá sátt á morgun. Fínt að fara svona í klippingu korter fyrir árshátíð, þá verður maður eitthvað svo ægilega fínn eitthvað.

En yfir á punginn! Þar sem ég hafði verið sleginn í fótinn í stað tunnurnar í gærdag ákvað ég að skella mér í sund seinnipartinn, aðeins að hvíla fæturna frá Laugum þennan seinnipartinn. Eftir að hafa synt einhverjar margar ferðir fór ég svo í pottinn. Eftir smá stund þar koma þrír miðaldra menn í pottinn. Einn sem leit út fyrir að vera að minnsta kosti fimmtugur en hagaði sér eins og unglingur. Einn með yfirvaraskegg eins og þýskur klámmyndaleikari og einn svona nokkuð eðlilegur maður á sextugsaldri. Ég var að nudda á mér bakið með stútunum þarna í pottinum og þóttist ekki vera að hlusta en auðvitað hlustaði með fullri athygli. Þeir slógu um sig þarna sérstaklega hrukkótti unglingurinn. Mér skildist fljótlega á tali þeirra að þeir væru allir bílasalar og oj hvað þeir töluðu illa um kellingar sem vissu ekkert í sinn haus. Hrukkótti unglingurinn sagði: ég skal nú bara segja það að síðan ég skilaði gömlu kellingunni (..og já það er viljandi að ég skrifa kellingar svona svo það er óþarfi að leiðrétta það...bara til vonar og vara) hefur sko ekki verið eldað neitt ógeðis saltkjöt á mínu heimili. Það sama er að segja um þennan ógeðslega myglaða ógeðis þorramat, hann kemur sko ekki nálægt mér, enda er sú nýja ekki fyrir neina punga nema punginn á mér!!!!

Hahaha hvaða ógeðismaður segir svona setningar í almenningssundlaug með fullt af börnum í kringum sig. Það varð líka þögn í pottinum eftir að hann tjáði sig með þetta. Fyndið! Rétt seinna fór hrukkótti unglingurinn upp úr pottinum, átti sennilega erfitt uppdráttar eftir þennan sannleika. Ég sver það gaurinn var ekki komin nema tíu metra frá pottinum þegar félagar hans fóru að baktala hann...spurning hvort það er ljótara þetta með punginn eða þetta með baktalið!!!

Já það er skemmtilegt að fara í sund!

Hómer fór í skólann!

2008-02-06T20:31:00.000Z

Öskudagur eða öskurdagur eins og ég kýs að kalla hann, hvað skyldu vera margir svoleiðis dagar á hverju ári? Ég fór í skólann í Hómer búning, mér finnst þetta alltaf skemmtilegir dagar og þessi var engin undantekning. Við vorum reyndar einn af fáum skólum í höfuðborginni sem gáfu nemendum okkar ekki frí í dag. Við fórum með allt liðið í rútu í bíó í Smáranum þar sem allir fengu popp og kók. Mér fannst það alveg ótrúlegt að sjá hvernig Smáralindin fylltist af nammisjúkum eftirlitslausum börnum upp úr klukkan tíu sérstaklega þar sem búðirnar í Smáralindinni opna ekki fyrr en klukkan ellefu. Það var bara eins og börnunum hafi verið droppað þarna um leið og foreldrarnir fóru í vinnuna. Hvergi var öskupoka að sjá enda búið að gera þennan alíslenska öskudag að eftirhermu Halloween í henni Ameríku....synd! Hvað er spennandi við að safna sveittu nammi í stóran plastpoka?

Helstu afrek dagsins voru þau að vera lamin í fótinn með lurkinum stóra sem hitti ekki á tunnuna (eða kassann). Úfff þá var nú gott að vera með Hómer grímu svo engin gæti séð hvað ég meiddi mig mikið.

...ekki meira að sinni. Næsta færsla mun fjalla um ferð mína í Grafarvogslaugina fyrr í kvöld og pungatalið sem ég heyrði þar :) Verið spennt, verið mjög spennt!

Bolludagur

2008-02-04T21:40:00.000Z

Hvernig stendur á því að mitt í allri þessari umræðu um fordóma og sjúkdóma fái dagur eins og bolludagur að standa óbreyttur. Ef það að ræða um andlegt ástand borgarstjóra er tabú (athugið þó að ég er sammála því að þar hafi verið skotið vel yfir markið), það sama er að segja um reykingarmennina sem við hin virðumst vera að leggja í einelti með því að skipa þeim út að reykja. Hvers vegna má þá leggja svona einn hóp í samfélaginu í einelti án þess að allt verði vitlaust.

Að halda upp á bolludag er ljótt, að öll þjóðin haldi upp á það að bollur séu til. Það næsta sem maður veit er það við fögnum hengilmænudeginum. Áður en við vitum af munu feministar setja út á messurnar tvær Jónsmessu og Þorláksmessu, svo við tölum nú ekki um Þorran.

Alla vega óska ég öllum bollum innilega til hamingju með daginn!!!!

Saga

2008-01-31T21:56:00.000Z

Ég gekk í átt að Laugum núna seinnipartinn, lagði bílnum náttúrulega óralangt í burtu. Þetta var ísköld ganga, hífandi rok og smá snjófjúk. Allt í einu sé ég hvar einhver svartur hlutur kemur fjúkandi á móti mér. Ég hugsa Æ Æ það hefur einhver misst vettling. Ég beygi mig niður og tek hann upp og hugsa mér að setja hann inn í anddyrið á Laugum þar sem eigandinn gæti vitjað hans, miskunnsami samherjinn að verki. Það var kalt og ég var ekki mikið að skoða það sem ég hélt á í höndinni heldur hljóp við fót inn í anddyri. Þegar þangað var komið kannaði ég betur farminn. Og já ég skal segja ykkur það, þarna í anddyrinu á World Class, þar sem miljón manns horfðu á hélt ég á einhvers annars manns - NÆRBUXUM!!!! oj

Sem betur fer var ég með vettlinga.

Ég hugsaði...

2008-01-28T20:01:00.000Z

...mig langar til að henda mér á mjúkt ský og sjá hvað gerist, myndi ég detta í gegnum það eða fá mýkstu lendingu sem hægt er að hugsa sér?

...mig langar að fleygja mér í haug af sápukúlum, hvernig skyldi vera að lenda í þeim, myndu kúlurnar draga úr fallinu?

...mig langar líka að hoppa inn herbergi fullt af litlum mjúkum boltum, svona eins og er í Ikea, ég myndi svo liggja á bakinu og baða út öllum öngum, hendandi litlum boltum í allar áttir. En ég veit að mér yrði ekki hleypt í barnalandið í Ikea.

...mest langar mig samt að fleygja mér í mjúkan karlmannsfaðm, því ég veit að hann myndi ekki gefa eftir.

Góðar stundir.

STuttur fyrirvari = Gott djamm

2008-01-27T21:31:00.000Z

Það var seint á miðvikudagskvöld sem hugmyndin kom upp. Á fimmtudagsmorgun var hringt og viti menn, ég og Sandra fengum miða á Selfoss þorrablótið sem búið var að vera uppselt á í nokkrar vikur. Ég hef oft hugsað um að fara á þessa skemmtun sem KB sjálfur kom á fót en í gær varð að því.

Í stuttu máli þá skal kvöldinu lýst með þessu orði: Hrikalegaskemmtilegt. Margt markvert gerðist og ég hitti fullt af fólki sem ég hef ekki séð lengi. Svona var þetta nokkurn veginn.

- Þorramaturinn var skemmdur eins og þorramatur er alltaf. Harðfiskurinn var góður og smjörið mjúkt.

- Borðvínið var undir borði og smakkaðist sérstaklega vel. Breezer half sugar er nýja uppáhaldið mitt.

- 18 ára gömul vanlíðan var rædd út og niðurstaðan var sú að þetta var allt saman einn stór og langur misskilningur.

- Þetta sagði einn um mig: Þú ert alltaf svo yndisleg, falleg og skynsöm stúlka, úfff maður roðnar nú bara við svona athugasemdir.

- Ekki einn, ekki tveir, ekki þrír heldur fjórir þurftu að koma því á framfæri við mig að ég væri alveg fáránlega lík Björk. Ég fór að hlægja í öll skiptin og sagði, varstu að lesa bloggið mitt? Allt fólkið svaraði eins, ha! ertu með bloggsíðu? Ég tel því að ég verði að fara að sætta mig við það að vera tvífari Björk, skyldi ég ekki geta fengið einhverjar sporslur út á það?

- Hvannadalshnjúkur 16. apríl, ætti maður að þora?

Takk fyrir Selfoss, yfir og út!

Ekki ganga yfir þig!!!

2008-01-23T22:33:00.000Z

Ég fór í Laugar áðan, kom náttúruelga á versta tíma þarna um fimm svo engin bílastæði voru í nálægð við innganginn. Samt vonar maður alltaf að það sé laust stæði einhvers staðar nálægt og keyrir þar af leiðandi alltaf í gegnum stæðið sem er næst. Þá sé ég mér til mikillar gleði að ung kona kemur gangandi að bíl sem er sennilega í besta stæðinu við húsið og setur hann í gang. Ég náttúrulega stoppa og set stefnuljós og hugsa mér gott til glóðarinnar að leggja þarna og þurfa bara að labba 30 skref til að vera komin inn. Ég hendi mér inn í stæðið og sé mér til mikillar skelfingar að þetta stæði var ætlað fyrir fatlaða. Ég setti auðvitað í bakkgír og bakkaði út úr því enda engin ástæða fyrir mig að leggja þarna með tvær heilar fætur og haus í lagi. Gellan sem lagt hafði þarna á undan mér var greinilega eitthvað fötluð í hausnum og taldi sig þess vegna hafa leyfi til að leggja þarna.

Ég lagði því óralangt í burtu og labbaði í slabbinu og snjókomunni heim að Laugum. Þegar ég labbaði fram hjá fatlaða stæðinu var einhver annar búin að leggja í það, annar Yaris sem átti alveg örugglega ekki rétt á því að leggja þarna heldur.

Það er náttúrulega alveg hrikalega fyndið að þetta ofurhrausta fólk sem þarna kemur þurfi að leggja í stæði sem ætluð eru fyrir fatlaða, eða uppi á gangstéttum eða hreinlega á götunni bara til að spara sér nokkur skref svona rétt áður en það fer í ræktina. Minnir mig á heilsuræktina sem ég sá einu sinni í Ameríku en þar voru rúllustigar upp að húsinu....! Hvað er það?

Ég hef því ákveðið að leggja framvegis sem lengst frá innganginum og fá extra hreyfingu út úr því að labba inn :)

Góðar stundir.

Nýja árið

2008-01-17T21:06:00.001Z

Finnst ykkur ekki geggjað þegar það er allt á kafi í snjó. Ég er að fara í bústað um helgina með stelpunum mínum og hlakka mikið til, það verður ábyggilega sjúklega gaman. Fór í ríkið áðan og keypti fyrir heilar 5000 krónur, held hreinlega að ég hafi aldrei keypt fyrir svo mikið. Nema kannski fyrir einstaka þjóðhátíð.

Haldið þið ekki að ég hafi hlaupið tíu kílómetra tvisvar sinnum í þessari viku. Í blíðskaparveðri síðasta laugardag og svo í brjáluðum snjó og ofankomu í gærkvöldi. Ég skal alveg viðurkenna að ég átti ekki mikið eftir á orkutanknum á seinni kílómetrunum í gær, sérstaklega eftir að hafa lyft um morguninn líka. Maður sér alveg fram á það að geta komist þennan 21 kílómeter sem stefnt er að í ágúst með þessu áframhaldi. Eða hvað?

Ég fékk glaðning í póstkassann minn í dag með þvílíku gylliboði, gott ef maður lætur sig ekki hafa það og gengur að þessu góða boði. Er maður spenntur, eða spenntur?

Hvenær er ég búin?

2008-01-13T21:44:00.000Z

Í skólanum á föstudaginn sagði ég við nemendur mína. Alltaf þegar þið klárið blaðsíðu megið þið koma hérna upp að töflu og teikna einn broskarl, í lok tímans skulum við svo telja saman broskarlana og sjá hvað þið gátuð reiknað margar blaðsíður. Um leið og ég sleppi síðasta orðinu, stendur einn nemandi minn upp og gengur að töflunni og teiknar á hana broskarl. Ég náttúrulega segi ertu búin með eina blaðsíðu. Hann horfir á mig lítill, bláeygur, með hor í nös og stórt bros og segir já ég var svo heppinn að það var bara eitt dæmi eftir svo ég var fljótur að klára eina blaðsíðu.

Ég skal alveg viðurkenna að þetta var ekki alveg það sem ég hafði í huga en það gerist ekki einlægara en þetta. Auðvitað var barnið að klára blaðsíðu þótt það hefði bara gert eitt dæmi á henni.

Ég átti alveg hrikalega góða helgi. Byrjaði á því að hlaupa tíu kílómetra á laugardagsmorgun og er alveg hrikalega stolt af því. Ég kíkti svo aðeins á útsölur við annan mann, heimsótti fólk, fór aðeins á rúntinn, vann helling í tölvunni, þvoði þvott, ryksugaði og svo framvegis. Allt saman alveg hrikalega uppbyggilegt.

Að lokum: það skiptir ekki máli hversu lengi þú dveldur á blaðsíðunni heldur það að þú náir að klára hana með bros á vör.

Annáll 1. hluti.

2008-01-10T17:15:00.000Z

Fyrsti hluti af annál ársins, svona eitthvað af því merkilega sem vert er að segja frá árinu 2007.

Fjölskyldumeðlimur ársins: ég verð eiginlega að segja frænkur mínar. Við sautján sem allar erum afkomendur ömmu dúllu og Bjarna afa ákváðum að hittast saman í fyrsta sinn í lok árs. Það var virkilega gaman að hitta allar þessar frábæru stelpur sem maður hefur ekki fengið nógu gott tækifæri til að kynnast fyrr en nú. Ég hlakka bara til og kýs því þessar sautján sem fjölskyldumeðlimi ársins, ég vona að þetta sé bara byrjunin á einhverju betra og stærra.

Barn ársins: Það fæddust fullt af börnum tengdum mér á þessu ári. Það mikilvægasta og fallegasta er án vafa litli ljósgeislinn hún Unnur Birna bróðurdóttur mín. Draumabarn í alla staði með fallegt bros og björt blá augu. Ég fékk að vera skírnarvottur hjá henni sem mér þótti mikill heiður og mun byrja að miðla visku minni til hennar um leið og hún fer að hafa vit til. Þangað til knúsast ég bara í henni. Svo átti Gugga besta vinkonu mín líka lítinn unga, sem gefið var nafnið Dagný Guðmunda, það barn fær að eiga vinstri gáttina í hjarta mínu. Önnur börn sem fæddust árið 2007 heita Mattías, Helga, Særún, Stormur, Tryggvi, Róbert og svo fæddist ein frænka í Garðinum í árslok.

Fullt af börnum eru svo á leiðinni svo næsta ár verður líka feikilega gjöfult. Til dæmis er Gunna systir ófrísk, Ingveldur vinkona mína, Hanna Fríða frænka mín, Inga Dóra frænka mín, Unndís Ósk frænka mín og á vissan hátt Sigrún frænka mín. Allt saman mjög spennandi og vil ég benda þessu fólki að nöfnin Jana og Janus er feikifalleg 

Vinur ársins: það er erfitt að ákveða að einn vinur sé betri en annar. Allir vinir mínir eru mér mikilvægir og hafa reynst mér vel á mismunandi tímum á þessu ári. Ég verð þó að nefna Sex and the city gengið, Carrie, Samantha, Charlotte og sjálfa mig Miröndu. Þið eruð mér sem fyrr afskaplega mikilvægar kæru vinkonur og hef ég notið allra samvista minna við ykkur á árinu sem er liðið.

Áhyggjur ársins: falla til handa bróðir mínum sem tók upp á því að missa sjónina seinnipart sumars. Í hönd fór langur biðtími í alls kyns rannsóknum sem leiddu að lokum til niðurstöðu. Þótt það hafi verið léttir að fá skýringu á þessu þá fylgdi því líka ákveðin sorg. Ekkert við því að gera…that´s life!

Brúðkaup ársins: Þetta ár var nokkuð ríkt af brúðkaupum. Það eftirminnilegasta var náttúrulega haldið þann sjöunda dag, sjöunda mánaðar á árinu. Þá giftu sig í Torfastaðakirkju Margrét Unnur æskuvinkona mín og Fannar KR-ingur með meiru. Veislan var svo haldin með pompi og prakt í Aratungu. Skemmtilegt brúðkaup sem gleymist seint. Til hamingju með það Mr. og Mrs. Ólafsson

Útför ársins: Blessunarlega þurfti ég bara að fara í eina jarðarför í ár sem er jafnframt einni meira en í fyrra. Siggi frændi bróðir hans afa Egils dó á árinu. Útförin var falleg, með fallegum söng og skemmtilegum og eftirminnilegum orðum prestsins. Blessuð sé minning Sigga frænda, ég gleymi þér aldrei.

Kvöld ársins: Úr mörgu er að velja og helmingnum er ég sennilega búin að gleyma. Skemmtilegasta djammkvöldið var ábyggilega fyrra djammið út í Glasgow, vá hvað við skemmtum okkur vel. Afmælið hennar Kristínar Birnu og djammið í kjölfarið á því er líka minnisstætt, alger snilld. Mér koma líka í huga ótal ferðir í pottinn á Selfossi með bjór í hönd og spjalli um hitt og þetta. Vinnudjammið í lok árs var líka skemmtilegt. Æ það eru öll kvöld frábær í góðra vina hópi.

Utanlandsferð ársins: hvort sem þið trúið því eða ekki þá fór ég í tvær utanlandsferðir á þessu ári. Fór fyrst til Glasgow í mars og svo til Boston í byrjun desember. Ferðirnar tvær voru mjög ólíkar fyrir tveggja hluta sakir, önnur ferðin var yfirlýst skemmti/djamm/verslunarferð, meðan hin snérist um verslun/kaffi og veitingahús. Báðar ferðirnar voru mjög skemmtilegar og skilja báðar eftir góðar minningar í minningabankanum. Ég vil sérstaklega minnast á vinkonu mína Ingveldi sem var með mér í báðum þessum ferðum. Ef Ingveldur væri karl myndum við eiga alveg hrikalega vel saman.

Ferðalag ársins: Hornstrandir. Eitt orð stutt og laggott. Algjör paradís sem skartaði sínu fegursta í glaðasólskini í tíu daga. Ég fæ gæsahúð við það eitt að sitja hér og hugsa um þennan tíma á Horni. Ég hlakka mikið til að fara aftur næsta sumar.

Skyndibiti ársins: tvímælalaust djúpsteikta samlokan með flórsykrinum sem Ingveldur pantaði á kokteilastaðnum í Boston…..hahaha! Þið getið ekki einu sinni ímyndað ykkar bragðið af henni. Hver borðar svona mat?

Kjánalegasti atburður ársins: án vafa kertafleytingin út af þessu hundsspotti þarna fyrir norðan. Vá hugsið ykkur aumingjans fólkið sem þurfti að sjá sjálft sig í fréttaannálnum núna um áramótin skælandi yfir einhverjum ófríðum hundi sem var ekki einu sinni dauður. Ég myndi andast úr skömm. I love you – ið hennar Yoko fer líka ofarlega á listann, það var meira svona kjánahrollur og skipta um stöð heldur en skömm.

Íþróttamaður ársins: ég ætla ekki að þykjast hafa áhuga á fótbolta eða einhverjum öðrum sjónvarpsíþróttum til að geta dæmt um íþróttamann ársins. Miklu betra að hugsa bara um þann íþróttamann sem ég þekki persónulega og hefur sinnt sinni íþrótt vel. Þar er efst á lista Helena nokkur Jónsdóttir sem keppti í þrekmeistaranum og náði frábærum árangri. Hún fór svo til Dubai að keppa í the best of the best og náði enn betri árangri. Árangri sem íslenskum fjölmiðlum þótti ekki ástæða til að minnast á, næstum til skammar. En við klöppum öll fyrir Helenu, hún lengi æfi.

Af hverju finnst fólki ég vera lík Björk?

2008-01-06T13:28:00.000Z

Nei ég held bara ekki!!!

Tíminn flýgur

2008-01-02T22:04:00.000Z

Ég fékk eina mjög skemmtilega jólagjöf frá góðum vini. Svona lítið dagatal sem smá vinaskilaboðum fyrir hvern dag ársins. Í dag sagði dagatalið "the better part of one´s life consists of one´s friendships" Held ég skilji þetta vel. Samt ákvað ég að sleppa bíóferðinni sem ég planaði með góðvini mínum í gær sökum peningaleysis. Ég ákvað svo að afþakka heimboðið hjá einni frænku í kvöld sökum leti. Þetta er ekki alveg í takt við það sem dagatalið bauð í dag, eða hvað?

Ég fór í ræktina í dag og átti þar með einum persónulegu samskiptin við aðra manneskju. Þetta er samt svolítið magnað. Maður gengur um með ipod-inn í eyrunum, talar ekki við neinn en er samt staddur í miklu fjölmenni. Er maður þá nokkuð í samskiptum við aðra, heldur bara í sínum eigin heimi með gamaldagsrokkurum og svitaskellum.

Nýjustu fréttir af snúrunni eru þessar, ég er búin að hengja og taka af snúrunni þrisvar sinnum, dótið frá nágrananum hangir enn á snúrunni, orðið verulega illa lyktandi vegna tóbaksstækjunnar frá dómaranum á kantinum, meira að segja minn vel ilmandi þvottur getur ekki bjargað honum.

Svo er nú það. Hinn þriðji dagur janúar mánaðar er framundan sem þýðir að á morgun þarf ég að fara að vinna og vakna klukkan sex í ræktina.

That´s life!!!

Klemma

2008-01-02T01:35:00.000Z

Klemma áramótanna.
Fyrir utan íbúðina mína er þvottaherbergi sem nýtast á allri blokkinni. Hingað til hefur það þó verið þannig að engin hefur nýtt þetta herbergi nema ég. Enda sú eina í blokkinni sem ekki hefur þurrkara (á reyndar þurrkara en get ekki notað hann). En undanfarnar vikur hefur annarra manna þvottur farið að birtast á snúrunni, þá svona stór þvottur - sængurföt og handklæði. Alla vega þessi sem setur á snúrurnar tekur allar snúrurnar. Notar ekki klemmur heldur leggur sængurfötin yfir snúrurnar svo ekkert annað rúmast á þeim. Það er svo sem ekkert við því að segja enda hef ég engan einkarétt á snúrunum en þessi stórþvottamaður lætur þvottinn svo vera á snúrunum dögum saman.

Ég kom fram með þvottabalann minn áðan og ákvað eftir smá umhugsun að ýta þvottinum til á snúrunum, þvottinum sem búin er að hanga þar síðan 29.desember...grrrr!!! Finnst ykkur þetta frekt?

Vona að þvottafólkið verði ekki brjálað. Er að vinna í að skrifa áramótaannálinn.

Það er þetta með jólin!

2007-12-29T22:45:00.000Z

Maður bíður spenntur eftir þeim í margar vikur, lætur sig dreyma um samverustundir með fjölskyldunni, matinn sem maður þarf ekki að elda sjálfur, pakkana sem maður fær að rífa upp, sofa út stundirnar, púslið. Svo kemur loksins að þessu öllu og jafnfljótt og það kemur er það búið. Allt í einu er komin 29. desember og framundan er nýja árið. Árið 2008. Árið mitt.

Jólin voru skemmtileg og full af óvæntum atburðum svo ekki sé meira sagt. Ég var hrikalega dugleg að fara út að skokka yfir jólin, alveg þangað til hitastigið fór niður fyrir -5. Þá dröslaði ég þrekhjólinu hans pabba fram fyrir sjónvarpið og horfði hjólandi á Friends. Gaman að þessu og hver segir að maður verði að hafa World Class til að hreyfa sig.

Jólagjafirnar komu skemmtilega á óvart. Útvarpið sem ég bað fjölskylduna um reyndist vera göngutjald og tek ég ofan fyrir þeim að hafa tekist að finna göngutjald einhvers staðar til sölu í Desember. Ég fékk svo einn svona pakka sem var í stíl við þennan "svarta stóra" sem ég fékk í fyrra. Ég bil þakka bróðir mínum fyrir hans skemmtilega og bráðundarlega húmor.

2000 bita brjálaða pússlið okkar Önnu tók alveg ótrúlega langan tíma og er ef satt skal segja ekki tilbúið enn. Síðustu fimm hundruð bitarnir bíða eftir mér í Hrísholtinu.

Móðir mín hefur varla veril til nema í vofu-líki þessi jólin. Hún var svo lögð inn á sjúkrahús í gær og kom heim aftur í dag alveg eins og nýslegin túkall eða svo gott sem. Ég tek ofan fyrir henni og vona að ég sé ekki svona þrjósk líka.

Ég fékk svo óvænt boð í kvöld og er að fara á tónleika á morgun í háskólabíó með fjórum sætum strákum og einni stelpu....úúúú!!! Spennandi?

Later!

Pollý-Jana

2007-12-15T18:10:00.000Z

Gleði, gleði, gleði!!!!

Ég renndi yfir blogglistann minn sem því miður styttist með hverjum deginum. Ein af færslunum sem vakti sérstaka athygli mína og var það jákvæðis hjalið hennar Soffíu. Alveg snilldarfærsla eins og þær eru reyndar alltaf hjá henni. Þá fór ég að hugsa og ákvað að fara í smá Pollí-Jönu leik með þeim atburðum sem ég hef lent í síðustu daga.

Jólapúkinn: ömurlegt að fara í ræktina í nýju skónum sínum og einhver gerist svo djarfur að stela þeim.
Pollý-Jana: Vertu ánægð að skónum sem kostuðu 40 dollara var stolið en ekki nýju Asics skónum sem kostuðu 95 dollara.

Jólapúkinn: Ömurlegt vatnsveður sem skemmdi parketið á gólfinu, og jú jú að ég skuli ekki vera tryggð akkúrat fyrir þessu óhappi.
Pollý-Jana: skítt með parketið, það getur varla orðið ljótara hvort sem er, vertu ánægð að nýji skenkurinn sem stóð í miðjum pollinum skyldi sleppa við það að skemmast.

Jólapúkinn: Hvað er með bensínlokið á bílnum? Hvers vegna í ósköpunum get ég ekki opnað það lengur inni í bílnum eins og ég hef alltaf getað gert. Er bíllinn minn að verða einhver drusla?
Pollý-Jana: Vertu nú bara ánægð með að vera yfirhöfuð á bíl, það er fullt af fólki sem ekki hefur efni á því að eiga bíl, hefðir þú til dæmis viljað vera upp á Strætó komin síðustu daga, fljúgandi um á sprungu strætóskýli.

Jólapúkinn: Ég trúi því ekki að enn ein jólin séu að ganga í garð og að ég skuli enn vera einhleyp. Mikið svaðalega hlýtur þú að vera ómöguleg!!!
Pollý-Jana: Pfff…hvaða rugl er þetta í þér þú veist það vel að alltaf er autt ból betra en illa skipað ból. Þú ert fullkomin eins og þú ert.

Og til að gera þetta ennþá væmnara þá hljómar stjörnuspá dagsins svona: Það sem eitt sinn virtist vandamál (eða kannski ömurleg lífsreynsla) verður þolanlegt, jafnvel fyndið. Þú hefur greinilega komist yfir hindrunina. Skál fyrir þér!

Fimmtudagurinn 13.

2007-12-13T21:50:00.000Z

Oft heyrir maður fólk tala um óhappadaga eða nota frasann þetta er bara ekki minn dagur. Ég ætla að byrja þennan pistil á því að segja að þetta var ekki minn dagur, hann var algert klúður. Þrátt fyrir að í dag hafi verið tekin skóflustunga að Sæmundarskóla þá mun ég ekki minnast dagsins fyrir það. Er þetta nóg drama í upphafi færslu??

Þegar ég kom fram í morgun eftir þetta viðbjóðslega veður mætti mér risastór pollur á parketinu. Óþéttur gluggi og parketið stórskemmt. Frábært að byrja daginn svona. Ég þurrkaði því gólfið og stillti ofninn á heitasta hitann og fór í ræktina. Ég náði góðum klukkutíma fyrir hálfátta. Fór svo í sturtu og það allt og fer svo fram og kemst af því mér til mikillar gleði að nýju skórnir sem ég hafði keypt í Boston voru horfnir úr skóhillunni. Ég meina hver stelur annarra manna notuðum skóm? Er ekki allt í lagi með fólk?

Vinnudagurinn gekk svo svona la, la en við ræðum það ekki hér. Svo endaði kvöldið á því að næstum kviknaði í íbúðinni hjá Gunnu systir. Hvað var það?

Á morgun væri því réttast ef ég myndi bara hrúga mér undir sæng og halda þar til.

ps. Hugmynd af jólagjöf.....NÝJIR SKÓR!!!!!

Þessi árstími

2007-12-09T21:53:00.000Z

Hef ég ekki sagt ykkur áður hvað ég er hrifin af þessum árstíma. Sérstaklega þegar úti er frost svo það brakar í snjónum, stjörnurnar tindra og kertaljósin loga og svo bíða blessuðu jólin handan við hornið. Ég labbaði í Bónus í dag í kuldanum, það tók reyndar mun lengri tíma en ég hélt því eftir rúma tvo tíma kom ég aftur heim, endurnærð á líkama og sál. Reyndar með rauðan nebba og kalda fingur en úberhress.

Ég fékk svo tvo myndarlega herramenn í kvöldmat, eldaði uppáhaldið þeirra og varð þvílíkt vinsæl fyrir vikið. Alveg ótrúlegt hvað grjónagrautur á upp á pallborðið hjá yngri kynslóðinni í dag. Þarna voru etinn nokkur kíló af grjónum.

Kertið sem ég kveikti á klukkan fimm hefur lækkað um nokkra sentimetra. Það minnkar það sem af er tekið hvort sem það eru grjón eða kertavax. Á leið minni í Bónus í dag var ég að hlusta á nýja bláa Ipodinn minn og mér til mikillar gleði hafði þessi sálmur laumast þar inn á.

Drottinn er minn hirðir,
mig mun ekkert bresta.
Á grænum grundum lætur hann mig hvílast,
leiðir mig að vötnum,
þar sem ég má næðis njóta.
Hann hressir sál mína,
leiðir mig um réttan veg
fyrir sakir nafns síns.
Jafnvel þótt ég fari um dimman dal,
óttast ég ekkert illt því þú ert hjá mér.

Sproti þinn og stafur huggar mig.
Þú býrð mér borð
frammi fyrir fjendum mínum,
þú smyrð höfuð mitt með olíu,
bikar minn er barmafullur.
Já, gæfa og náð fylgja mér
alla ævidaga mína,
og í húsi drottins bý ég langa ævi.
Drottinn er minn hirðir,
mig mun ekkert bresta.

Já ég segi það satt, bikar minn er barmafullur :)

Update

2007-12-08T00:03:00.000Z

Jæja!
Þá er ég farin og komin aftur frá Boston. Það var hrikalega skemmtilegt, félagsskapurinn góður, það var hægt versla duglega og endurnýja fataskápinn sem var allur að verða of stór. Allar jólagjafir tilbúnar og meira að segja sængurgjafir fyrir ófædd börn líka. Gaman af því. Djúpsteikti maturinn í Ameríku klikkar ekki, haugurinn af ófríðum fötum í Ameríku klikkar ekki heldur. Óvenjulítið var að myndarlegum karlmönnum á svæðinu, þeir einu tveir sem ég sá voru báðir svartir (ekki að þeir séu neitt verri). Mér finnst að það ætti frekar að flytja inn sæta svertinga í stað Pólverja....aðeins að auka litavalið sko.

Svo er maður að rembast við að detta aftur í rútínu. Það var einhver óskiljanlegur máttur sem dró mig fram úr bælinu klukkan sex í morgun. Samt sit ég hér enn um miðnætti að berjast við að halda augunum opnum.

Stór dagur á morgun þar sem Gugga og Siggi ætla að gefa litlu prinsessunni sinni nafn. Ég hlakka bara til að heyra og sjá. Svo er Gunna systir að bjóða mér á tónleika með kónginum Björgvini seinnipartinn. Já allt saman alveg hrikalega spennandi.

Góðar stundir.

Afmælisbarn dagsins

2007-11-30T11:30:00.001Z

Hún mamma mín á afmæli í dag, hún er á óræðum aldri enda algjör hressingarbolti.

Til hamingju með daginn elsku mamma mín .

Í pottinum

2007-11-25T20:15:00.000Z

Ég ákvað að hendast á Selfoss um helgina. Dósafjallið sem ég sé um að telja var farið að þrengja inngönguleiðina í bílskúrinn hjá pabba. Hvað var svo hægt að nota svona letihelgi í annað en að liggja í leti. Samtals eyddi ég 7 klukkutímum í heita pottinum. Samtals sötraði ég sex bjóra í þessum pottaferðum. Samtals púslaði ég 500 bita af púslinu. Samtals skrifaði ég 8 diska með tónlist og myndum. Sem sagt yndisleg helgi í meiriháttar slökun :)

Aðeins fimm dagar í Boston.

Boston

2007-11-21T21:25:00.000Z

So I think I go to Boston! Núna eru einungis sjö dagar þangað til ég fer til Boston. Vá hvað mig hlakkar til. Ég átti alvarlegt samtal við greiðslukortið mitt síðustu helgi og tel ég mig hafa hughreyst það svo það sé í stakk búið til að takast á við strauið. Ég er farin að sjá í hillingum hina stórkostlegu búð sem aðeins finnst í henni Ameríku BARNS & NOBELS!!! Uppáhaldsbókabúðin mín, hér kem ég!

Fyrir nokkrum vikum síðan keypti ég mér bók í Eymundsson, svona ekta bók til að lesa fyrir svefninn og glugga í aftur og aftur til að láta aðra halda að maður sé klárari en maður í rauninni er. Bókin heitir The top 10 of everything 2007 - svona top tíu heimsmet í öllum mögulegum hlutum. Ég var að klára bókina í gærkvöldi og finnst alveg magnað hversu oft nafn Íslands kemur fyrir. Það er meira að segja einu sinni í efsta sæti. Eruð þið ekki spennt að vita í hverju?

Jú jú engin þjóð í öllum heiminum gefur út eins mikið af dagblöðum á hverjum degi miðað við höfðatölu eins og okkar ástkæra Ísland.

Ég hlakka svo til að gramsa eftir fleirum svona gersamlega tilgangslausm bókmenntum hjá Baldri og Nóa!! JEI

Launamálin

2007-11-17T12:27:00.000Z

Hér er bréf sem allir grunnskólakennarar í Reykjavik fengu sent í gær. Mér þætti gott að þið mynduð gefa ykkur tíma til að lesa það, sérstaklega þið sem finnst laun grunnskólakennara vera ásættanleg.

Grunnskólakennarar flýja...VIÐVÖRUN

Hæstvirtur borgarstjóri Dagur B. Eggertsson

Ég undirrituð er grunnskólakennari og starfa sem umsjónarkennari 25 barna í stórborginni Reykjavík.
Starfið mitt er skemmtilegt, gefandi, fjölbreytt og nauðsynlegur hlekkur í því samfélagi sem við lifum í. Menntun er grundvöllur nútíma samfélags. Samfélagið kallar á vel menntaða og hæfa einstaklinga til að sinna fjölbreyttum störfum. Grunnskólinn er hornsteinn og grunnur í þessari keðju sem við þekkjum svo vel.
Ég og aðrir grunnskólakennarar leggjum okkur fram við að mennta komandi kynslóðir.
Við erum dugleg, drífandi, ómissandi og einstök....það finnst okkur og eflaust fleirum.

En stóri vandinn er sá að grunnskólakennarar eru fjárhagslega ósjálfbjarga í samfélaginu. Fjárhagslega eru kennarar háðir öðrum. Grunnlaun grunnskólakennara eru engan veginn í takt við það sem gengur og gerist annars staðar á vinnumarkaðnum og við getum alls ekki sætt okkur við það.

Við erum þátttakendur í því lífi sem stjórnvöld, bankar og auðmenn stjórna á þessu ágæta landi og við erum alltaf neðsti og efnaminnsti hlekkurinn í lífskeðju háskólamenntaðs fólks.
Við berum okkur saman við aðrar stéttir og þá sérstaklega þær sem við teljum sambærilegar. Alltaf komumst við að sömu niðurstöðunni, við stöndum VERST. Miklu ver en ágætir kollegar okkar, leikskólakennarar.
Stöðug niðurlæging og niðurbrot á eigin ágæti sem fagmenn og einstaklingar er yfirþyrmandi. Grunnskólakennarar eru svekktir, leiðir, sorgmæddir og allt þar á milli og einróma sammála um að við getum ekki látið bjóða okkur þetta lengur.

Kjarasamningur grunnskólakennara er ekki laus fyrr en á vordögum 2008. Grunnskólakennarar geta ekki beðið og vonað að komandi samningur gefi þeim tækifæri til að öðlast langþráða sátt og stolt með launakjör sín.

Grunnskólakennarar sem einstaklingar geta ekki fórnað sér endalaust fyrir málstaðinn; ,,góð menntun er nauðsyn fyrir samfélagið.”
Grunnþarfir einstaklinga eru m.a. sjálfstæði og sjálfsbjargarviðleitni. Við höfum þessar þarfir og þurfum að leita leiða til að svala þeim.
Það þýðir að ef ekkert verður gert til að bæta launakjör grunnskólakennara áður en þessu skólaári lýkur og ÁÐUR en samningar eru lausir, verða margir og sérstaklega þeir ungu í stéttinni, að segja upp sínu ágæta starfi. Neyðarástand mun blasa við í grunnskólum, samfélagið allt mun finna fyrir neyðinni.

Reykjavíkurborg og önnur sveitarfélög eru vinnuveitendur grunnskólakennara.
Viðvörun þessi er því send til þín sem æðsti maður stærsta sveitarfélagsins. Ég vænti þess að þú komir þessum skilaboðunum áleiðis til yfirmanna hinna sveitarfélaganna.

Oft er þörf en nú er nauðsyn, það þarf að bregðast við óánægju grunnskólakennara með launakjör sín.
Með von um góð viðbrögð og skjótar úrbætur!

Virðingarfyllst
Herdís Kristinsdóttir,
grunnskólakennari í Reykjavík, 30 ára, með 218.000 kr. í grunnlaun, 25 nemendur í umsjón

Á degi íslenskrar tungu.

2007-11-16T21:11:00.000Z

16.nóvember er dagur íslenskrar tungu og þá minnist maður hinna öldnu snillinga sem höfðu svo ótrúlega gott vald á íslensku máli að verk þeirra eru enn í miklum metum. Jónas Hallgrímsson hefur lengi verið mitt uppáhaldskvæðahöfundur. Í tilefni af því fletti ég upp í ljóðabókinni minni sem Gurrý gaf mér þegar ég útskrifaðist og fann uppáhaldsljóðið mitt í henni. Svo skemmtilega vill til að ljóðið er eftir Jónas og heitir Móðurást. Ég vona að þið gefið ykkur tíma til að rifja þetta ótrúlega fallega ljóð upp.

MÓÐURÁST

Fýkur yfir hæðir og frostkaldan mel,
í fjallinu dunar, en komið er él,
snjóskýin þjóta svo ótt og svo ótt.
Auganu hverfur um heldimma nótt
vegur á klakanum kalda.

Hver er in grátna, sem gengur um hjarn,
götunnar leitar, og sofandi barn
hylur í faðmi og frostinu ver,
fögur í tárum? En mátturinn þver.
Hún orkar ei áfram að halda.

"Sonur minn góði! Þú sefur í værð,
sérð ei né skilur þá hörmunga stærð,
sem að þér ógnar og á dynja fer.
Eilífi guðssonur, hjálpaðu mér
saklausu barninu að bjarga.

Sonur minn blíðasti, sofðu nú rótt.
Sofa vil ég líka þá skelfingarnótt.
Sofðu! Ég hjúkra og hlífi þér vel.
Hjúkrar þér móðir, svo grimmasta él
má ekki fjörinu farga".

Fýkur yfir hæðir og frostkalda leið,
fannburðinn eykur um miðnæturskeið.
Snjóskýjabólstrunum blásvörtu frá
beljandi vindur um hauður og lá
í dimmunni þunglega þýtur.

Svo, þegar dagur úr dökkvanum rís,
dauð er hún fundin á kolbláum ís.
Snjóhvíta fannblæju lagði yfir lík
líknandi vetur, en miskunnarrík
sól móti sveininum lítur.

Því að hann lifir og brosir og býr
bjargandi móður í skjólinu hlýr,
reifaður klæðnaði brúðar, sem bjó
barninu værðir og lágt undir snjó
fölnuð í frostinu sefur.

Neisti guðs líknsemdar, ljómandi skær,
lífinu beztan er unaðinn fær,
móðurást blíðasta, börnunum háð,
blessi þig jafnan og efli þitt ráð
guð, sem að ávöxtinn gefur.

Jónas Hallgrímsson

Hornstrandir

2007-11-16T17:41:00.000Z

Á svona dimmum rigningardögum getur maður ekki annað en leitt hugann að sumrinu. Munið þið hvað síðasta sumar var geggjað? Munið þið frásögnina mína um dagana mína í Hornstrandar-paradísinni? Í dag fékk ég þennan póst og vá hvað ég hlakka sjúklega mikið til að henda mér af stað í enn eitt sumarið á Hornströndum.

Svona verður ferðin mín næsta sumar.

Í þessari ferð verður gengið um eyðifirði og víkur austan Drangajökuls.
Farþegar koma á eigin vegum til Norðurfjarðar í Árneshreppi laugardaginn 28. júní og gista í húsi F.Í á Valgeirsstöðum. Farangur verður fluttur á milli gististaða. Gist í tjöldum næstu þrjár næturnar og síðan í húsi í Reykjarfirði. Sameiginlegur matur í Reykjarfirði sem ekki er innifalinn í verði ferðarinnar.
1. d. Gengið til Ingólfsfjarðar sunnudaginn 29. júní og staldrað við á Eyri þar sem skoðaðar verða minjar um síldarvinnslu á fyrri hluta síðustu aldar. Gengið um Brekkuskarð til Ófeigsfjarðar, þar sem kaffihlaðborð bíður ferðalanga. Litast um í Ófeigsfirði, kvöldganga að Húsárfossi.
2. d. Gengið um Eyvindarfjörð í Drangavík og tjaldað við Drangavíkurá.
3. d. Gengið um hin stórbrotnu Drangaskörð í Bjarnarfjörð.
4. d. Gengið í Skjaldarbjarnarvík. Ef veður leyfir verður farið á Geirólfsnúp til að njóta útsýnis áður en haldið er í Reykjarfjörð.
5.-6. d. Dvalið í Reykjarfirði, þar sem m.a. verður hægt að velja um göngur í Þaralátursfjörð, að Drangajökli og á Miðmundarhorn. Einnig verður á dagskrá sund, glens og gaman í bland við sögulegan fróðleik frá heimamönnum.
7. d. Siglt til Norðurfjarðar laugardaginn 5. júlí.

Ó boy ó boy.....!!!

Tumi voffi

2007-11-11T21:27:00.000Z

Hér sjáið þið Tuma. Tumi er eins og flest ykkar vita hundurinn hans Sigga bróðir. Tumi er mesta gæðablóð og alveg einstaklega skemmtilegur félagi. Tumi fór út að hlaupa í kvöld með afa sínum og varð fyrir því óláni að lenda fyrir bíl og fara undir hann. Tumi tognaði og varð allur götóttur en á einhvern ótrúlegan hátt slapp hann að öðru leyti. Aumingja Tumi minn. Honum leið svo illa að hann vældi eins og ungabarn. Vesalings dýrið og hvað manni getur þótt vænt um þessa málleysingja.

Sættu þig bara við þetta.

2007-11-10T17:28:00.000Z

Ekki fyrir löngu voru þessi orð sögð við mig. Sættu þig bara við að vera í láglaunastétt því það mun aldrei breytast. Það er hiti í minni kennarastétt skal ég segja ykkur og það skelfur í stoðunum. Mér hrís hugur að hugsa til þess hvernig ganga muni að manna skólana ef ekki verður gerð almennileg bragarbót í komandi samningum. Þrátt fyrir að nú sé árið 2007 og menntaðir einstaklingar fylli hverja stöðu þá eru samt ennþá alltof margir sem telja að laun kennara séu bara nógu há og láta út úr sér frasa eins og þessa...Sættu þig bara við það að vera í láglaunastétt, eða jafnvel ....ef þetta er svona ömurlegt hættu þá bara að kenna. Á sama tíma setja aðrir út á gæði þess náms sem íslenska skólakerfið veitir börnunum. Hvernig skyldi hljóðið verða í þessu sama fólki þegar allir menntuðu kennararnir eru hættir og farnir að starfa á Mcdonalds með hærri laun og betri vinnutíma en þeir hafa áður kynnst.

Pffff....sumir eru bara sauðir.

En jæja á þessum laugardegi sem kvefið hafði vinninginn. Ég er búin að þrjóskast við alla vikuna því ég vare búin að gera samning þess efnis að þetta skólaár myndi ég ekki verða lasin. En um leið og vinnustressið fór af herðunum á föstudagseftirmiðdegi hafði kvefið betur í baráttunni. Ég ligg því bara ógó kósý upp í sófa með kertaljós og kók í dós og nýt þess að eiga bara heimastund ein með sjálfri mér. Það hefur verið alveg hrikalega mikið að gera síðasta mánuðinn og sér ekki svo sem ekki alveg fyrir endann á því. Næsta helgi er barasta orðin uppbókuð með partýum og kaffiboðum. Gaman af því.

Stjörnuspá dagsins í dag er eftirfarandi: Undanfarið virðist bara annað hvort einkalífið eða vinnan geta virkað. En það þarf ekki að vera þannig. Gerðu bara minni kröfur til þín á báðum stöðum. Rokk og ról! Segir meira en þúsund orð?

Með fulla vasa af grjóti.

2007-11-07T19:53:00.000Z

Fyrir nokkrum árum fór ég í leikhús og sá eftirminnilegt leikrit sem heitir Með fulla vasa af grjóti, þá sá ég í fyrsta sinn leikara sem búin er að vera í hálfgerðu uppáhaldi síðan en þá í hlutverki Glanna glæps. En ég ætlaði alls ekki að skrifa um þetta, það er að vera með fulla vasa af grjóti. Ég ætlaði að segja ykkur frá því að nú er ég með full eyru af vatni þ.e. sundlaugarvatni.

Hér áður fyrr þegar ég hljóp yfir mig á hverjum einasta degi plagaði mig alveg endalaus beinhimmnubólga. Nú er ég að upplifa gamla tíma því ég er að drepast í beinhimmnubólgu. Ástæðan að þessu sinni eru náttúrulega þessir ónýtu skór sem ég er að hlaupa í. Ætla ekki að spreða í nýja fyrr en í Boston. Ég ákvað því að slá til og skella mér í sund svona til að brenna aðeins seinnipartinn. Ekkert nema gott um það að segja. Grafarvogslaugin er flott laug og þarna um sexleytið var ekki margt um manninn.

Ég synti sex hundruð metra sem eru 24 ferðir, bringusund og skriðsund í bland. Ég fann hvernig vöðvabólgan æpti á mig, ertu ekki að grínast. Eg veit svo sem ekki hvort þetta sé einhver massabrennsla en....ég er með eyrun full af vatni og alveg hrikalegan hausverk.

Nú væri gott að fá eitt stykki axlarnudd :)

Góðar stundir.

Þegar álagið minnkar!

2007-11-06T15:40:00.000Z

Fyrir nokkrum árum ákváðu einhverjir snillingar að skólaárið á Íslandi væri ekki nógu langt. Þeir ákváðu því að lengja það um tíu daga. Ekki nóg með það að þeir skyldu lengja skólaárið heldur ákváðu þeir líka að nokkuð sem heitir vetrarfrí skyldi vera valkostur fyrir skóla. Skólar hafa því þennan valkost að gefa bæði nemendum og kennurum frí svona rétt til að hlaða batteríin, eitt frí á haustönn og annað á vorönn. Af þessum ástæðum er ég búin að vera í fríi síðustu þrjá vinnudaga þ.e. fim, fös og mánudag.

Eftir þetta yndislega og kærkomna frí var því bara ljómandi að vita til þess að í dag þriðjudag átti ég að mæta endurnærð, nýklippt og lituð í vinnuna. Ég fór því að sofa snemma í gærkvöldi. Náttúrulega með allt planað eins og vera ber. Skólataskan, ræktartaskan, nestistaskan, sundtaskan og salatið sem ég á að koma með í vinnuna þriðjudögum.

En þó allt væri ready helltust samt í mig einhverjar bakteríur, ég vaknaði í nótt og hóstaði og hóstaði. Í morgun klukkan sex var svo ekkert um að villast að einhver drusluveikindi voru búin að hertaka mig. Ég fór því ekkert nema í sófann í dag. Engin ræktarferð, engin nestistími, engin sundferð, ekkert nema hor og hósti.

Hvernig skyldi þetta hafa gerst sérstaklega á þessum tíma sem mér hefur sjaldan fundist ég vera eins hraust. Ég fór svo að hugsa til baka og er komiin að þeirri niðurstöðu að það sé út af þessu fríi. Ég get varla hugsað til baka til einhvers frí í vinnunni án þess að einhver veikindi hafi fylgt í kjölfarið. Vetrarfrí, jólafrí, vetrarfrí, páskafrí, sumarfrí. Alltaf eftir nokkra daga í slökun þarf ég að sinna einum eða tveimur dögum í það að vera lasin.

Ég hef því ákveðið að taka mér ekki fleiri frídaga. Þeir eru bara til vandræða.

Litla mús Guggu dóttir

2007-11-04T21:08:00.000Z

Ég veit ég er ekki í alvöru frænka. En ég má alveg þykjast vera það :)

Topp tíu moment

2007-11-04T20:42:00.000Z

Topp tíu moment vetrarfrísins í engri sérstakri röð.

10. Ég bara get ekki staðið í því lengur að týna upp notaða smokka eftir ókunnuga, þetta er það viðbjóðslegasta sem ég veit.
9. Mæja, viltu gjöra svo vel að skemma ekki bílinn minn með hausnum á þér?
8. Hæ er þetta Alla, bíddu er þetta Halla, hvað ertu að tala um? Er þetta Anna Guðrún, djók ég þekki þig núna!
7. Auðvitað kemstu, þú ert nú á Yaris!
6. Brjóst, brjóst, brjóst, brjóst, brjóst og aftur brjóst.
5. Já fínt, já sæll, já fínt, já fínt, já sæll!
4. Ertu að segja að þú ætlir ekki að kyssa mig, má ég þá fá mér hráan lauk?
3. You don´t like Polish people?
2. Fyrirgefðu en þú ert að pota í augað á mér.
1. Kannski á hann einhverja sæta einhleypa vini fyrir vinkonur þínar, ertu búin að tékka á því?

Takk fyrir og góðar stundir.

Já svei mér þá!

2007-11-02T20:22:00.000Z

Stundum verður maður reiður og stundum verður maður bara foxillur. Núna er ég sem sagt foxill. Fox á ensku þýðir refur á íslensku. Þannig að ég er í refa-ham. Ég dró upp símann áðan og ætlaði að hringja og siga refnum á viðtakanda símanúmersins en hafði sem betur fer vit á því að leggja á eftir fyrstu hringingu. Ég held að maður græði ekki á því að rífast eins og refur. Á maður kannski bara að sleppa því að rífast við fólk sem hefur gengið svona yfir strikið. Hvað finnst ykkur? Eða á maður kannski bara að leggjast undir feld, róa sig niður og leita svo skýringa? Hvað finnst ykkur?

Burtséð frá því er ég foxill.....grrrrrr!!!!

Litli hluturinn

2007-10-31T20:14:00.000Z

Fyrir þremur árum þegar ég hætti í Heiðarskóla í Keflavík var mér gefin gjöf sem mér þótti afskaplega vænt um. Þá slógu allir nemendur mínir sem voru 23 saman í skartgrip handa mér. Krakkarnir vissu náttúrulega öll að uppáhaldsliturinn minn var blár og lagt var að ráðin með hvernig hægt væri að komast að því hvort ég væri meira fyrir gull eða silfur.

Ég fékk svo afskaplega fallega sérsmíðaða silfurskartgripi með bláum steinum. Alveg eins og ég hefði sjálf farið út í búð og valið. Ég hef ekki ekki mikið notað þessa fallegu hluti. Ég fór svo á árshátíð ekki fyrir alls löngu og setti þá þessa skartgripi á mig. Silfurhálsmenið með bláa steininum, silfurhringnum með hinum bláa steininum og silfureyrnalokkunum. Þetta er bara flott sett sem sést vel að hefur kostað þessar fimmtíu þúsund krónur sem borgað var fyrir það.

Þegar ég kom heim af árshátíðinni tók ég af mér skartgripina og lagði þá frá mér á sófaborðið. Um morguninn var hringurinn horfin. Ég leitaði um allt, færði til sófa, og lyfti upp mottum. Tók meira að segja pokann úr ryksugunni og gramsaði í honum þó ég vissi að þar hefði hringurinn minn ekki lent. Eini möguleikinn sem eftir var var sá að fröken Sigríður hefði étið hringinn. Þó mér þyki vænt um hringinn finnst mér vænna um kisu svo það krukka í magann á henni var ekki í boði.

Áðan var ég að leita að myndavélinni minni sem nota bene er líka týnd haldið þið þá ekki að hringurinn hafi dottið í hendurnar á mér. Ég sver það að hann datt úr loftinu. Hvernig getur það gerst?

Ég er því bara slök og veit að myndavélin mun detta svona í lófana á mér eftir einhverja daga eða vikur.

En ég fann fína hringinn minn og er með hann á fingrinum í kveld til að fagna.

Update

2007-10-30T21:01:00.000Z

Hrikalega krúttaraleg auglýsingin af gömlu konunni sem er að stelast til að taka mynd af draumaprinsinum sínum honum Baldvini. Krúttlegt.

Helgin síðasta var hrikalega skemmtileg og það eitt að hugsa til hennar kallar fram bros. Ég fór í mjög skemmtilegt partý með einni vinkonu minni og uppgötvaði hversu skemmtilegt það getur verið að vera hluti af svona karlavinnustað eins og hún er að vinna á. Ætti maður kannski bara að slá þessu upp í kæruleysi og skipta um vinnu? Nei ég segi nú bara svona.

Vetrarfríið er framundan og það er alveg að verða búið að negla þá daga niður. Það verður full vinna að vera í svona fríi. Bara skemmtilegt að vera til þegar svona mikið er um að vera.

Og ég skal segja ykkur það að nú eru einungis 31 dagur þangað til ég fer til Boston!!!

28.október 2007

2007-10-28T12:46:00.000Z

Í dag á Árni Þór litli frændi minn sjö ára afmæli. Það eru sem sagt sjö ár síðan árið 2000 var. Árið 2000 var ég ennþá í kennó. Sjö ár er ekki langur tími en svo mikið hefur gerst á þessum sjö árum. Daginn sem Árni Þór kom í heiminn var ég að vinna í erfidrykkju í hótelinu á Selfossi og grenjaði eins og barbí dúkka þegar ég fékk fréttirnar. Ekki meir um það.

Til hamingju með afmælið elsku strákurinn minn.

Ákafinn í ræktinni

2007-10-26T21:53:00.000Z

Eins og sumir vita er ég búin að setja það inn í prógrammið mitt að dröslast á fætur klukkan sex á morgnana til að sprikla af mér aukafarangurinn. Það var eins og morgun og alla hina morgnana, klukkan hringdi klukkan 5:50, ég snozzaði í tíu mínútur en hrökk svo upp með andfælum og sá að klukkan var orðin 6:05, ég næstum orðin of sein rýk á fætur, klæði mig i fötin, stekk með töskurnar út í bíl og bruna sem leið liggur að World Class í Spönginni.

Þetta var ekkert frábrugðið öðrum morgun, fáir ef einhver á ferli, hvergi ljós nema á Yoko súlunni, rigning eins og alltaf. Þegar ég kem að ræktinni sé ég mér til mikillar furðu að allt er slökkt og engir bílar á bílastæðinu. Þetta er mjög óvenjulegt því venjulega er allt fullt þarna á þessum tíma. Ég hafði ekki farið í ræktina í gærmorgun og var því alveg viss um að einhverja hluta vegna væri lokað þarna þennna morguninn. Ég ákvað því að keyra að hurðinni og athuga hvort það væri ekki miði á hurðinni. Enginn var miðinn og það fannst skrýtið. Ég fer því aðeins að hugsa og hafði greinilega ekki gert það fyrr en á þessum tímapunkti.

Ég lít á klukkuna í bílnum og fæ svo mesta hláturskast í heimi því þarna á planinu fyrir utan World class, tilbúin í gallanum sé ég mér mikillar undrunar að klukkan er 4:15. Það var sem sagt bara mið nótt. Vekjaraklukkan hafði ekkert hringt, nema í ímyndun í hausnum á mér. Hún hringdi klukkan 5:50 eins og hún átti að gera.

Ég fór því bara aftur heim og svaf í einn og hálfan tíma í viðbót og mætti svo eldhress klukkan sex. Það ætti ekki að leyfa mér að keyra á morgnana því ég er svo utan við mig....!!

Góðar stundir.

Bloggarar í fríi

2007-10-24T21:24:00.000Z

Ég er farin að upplifa mig eins og einhvern hræsnara er búin að hræða fólk með bloggarar í fríi listanum mínum og get svo ekki komið frá mér einni almennilegri færslu sjálf. Ég fer bráðum að lenda á frí listanum mínum sjálf. Ég hef þá trú kílóið sem ég missti í síðustu viku hafi verið kílóið sem innihélt sköpunargáfu mína því ég er alveg tóm þessa dagana.

Góðar stundir.

Naglasnyrting

2007-10-21T18:17:00.000Z

Ég lenti í óskemmtilegri reynslu í gærmorgun. Líkamsklukkan er náttúrulega búin að stilla sig á klukkan sex og því vaknaði ég nokkrum vegin til lífsins klukkan sex í gærmorgun. Fór fram á bergið, burstaði tennurnar, hleypti kisu út og lagðist svo aftur upp í rúm. Enda fyrir neðan allar hellur að ætla að gera eitthvað annað en sofa klukkan sex á laugardögum. Úti var líka hellirigning og leiðindi. Ég er rétt að ná að festa svefn þegar hljóðin berast að utan. Það fór ekkert á milli mála að þarna voru tveir kettir að slást. Ég náttúrulega rauk út í glugga og öskraði á ljóta fressinn sem var að meiða kisu mína. Fressinum dauðbrá og hljóp í burtu og frú Sigríður notaði tækifærið og skaust inn til mín. Ég lagðist svo aftur í rúmið og kisa lagðist titrandi hjá mér.

Við sváfum svo áfram til rúmlega níu. Þegar ég vakna sé ég að rúmið mitt er allt blóðugt. Ég náttúrulega nývöknuð fer vel yfir alla króka og kima á sjálfri mér í leit að saumsprettu. Eftir nokkra leit komst ég af þeirri niðurstöðu að það hafi ekki verið ég sem blæddi í rúmið. Ég fór því að leita að kisu. Ég var lengi að leita að henni og fann hana að lokum í þvottakörfunni inni í þvottahúsi. Þar sat hún greyið með fótinn rauðan. Ég tók hana upp og kíkti á fótinn og sá þá að ein klóin hékk á bláþræði og það fossblæddi.

Ég setti kisu niður og fór að leita að naglaskærum. Hún elti mig á þremur fótum, draghölt. Ég náði svo í handklæði og lagði það á rúmið mitt. Kisa lagðist á handklæðið og rétti mér fótinn. Hún vissi nákvæmlega hvað geri þyrfti, klóna þurfti að fjarlægja. Ég klippti klónna burtu og get rétt ímyndað mér að þetta hefur ekki verið þægilegt fyrir frú Sigríði, en hún beit á jaxlinn, vældi aðeins en stóð sig vel. Við ákváðum að setja ekki plástur á sárið heldur sömdum um að halda okkur bara inni næstu daga til að leyfa þessu að jafna sig. Hún er ennþá aðeins hölt í dag en við teljum að þetta sé allt að batna.

Það er kraftur í frú Sigríði og ég spyr mig nú hvort fressaógeðið hafi flúið vegna öskranna í mér eða vegna stórhættulegu bardagalistar frú Sigríðar ofurkisu.

Góðar stundir.

Þvottur

2007-10-15T20:14:00.000Z

Ég er að drukkna í þvotti. Þetta er ótvíræður ókostur þess að fara í ræktina á hverjum morgni. Ég þarf að þvo að annan hvern dag og er ekki að nenna því. En jæja það eru víst kostir og gallar við alla hluti. Ég fór svo út að skokka áðan rétt þegar sólin litaði himininn í bleikum tónum. Það var samt eiginlega of kalt til að vera skokkandi en maður lætur sig hafa þegar sólin er loksins á himninum í stað þessarar endalausu rigningar.

Ég er búin að bóka mér ferð til Boston!!! Jei. Mun fljúga út á afmælisdegi mömmu þ.e. 30. nóvember og koma aftur á klakann á miðvikudagsmorgun. Jú, jú ég skal alveg viðurkenna það að ég er HRIKALEGA spennt.

Núna sit í sófanum með kókdós dagsins.

Mér finnst haustið skemmtilegt

2007-10-14T19:39:00.000Z

Mér finnst þessi tími alveg geggjaður. Núna er kveikt á fjórum kertum í kringum mig og á lambanum með minnstu birtunni. Meira að segja tölvan er með haustbirtu. Ég átti dásamlegan dag, eða öllu frekar dásamlega helgi. Byrjaði á myndakvöldi með Hornstrandarförunum á föstudagskvöldið. Brunaði svo upp í sumarbústað til Söndru og Mæju um kvöldið. Kom aftur frekar búin á því á laugardagskvöldið. Fór snemma að sofa og hitti svo stelpurnar sem kenndar eru við Sex and City á Vegamótum í hádeginu. Fórum svo á smá rúnt um miðbæinn, kíktum á safn, kíktum í Skífuna, kíktum í bókabúðina í desert. Alveg hrikalega afslappaður dagur. Núna er ég mætt með tölvuna á hnén og ætla að vinna svolítið í kvöld.

Ræktin klukkan sex í fyrramálið og því nálgast háttatíminn óðfluga.

Helgin búin

2007-10-07T21:20:00.000Z

Það er svo gaman þegar helgarnar eru svona hrikalega mikið planaðar. Ég er að segja ykkur það, ég hafði frítíma á milli klukkan átta og tíu á laugardaginn og síðan ekki meir.

Helgin byrjaði reyndar á starfsmannapartýi sem var skemmtilegt en frá því varð helgin bara skemmtilegri. Ég byrjaði á ræktinni á laugardagsmorgunin, tók tuttugu mínútur á þremur tækjum og keyrði mig gersamlega út á því síðasta. Sem sagt mínúta 57-60 voru endanlega til að ganga fram af orkubirðunum. Ég var svo mætt á fótboltaleik rúmlega eitt. Hafði aldrei farið á slíka skemmtun og þetta var langt frá því að vera leiðinlegt. Reyndar tapaði liðið sem ég hélt með en það var bara aukaatriði. Það var reyndar alveg hrikalega kalt á vellinum og það hefði verið næsta nauðsynlegt að hafa haft einhvern góðan til að hlýja sér eftir leikinn.....en það er líka allt önnur saga.

Ég fór svo út með Söndru, Soffíu og tveimur öðrum. Við vorum alveg hrikalega hressar. Ég spilaði lagið um njálginn fyrir gesti og vakti það mikla lukku, ekki skal þó segja hvort það hafi vakið áhuga :) Við eyddum svo meirihluta seinnihluta kvöldsins inni á Rex sem ég mun framvegis þekkja undir nafninu stelpa í flegnum bol og útlenskir karlmenn. Mun framvegis leita heppilegri skemmtistaða.

Nú fer af stað vika númer þrjú í heilsuræktar - einkaþjálfuninni. Ég fór út áðan nota bene með smá þynnkuverk og ákvað að hlaupa hringinn minn hérna í Grafarvoginum. Þegar ég var búin með hringinn og aftur komin að kirkjunni fann ég að ég átti ennþá slatta eftir að orku og ákvað því að hlaupa áfram og áður en ég vissi eða fann fyrir var ég búin að hlaupa annan hring. Sem sagt ég hljóp tæpa níu kílómetra í kvöld....JÚBBÍ JEI!!!

...og fyrir þá sem vita...I think I go to Boston :)

Þannig fór um fjallaferð þá

2007-10-04T14:47:00.000Z

Klukkan er 22:15. Nesti morgundagsins er tilbúið í nestistöskunni inni í ísskáp. Við hurðina standa þrjár töskur. Í einni eru föt fyrir morgundaginn sem ég fer í eftir að ég er búin í ræktinni. Í annarri eru fjallgönguföt fyrir seinnipartinn þegar ég ætla að fara með vinnufélagana upp á Grímannsfell (ég veit ég var búin að heita því að fara ekki þangað upp aftur, en hvað gerir maður ekki fyrir gott fólk). Í þriðju töskunni er tölvan og bækurnar sem ég þarf fyrir vinnuna. Á hurðarhúninum hanga svo gönguskórnir sjálfir, annars myndi ég pottþétt gleyma þeim.

Klukkan er 22:30. Ég leggst upp í rúm. Maður verður að fara að snemma að sofa ef maður á að vakna með góðu móti klukkan sex. Ég er dauðþreytt eftir daginn. Fór á fætur klukkan sex, var í vinnunni til rúmlega fjögur. Passaði fyrir Gunnu systir til átta. Vann í bókhaldinu til klukkan níu. Horfði á ANTM og fór svo að sofa. Samt ligg ég hér og get ekki sofnað.

Klukkan er 23:00. Af hverju sofna ég ekki. Ég tel í huganum klukkutíma sem ég get sofið. Það eru aðeins sjö tímar þangað til ég þarf að vakna. Af hverju sofna ég þá ekki. Er það út af harðsperrunni (já í eintölu) í öðrum tvíhöfðanum. Varla heldur hann fyrir mér vöku. Mér líður reyndar eitthvað skringilega í maganum. Hvað skyldi það vera.

Klukkan 23:30. Jú jú magapína var það. Ég er búin að heimsækja annað af gluggalausu herbergjunum í íbúðinni minni tvisvar á síðasta hálftíma. Andskotinn. Núna eru aðeins sex og hálfur tími þangað til ég þarf að vakna.

Klukkan er 03:00. Af hverju sofna ég ekki. Hversu lengi á þessi uppgangur að vara? Núna eru bara þrír tímar til stefnu.

Klukkan er 04:30. Gleymdu því þú sefur ekki í nótt.

Klukkan er 06:00. Gleymdu því að fara í ræktina. Þú varst að sofna. Andskotans djöfull.

Ég veit það er ljótt að blóta. En dagurinn sem var planaður svo sjúklega vel með öllum töskunum við hurðina er ónýtur.

Í smáralind

2007-10-01T21:18:00.000Z

Ég fór í verslunarferð í gær. Fór í Smáralind. Mér finnst það ekki skemmtilegt. Ég tölti náttúrulega rakleitt í uppáhaldsbúðina mína, Dóróthea klikkar aldrei :) Ég keypti líka svona geggjað flotta kóngabláa peysu. Ég er bara ánægð með hana. Ég fór svo í hina uppáhaldsbúðina mína í Smáralind en það er engin önnur verslun en Hagkaup, nánar tiltekið matarhlutinn í Hagkaup. Mér finnst geggjað að ganga þar eftir göngunum, finnst eins og ég sé komin hálfa leið til hennar Ameríku.

En það gerðist nefnilega dálítið áhugavert í þessum innkaupaleiðangri. Ég gekk og potaði og snerti á flestu sem fyrir varð, stundum er meira að segja hægt að þefa líka. Allt í einu veiti ég athygli myndarlegum manni sem virðist fara svona í humátt á eftir mér. Aftur og aftur mættust augu okkar og svei mér þá ef ég var ekki viss um að gaurinn væri að daðra. Ég keyrði fram og til baka alla gangana og á eftir mér kom hann. Ég fór inn í mjólkurkælinn og skildi körfuna eftir við innganginn. Hann gerði það líka og fór að skoða sömu hlutina og ég þar inni, meira að segja á sama tíma. Ég tók þarna nokkrar jógúrtdósir og smellti mér út úr kælinum og fór inn ganginn með búsáhöldunum og að basla við að skoða þar svona stóran plastdall fyrir allt salatið sem ég ætla að fara að borða í vinnunni og hvað haldið þið....eftir augnablik kemur gaurinn á eftir mér inn þennan gang og ég sé það á öllu hans látbragði að hann ætlar að koma að tala við. Ég set mig því í stellingar og.....(nú haldið þið að ég hafi lent í einhverju ævintýri þarna í búsáhaldadeildinni) en nokkrum sekúndum áður en gaurinn byrjar að tala við mig heyrist frá enda gangsins.....

....þarna ertu ég er búin að leita að þér um alla búð. Gaurinn frýs með körfuna verður kjánalegur á svipinn, snýr við og gengur burt með konunni sinni.

Fólk er fífl!

Að segja réttu hlutina

2007-09-30T00:07:00.000Z

Ég á eina vinkonu. Auðvitað á ég ekki bara eina vinkonu. En ég á eina vinkonu sem á svo auðvelt með að leysa úr svona hugarhnútum sem maður er búin að búa til í sínum huga og bara finna lausnir og segja svo bara réttu hlutina. Ég bauð einni vinkonu minni í mat í vikunni og fór að þylja upp fyrir hana allt það sem ég er búin að vera að rembast með að taka ákvörðun um síðustu vikur og mánuði.

Ég veit ekki nákvæmlega hvernig hún fór af því að leysa þetta, en allt í einu var bara búið að höggva á hnútinn. Núna er þetta ekkert vandamál lengur. Það er frábært að þurfa ekki að vera vandræðast með þetta lengur. Nú er ég búin að breyta stefnunni og stefni í rétta átt.

Ég er þess fullviss að þessi vinkona mín ætti að einbeita sér að því að ráðleggja fólki, alla vega svona vandræðagripum eins og mér. Ég vil enda þetta á hennar orðum, sem hún reyndar hafði eftir öðrum í þetta sinnið. Það eru aðeins 10% íbúa á jörðinni sem lifa við þann munað að hafa fjóra veggi á húsinu sínu og svo eru það aðeins 5% íbúa á jörðinni sem búa við þann munað að hafa fjóra veggi á húsinu sínu og rennandi vatn í því. Ég er sem sagt í þeim forríka forrétindahóp sem bý við þetta bæði.

Nú er tíminn til að hætta að væla og stefna hraðbyri í átt að framtíðinni.

Góðar stundir.

Ég er með kenningu.

2007-09-28T19:47:00.000Z

Ég er með kenningu.

Ég hef þá trú að þriðjudagar, miðvikudagar og fimmtudagar séu styttri en hinir dagarnir. Það hlýtur að vera. Því ég man mánudaga og hviss, bamm, búmm það er komin föstudagur....!

Góðar stundir

Ísland

2007-09-23T22:02:00.000Z

Ísland er svo stórt og samt svo lítið. Á Íslandi þykir það stórfrétt að Aron sem nýlega var látin laus úr fangelsi erlendis skuli hafa sést við hliðina á öðrum strák á djamminu. Ég veit þið haldið að ég sé að grínast en það er því miður ekki svo. Hér sjáið þið mynd af kappanum . Gellurnar á barnalandi voru meira að segja að giska á að félaginn hans á myndinni væri of ungur.....!!!

HVAÐ ER AÐ GERAST Á ÞESSU KRUMMASKUÐSLANDI!!!!

Mynd af mér

2007-09-23T14:42:00.000Z

Ég get ekki sagt að ég myndist vel og mjög sjaldan gerist það að ég sjái mynd af mér sem mér finnst ekki ófríð. Ég verð því svo kát þegar ég sé mynd af mér sem mér finnst vera flott. Þessa mynd tók Daði af mér í þrítugsafmælinu sínum daginn. Þetta finnst mér vera flott mynd.

Árshátíð

2007-09-23T13:58:00.000Z

Ég fór á árshátíð í gærkvöldi á Hótel Íslandi eða Broadway eins og það heitir í daglegu tali. Ég fór með pabba mínum sem staðgengill mömmu sem er í hinni einu sönnu París þessa helgi. Þetta var fín skemmtun. Ég skal alveg viðurkenna að rusla-bransinn ber með sér mikið af sérstöku fólki. Fyrst skal telja gaurinn sem í byrjun var í afskaplega flottum smóking en var að svipstundu orðin ber að ofan, skólaus og sveittur á dansgólfinu, samt með konu upp á arminn. Stebbi frændi sagði hann reyndar vera eitthvað spes, en hitt er víst að hann skemmti sér manna best.

Það var heilt stórt borð af Pólverjum. Ekki að þeir séu neitt slæmir, samt fyndið að þeir skyldu sitja þarna saman í einum bunka. Það er nú ekki hægt að segja að pólskir karlmenn séu ljótustu karlmenn í heimi, hávaxnir með mjög karlmannlega andlitsdrætti. Verst að konurnar pólsku eru þannig líka, fer kvenmönnum ekki eins vel að vera svoleiðis. Ruslakarl eða ekki ruslakarl, Pólverjar eru nú ekki alveg fyrir mig, ég myndi liggja í kasti yfir að hlusta á þá tala :) Hljómar þetta illa?

Svo var það borðið með öllum þeim sem voru á lausu. Já þær sátu saman á borði og það sem meira er þá settu þær á sig kórónu til að vera viss um að allir vissu að þær væru á lausu. Mjög fyndið. Auðvitað sátu þær svo á næsta borði við alla Pólverjana. Gaman að þessu og greinilega skemmtilegur mórall á þessum vinnustað.

Ég dansaði gat á báða skálmar á sokkabuxunum og það kom meira að segja blaðra á annan fótinn. Ég dró meira að segja pabba með mér á dansgóflið. Góð minning þar í minningabankann.

Það skemmtilegastaa var svo að ég vann í happdrættinu. Gjafabréf frá Sævari Karl sem ég má ná í á mánudaginn. Spennandi að vita hvað það felur í sér. Kannski sokkapar? eða pípuhatt :) Hver veit?

Smá neyðarlegt atvik á föstudagskvöldi.

2007-09-22T09:56:00.000Z

Það eru nokkrar íbúðir búnar að vera til sölu í blokkinni minni. Tvær þeirra eru seldar en sú þriðja sem er dýrust og flottust er ekki að ganga út. Í gær þegar ég kom heim mætti ég konunni sem á hana núna með áhugasama kaupendur upp á arminn. Þegar ég kem inn í stigaganginn eru þau akkúrat á leiðinni niður til að skoða geymsluna. Ég tölti á eftir þeim niður stigann og heyri að konan segir, hér fyrir framan er svo sameiginlegt þvottaherbergi, þetta segir hún og lítur svo á mig og segir: en það notar það nú engin nema hún Kristjana. Að svo mæltu kveikir hún ljósið í þvottaherberginu. Þá verður svona líka hrikalega löng þögn og svo fara þau öll að hlægja og konan segir hlægjandi hérna fyrir innan er svo geymslan og þau ganga þangað.

Það var akkúrat á því augnabliki sem ég mundi eftir því að ég gleymdi að taka þvottinn af snúrunni um morguninn. Á snúrunni héngu því sex brjóstahaldarar og svona 10 nærbuxur af undirritaðri. "roðn" ég fór bara inn í íbúð og lokaði á eftir mér. Vona að þetta fólk muni ekki kaupa íbúðina uppi.............

Hvað er skvísan er gera núna!

2007-09-19T23:24:00.000Z

Ég braut tönn á mánudaginn og fór til tannlæknis í dag til að bæta skaðann. Ég er svo einstaklega óheppinn að hafa nákvæmlega ekkert pláss í munninum og bilið á milli tannanna er það lítið að stundum þarf að nota krafta til að koma tannþræðinum á milli þeirra til að þrífa þær. Þær eru svona svipað þétt saman og fólkið í ópal auglýsingunni. Það var mjög fyndið að horfa á tannlækninn fórna höndum í dag og segja "ertu ekki að djóka" þegar hún var búin að rembast í nokkrar mínútur við að koma svona litlu ál stykki á milli tannanna í við hliðina. Sagði líka að ef ég hefði ekki komið og látið laga þetta gat þá hefði það horfið á nokkrum vikum, hinar tennurnar hefðu verið aukaplássinu fegnar og breytt úr sér. Systir mín 32 ára hefur aldrei þurft að láta bora í eina einustu tönn og ég sit uppi með eitthvað ónýtt drasl sem hefur ekki pláss til að vera hreint.....!

...og að öðru, þetta gengur ekki lengur. Ég er að verða eins og sautjánda júní blaðra og því er ekkert annað að gera en að spýta í lófana og henda sér í ræktina. Ég mun því byrja hjá einkaþjálfara á mánudaginn....nú verður tekið á því!!!

KOMA SVO

PS. var að færa Eddu úr skammarkróknum í hinn flokkinn og bætti svo litla unganum hennar Guggu í barnalandsflokkinn.....nóg að gera!

Að vera með hring

2007-09-18T23:12:00.001Z

Á stuttum tíma hef ég heyrt tvær sögur af giftum hjónum sem kusu að ganga á bak orða sinna við hvort annað, svo maður tali ekki um manninn þarna uppi. Til hvers að heita því að vera maka sínum trúr ef fólk stekkur í burtu um leið og það stekkur í burtu þegar eitthvað annað býðst eða ekki. Skiptir það fólki virkilega engu máli þó það sé með hring á fingri?

Ég heyrði af hjónum sem búin voru að vera gift í mörg ár, áttu orðið þrjú börn, hús, bíl og allan pakkann. Hvað kemur svo upp. Jú, jú karlinn á bara aðra konu, annað hús, önnur börn, í öðru landi. Hvernig getur nokkur maður verið svona falskur?

Ég heyrði af öðrum hjónum sem búin voru að vera gift lengi. Þau voru líka með allan pakkann, börnin, bílinn, húsið, ást og hamingju. Eitt sinn þegar maðurinn kemur heim er konan horfin úr húsinu með allt sitt hafurtask, þar með talin börnin. Daginn eftir nær maðurinn loksins í hana, hún segist vilja skilnað því hún sé komin með annan mann og flutt til hans. Maðurinn spyr, nú er þetta nýtilkomið...konan segir, nei ég er búinn að halda við hann í níu ár? OJ - já konur eru ekkert betri.

Ég verð alltaf jafn hissa þegar fólk getur stokkið svona frá öllum sínum loforðum. Ef það er óhamingjusamt í sínu sambandi, af hverju skilur það þá ekki áður en það leyfir sér að leggjast svona lágt.

Ég skil líka ekki hvernig fólk getur flutt út frá einum maka sem þeir eru kannski búin að vera með árum saman og haldið að það geti bara hviss, bamm, búmm hent þeim tilfinningum sem því sambandi fylgdi og byrjað bara upp á nýtt með einhverjum öðrum, fyrr eða síðar nær svona afgreiðsla í rassinn á fólkinu. Ég er á því að það sé bara eitthvað mikið að í hausnum á þessu fólki. Hvernig getur fólk leikið sér svona af öðrum, öðrum sem þeir hafa verið heitbundnir.

Já, já ég held að ég sé bara sátt við það að hafa ekki sett upp hring án þess að meina það. Þegar það gerist mun ég standa hundrað prósent við það sem hann táknar, annars myndi ég ekki geta gengið með hann og hana nú!!!

Skamm, skamm!!!